आमोस 7

आरवाइलोअ तीन दर्शने:

टिड्ये

1 यहोवा देवे माहूं ओं देखाड़्यो. आन माहूं कि देखाअहे के तिये फासल्योअ खोड़ उगीइलोअ सुरुवातीहीज टिड्ये बोणावी देदे; आन तों राजाआ कामाय वाडीत लेदो तिहींइं फासाड़ीइ खोड़ ओतो. 2 जाहां तें पुंयींपोऱ्योअ आखो खोड़ खात सुके, ताहां मी कोयो, "यहोवा देवा, माप कोइ दे! नेत याकोब केहें कोइत टिकीत सेके? तो केतुहू हानू आन लुलू होय!" 3 यी गोठी वाअहीं यहोवा देवे विसार बोदल्या आन तिये कोयो, "एहलीही गोठ ओमे ने ओवे."

आग

4 यहोवा देवे माहूं एहलोहो देखाड़्यो, आन तिहींम की देखाअयो के यहोवा देवे आगी वाअहीं न्याय आपीइलोअ पुकारु कोअयू, आन तियी आगी वाअहीं वोडू दोऱ्या उगात गोयू, आन पुंय बी बोली वोल्यीते. 5 तेहेलाम आंय कोयो, "ओ यहोवा देवा, थोबीत जा! नेत याकोब केहें कोइत टिकीत सेकेहे? तो केतुहू लुलू होय." 6 याआ बाप्तिम बी यहोवा देवे विसार बोदल्या; आन तिये कोयो, "एहलीही गोठ फाश्यीइ ने ओवे."

वालांबू

7 तिये माहूं ओं बी देखाड़्यो के, मालिख वालांबू लागाड़ीत बोणावल्या पितड़ापोअ उबू रोत होये, आन तियाआ आथोम वालांबू होय. 8 यहोवा देवे माहूं कोयो, "ए आमोस, ताहूं की देखाअहे?"

आंय कोयो, "एक वालांबू."

ताहां देवे कोयो, "पाल, आंय माआ इस्राएलवाला माअहोंअ विसमेहें वालांबू लागाड़ीहीं, आन ओमे आंय तियांहां डोंड आप्या सिवाय ने सोड़ो." 9 इसाकोअ उसू जागू आरवात जाय, आन इस्राएलोअ सोकू जागू हुंद्लू ओत जाय, आन आंय यारोबामोअ कुटूंबापोअ तारवाआ उमाअतुज लोड़ाय कोऊ जाहीं.

आमोस आन आमस्यू

10 ताहां बेथेलोअ पुंजारे आमस्ये इस्राएलोअ कुटूंबाआ विसमेहें राजा यारोबामोअ जागे कोत मोकल्यो, "आमोस इस्राएलोअ कुटूंबाआ विसमेहें ताअरी कदर काड्यीही; तियाआ आखी गोठीही देस नाहां वेठीत सेकतू. 11 काहाके आमोस एहें कोहे, ‘यारोबाम तारवाइ वाअहीं मोए, आन इस्राएलवाले तियांआं देसोम रोत गुलामीम जानारे ताहां जानारेज.’"

12 ताहां आमस्ये आमोसोहो कोयो, "ओ जाओण, इंहीं रोत निहींत यहुदा देसोम नाहींत जा, आन तिहींज रोटू खाया कोओ, आन तिहींज भविश्यवाणी कोअया कोओ; 13 पोन बेथेलोम फाशोअ केदिहीं भविश्यवाणी मा कोअही, काहाके ओ राजाआ सोकू जागू आन राजाआ कोअ होय."

14 आमोसे आमस्याहा उत्तर आपीत कोयो, "आंय ने ते भविश्यवक्तू ओतू आन ने भविश्यवक्ताआ पोऱ्यु; आंय तोम सारवाली आन उंबरोअ साड़े सिंदनारु ओतू. 15 आन यहोवा देवे माहूं मेडा-बोकड़ाआं फासाड़ी फासाड़ी फिरत्लू तिहीं रोत हादीत कोइत कोयो, ‘जा, माआं इस्राएलवाला माअहोंअ काजे भविश्यवाणी कोओ.’ 16 तियाहा काजे ओमे तु यहोवा देवोअ वसन उनाआ, तु कोहे के, ‘इस्राएलोअ विरुद्दाम भविश्यवाणी मा कोअही; आन इसाकोअ घराणाआ बाप्तिमेहें ताल ताल गोठी मा होंबलाड़ही.’ 17 तियाहा काजे यहोवा देव एहें कोहे. ‘ताआ बोयोंओं होयरोम रांडी बोणीत जाय, आन ताआ पोऱ्यान पोऱ्यी तारवाइ वाअहीं मोए, आन ताआ जागू दोरु मापीत वाटीत लेय; आन तु सोताहा एठा देसोम मोअही, आन इस्राएल हुदाअलीज तियाआ जागाम रोत गुलामीम जातू रोय.’"