योना 1

योनू देवोअ आदेश ने मानत्लू

1 अमित्तेए पोऱ्या योनाअरी देव एहें कोइत गोग्यू: 2 "उठीत कोइत फोला वोडा निनवे होयरोम जात कोइत तियांआं विरुद्दाम परसार कोओ; काहाके तियांआं खाराब कामे माआ नजरेम वादीत गोयेहे." 3 पोन योना तार्शीशोअ वोल नाहींत जाअलोअ काजे उठ्यू, आन याफामेहें तार्शीश जानारी एक जाहाज तियाहा मिल्यी. ताहरुउ तो देवोअ सामने रोत तार्शीशोअ वोग जाअलोअ काजे पाड़ो आपीत तियी जाहाजीम सोड़ीत माय जातू रोयू.

4 तेहेलाम यहोवा देवे दोऱ्यामेहें एक नाहाजू वोडू वारु मोकल्यू, आन दोऱ्याम जास्ती वोडू वादुउ सालू ओत गोयू. तिहींइंरी ते जाहाज टुटीत जाअहूं कोअतीते. 5 ताहां ते जाहाजेए सालाड़नारा आखा बियबिय जिवज्योअ देवी-देवताआ नाव लेना वोल्या. आन जाहाज ओल्की कोइलोअ काजे तिहींमेऱ्योअ धंदाआ आखो सामान दोऱ्याम टाका वोल्या. पोन योनू तोम जाहाजीइ निसऱ्याआ जागाम जात कोइत वारुहूं हाजू हुवीत गोयुतो.

6 ताहां जाहाजीइ मुख्यू तियाआ जागे आवित कोनु वोल्यू, "तु केहें इंहीं वारुहूं हाजू हुवेहे? उठ, ताआ देवोहो नाव लेत गोगाड़! ओत सेकेहे देव आपाआ कालजी कोइत आपुहूं ने मोअहूं देय."

7 ताहां जाहाजेए सालाड़नारा कोयो, "आवा, कोडाआ वाखरी ए वोडी आफत आयीही, तों जांइत लेअलोअ काजे सिट्टी फोड़कावता." ताहां तियां सिट्टी फोड़कावयी, आन ते सिट्टी योनाआ नावोपोअ निहींयी. 8 ताहां तियां योनाहा फुशो, "ए आफत आपापोअ काहा काजे आयीही तों आमुहूं को? ताआ धंदू की होय? तु कोड्ला देसोम रोत आयुहू? तु कोड्ला माहूम रोत आयुहू?"

9 तिये तियांहां कोयो, "आंय इब्री होंव. जिये जुग, धरती आन दोऱ्या ओं आखो बोणायोहो तिया यहोवा देवोअ आंय भक्ती कोअहो." 10 जाहां तो यहोवा देवोअ सामने रोत नाहींत आयुहू एहलोहो तियांहां मुंदू पोड़ीत गोयू, ताहां ते जुदा बित गोया; काहाके तिये सोताहा तियांहां कोत देखाड़ी देदोतो.

ताहराआ ते तियाहा कोना वोल्या, "तुमे एहेलोहो काहा कोअयोहो?" 11 ताहां तियां योनाहा फुशो, "ताहां ओमे दोऱ्याआ उपाड़ा बोंद ओत जाय तेहें काजे आमू ताहूं की कोओ?" तेहेलाम दोऱ्याआ उपाड़ा बी जाअखा जाअखा वोदा वोल्याते.

12 ताहां तिये तियांहां कोयो, "तुमू माहूं विसीत दोऱ्याम टाकी द्या; ताहां दोऱ्याआ उपाड़ा बोंद ओत जाय; काहाके ए आफत माआंज उस्ती तुमापोअ आयीही ओं माहूं मुंदू होय."

13 तेबी ते माटी जाहाज मेरे लेतावीइलोअ काजे जास्ती मेहेंनत कोअयी; पोन दोऱ्याआ उपाड़ा जास्ती सालू ओता तिहीं वाअहीं ते मेरे ने पोतीत सेका. 14 ताहां तियां यहोवा देवोहो प्रार्थना कोइत कोयो, "ओ यहोवा देवा, या माट्योअ जिवोअ बोदले तु आमाआ जिव मा लेही, आन आमापोअ निर्दुसोअ खुनोअ गुनू मा लागाड़ही. काहाके ओ यहोवा देवा, ताआ मोर्जीइ परमाणे तुमे कोअयोहो." 15 ताहां तियां तिया योनाहा उसलीत पाअयोंम टाकी देदू. तेहेलाम दोऱ्यामेऱ्याआ वोडा उपाड़ा बोंद ओत गोया. 16 ताहां ते माटी यहोवा देवोहो जास्तीज बित गोया, आन तियाहा गाराहा आप्यी आन तियाआ पालनी तोअयी.

17 यहोवा देवे योनाहा गिईंत लेय तेहें काजे एक जुदू वोडू मासू ठरवीत मेक्युतो; आन योनू तिया मासाआ पोटाम तिन दिहीन तिन रात पोड़ीत रोयू.✝1:17 मत्तय 12:40