1 ए येरुसालेम होयर! तु ताआ सेयनिकोहों टोलु वाल, काहाके तिये ताहूं केंडवारीत लेदोहो; ते इस्राएलोअ आधिकाऱ्योहों डेंगारी वाअहीं गालोपोअ देय.

2 प्रभु कोहे: "ओ एप्राता मुलखोअ बेथलेहेम, तु यहुदामेऱ्योअ आखा रोत हानो होयर होये. पोन तामेहें रोत एका इस्राएलोअ राज कोअनाराहा आंय माआं काजे काडीहीं, तियाआ कुटूंबाआ वेलू आगाड़ी रोतीज सुरु ओवुहू."✝

3 जाअहूं जाआं पोटाअरीइ बोईं पोऱ्याहा ने जल्म आपे, ताअहूं जाआं यहोवा देव इस्राएलवालाहां गुलामीमेहेंज रोअहूं देय, तिहींइं फाटी बाकी रोल्ये इस्राएली तियांआं पाव्हीइलाआ जागे वोलीत आवे. 4 आन तो उबु रोत कोइत यहोवा देवे आपल्यी सेक्ती वाअहीं, आन तियाआ यहोवा देवोअ महान नावोवाअहीं, तियांआं सारवाली कोए. ते हाजीहुतेहे रोय, काहाके ओमे तो धरतीइ मेरे-कोरे जाआं महान ठोरे.

5 तो शांतीइ मुल ठोरे. जाहां आश्शूरवाली सेना आपाआ देसोपोअ ताड़ आवे, आन आपाआ राजवाड़ामेहें गुडू मिके, ताहां आपू हांत सारवाल्योहों एतोज नाहां पोन आंठ माअहोंअ पुडारी तियाआ विरुद्दामेहें उबा कोअहूं. 6 ते आश्शूर देस आन निम्रोदोअ फोहीइलोअ वाट तारवाइ वाअहीं आरवी देय; आश्शूर आपाआ देसोम आवे, आन आमाआं हाद्दीइ मायते गुडा मिके, तेहेलाम तो माटी तियांआं आथोम रोते आमाआं सुटका कोए.✝

7 ताहरीइ जाअखीला देसोवाअहीं केंडाअली बाकी रोल्यी याकोबोअ पारवाड़ी यहोवा देवोअहें रोत पोड़नारा साकलाआ होस, आन खोड़ोपोअ पोड़त्ला वोरहातोअ होस ओवे, जों कोडाआज काजे नाहां रुकाअतो आन मोनव्योअ वाट नाहां जोवतो. 8 याकोबोअ रोल्ये माअहें आखे राज्य आन देसो देसोअ माअहुंउं विसमेहें एहेलेहे बोणे, जेहेलेहे रानठ्या जनवारोमेहें सिहोंवागोअ होस, आन मेडान बोकड़ाआ गोवारामेहें जुवान सिहोंवागोअ होस बोणे, काहाके जाहां तो तियांआं विसमेहें रोत सोरके, ताहां गोदारु पाड़तुज आन वेतरीइतुज जाय, आन कोडोज ने वासाड़ीत सेके. 9 ताआ आथ ताआ विरोध कोअनारापोअ पोड़े आन ताआ आखा दुस्मोन आरवाइत जाय.

10 यहोवा देव ओं कोहे: "तेदिहीं आंय ताआ विसमेहें रोत ताआ आक्खा कोड़ाहा माइत टाकिहीं, आन ताआ आखा गाडाहा मुड़ीत टाकिहीं. 11 आंय ताआ देसोअ आखा होयरोहो आरवीहीं, आन ताआ आखा किल्लाहां ओदारी देहीं. 12 आंय ताआ आथोमेऱ्युउ जादू आरवी देहीं, आन ताआ जागे भविश्य कोनारे जिवते ने रोय. 13 आंय ताआ मुर्तीही आन ताआ विसमेहें रोत ताआ पुंजीइलोअ पाल्याहा आरवी देहीं; आन तिहीं रोत तु ताआ आथोवाअहीं बोणावल्यी वस्तुउ भक्ती ने कोइत सेकही. 14 आंय ताआ विसमेहें रोत आशेरा नावोअ मुर्तीही मुलोम रोत उफड़ीत टाकिहीं, आन आंय ताआ होयरोहो आरवी देहीं. 15 आन जे माअहें माआ कोल्ये नाहां मानते, तियांहां आंय जुदी खोतेवाअहीं बोदलू लेहीं."