1 ताहां मी कोयो, ओ याकोब पारवाड़ीइ पुढाऱ्यों, माआं गोठ माना! ओ इस्राएलोअ पारवाड़ीइ न्याय कोअनारा, तुमुहूं न्यायोहो उंडे रोत जाइंलोअ इश्शा कायनाहां के? 2 तुमू हाजी गोठीइ सीस कोअताहा, पोन खाराब गोठीही मेर कोअताहा. तुमू माआं खाजगी माअहुंउं सांबड़े काडीत लेताहा, आन तियांआं आडोअरीइ माहां होरीत लेताहा; 3 एतोज नाहां पोन तुमू माआं वावड़्या माअहुंउं माहां खाताहा, आन तियांआं सांबड़े बी होरीत लेताहा; तुमू तियांआं आडोहो आंड्लामेहें बाफीइलाआ काजे पुकरा कोअताहा आन तियांआं माहां आंड्लामेहें रांदीइलाआ काजे पुकरा कोअताहा. 4 ओड़सनीइ वेले तुमू यहोवा देवोहो हाद कोअहा, पोन तो तुमाआं ने उनाय, एतोज नाहां पोन तियी वेले तो तुमाआं खाराब कामोअ वाखरी तुमाअहें रोत सोब फेरवीत लेये.

5 यहोवा देवोअ ओं वसन होय के, जे भविश्यवक्ता माआं माअहुंहूं भटकावी देताहा, आन जाहां तियांहां खाअहूं जोड़ेहे, ताहां "हाजो, हाजो" कोत आअड़ीइताहा, आन जर एखू तियांहां खाअहूं किज ने आपे, ताहां तियाअरी सुलाअहूं तियार ओत जाताहा. 6 तिहीं वाअहीं तुमापोअ एहेलिही रात आवे के तुमुहूं किज दर्शन ने जोड़े, आन तुमू एहेलाहा आंदारामेहें पोड़हा के भविश्य ने कोत सेकहा. भविश्यवक्ताआं काजे दिही बुडीत जाय, आन तुमाआं दिही बी आंदाराम बोदलात जाय.✝ 7 दर्शन देखनारे लाजवाय, आन भविश्य कोनाराआ सोब काली ओवे; ते सोताआ सोब टापे, काहाके देव तियांहां उत्तर ने आपे.

8 पोन आंय देवोअ सेक्ती, आन यहोवा देवोअ आत्मावाअहीं पोआलू होय; मामेहें न्याय आन ताकत होय, याअकाजे के आंय याकोबोहो तियाआ सुक, आन इस्राएलोहो तियाआ पाप देखाड़ीत सेको. 9 ओ याकोबोअ पारवाड़ीइ पुडाऱ्यों, ओ इस्राएल पारवाड़ीइ न्याय कोअनारा, ओं उनाआ! काहाके तुमू न्यायोहो सीस कोअताहा, आन तुमू सिदी गोठीही उलटी-सुलटी कोई देताहा. 10 तुमू सियोन होयरोअ खुन कोइत आन येरुसालेमोहों ओन्यायोवाअहीं मजबुत कोअताहा. 11 तुमाआं पुडारी लास खात कोइत न्याय कोअताहा, आन पुंजारा पोशा लेत कोइत कायदाआ गोठी सिकाड़ताहा, आन भविश्यवक्ता पोशा लेत कोइत भविश्य कोताहा; तेबी ते एहें कोत यहोवा देवोपोअ भरिवसू मिकताहा, "यहोवा देव आमाआं विसमेहें होय, तिहीं वाअहीं किज अड़सन आमापोअ नाहां आवनारी."

12 तियाहा काजे तुमा वाअहीं सियोन होयर खेड़ल्या खेतोअ होस देखाय; आन येरुसालेम आरवाइलाअ टिग बोणे, आन जिया डोगोपोअ मंदीर बांदाअयोहो, तों उजाड़ीइ उसा जागाआ होस ओत जाये.✝