मिखा 4

शांतीइ राज्य

1 आखरीइ दिहोमेहें ओं ओवे के यहोवा देवोअ मंदिरोअ डोगोअ आखा डोगोमेहें रोत वोडू मानाय;

आन तो आखा डोगोम रोत उसू रोय.

हारेक राज्याआ माअहें खाडीइ होस तियाआ वोगेहे आवे.

2 आन ते आवित कोइत एहें कोये,

"आवा आपू यहोवा देवोअ डोगोपोअ सोड़ुहूं,

याकोबोअ देवोअ मंदिरोमेहें जाहूं;

ताहां तो आपुहूं तियाआ वाट सिकाड़े,

आन आपू तियाआ वाटेपोअ सालहूं."

काहाके यहोवा देवोअ नियम सियोनोम रोत,

आन तियाआ आवाज येरुसालेमोम रोत निहे.

3 तो जाअखिलाहा देसोअ माअहुंउं न्याय कोए,

आन सेटे सेटे जाआं जोराखा राज्याआ माअहें भान्गड़्यी मिटाड़े;

तियाहा काजे तें सोताआ तारवाइ टिपीत कोइत तियांआं ओलोअ फाल बोणावे,

आन धाऱ्याआ दात्लू बोणावे;

ताहां एका राज्याआ माअहें

बिहीरा राज्याआ माअहुंउं विरुद्दाम फाशेए तारवाआ ने सालाड़े;✝4:3 योएल 3:10

4 हारेक माहुंउं तियाआ दाराक्शाआ मोलाम,

आन अंजीर साड़ोअ थुड़ी आराम लेते बोहीत रोय,

तियांहां दुस्मोनोअ ताड़ेए बिक ने रोय;

होरगामेऱ्यीइ सेनाआ प्रभु यहोवा सोताहा ओं कोयोहो.✝4:4 जख 3:10

5 आखा देसोअ माअहें जिवज्योअ देवताआ नावोपोअ सालतेहे; पोन आपू हादाजोलोम आपाआ यहोवा देवोअ नावोपोअ सालहूं.

गुलामीम रोत इस्राएलोअ सुटका

6 यहोवा देव एहें कोहे, "तेदिहीं आंय लेंगड़ाहा टोलु वालीहीं, वेराअलाहा टिग वालीहीं; आन जियांहां तारास देदुतो, तियांहां बी टोलु वालीहीं. 7 लेंगड़ाहा आंय बाकी तियांआं राज्य बोणाविहीं. जें बाकी रोयेहे तियांवाअहीं आंय एक ताकतवालो राज्य बोणाविहीं. आज रोत यहोवा देव सियोन डोगोपोअ रोत कोइत तियांपोअ राज्य कोए."

8 ओ एदेरोअ माला! ओ येरुसालेमोअ माल*4:8 माल उसू जागु! ताहूं पेल्लीइ होस सालती जोड़े, ताहूं येरुसालेमोअ राज्य जोड़े. 9 ओ येरुसालेम होयर! तु गोलू फाड़ी फाड़ीइ काहा आअड़ेहे? केहें ताआ जागे एखु राजा कायनाहां के? केहें ताहूं हान देनारे मोइत गोयेहे के जियावाअहीं तु पोटाअरीइ बोईंइ होस ठाल्ली पोड़ीइलोअ पिड़ावाअहीं तोड़पेहे? 10 ओ सियोनोअ बेटिह्ही! पोटाअरीइ बोईंइ होस काहेंहें! तु गावोंम रोत बारथे निहींही, आन ताहूं सापड़ा रानोमेहें रोअहूं पोड़े. तु बाबेल देसोमेहें जाही. तिहीं प्रभु ताहूं सोड़वे; ताआ दुस्मोनोअ आथोम रोत यहोवा देव ताहूं वासाड़े. 11 ओमे जाअखिलेहे राज्याआ माअहें ताआ विरुद्दामेहें टोलु वोलीत कोइत एहें कोतेहे, "सियोनोहों एठो कोइ द्या, आन आमू आमाआं डोआवाअहीं आरवाअत्लाहा पालहूं." 12 पोन तियांहां यहोवा देवोअ विसार नाहां मुंदू, आन तियाआ योजनाहा नाहां समजीइते, जेहेंकोइत खोलामेहें पुला टिग वालतेहे तेहेंज कोइत यहोवा देव तियांहां सुउवीइलोअ कोअते टिग वाल्येहे.

13 "ओ सियोन होयर, उठ! आन मोलो वोल, आंय ताआ हिंगे लोड़ाआ, आन खुऱ्यी इसत्लेए बोणाविहीं; ताहां तु जाअखीला राज्याआ माअहुंहूं सुउवीही, आन तु तियांआं मालधन आखी कोलीइ यहोवा देवोहो भेट कोई देही."