आमोस 8

फोलवा वाअहीं पोआली टोपलीइ दर्शन

1 यहोवा देवे माहूं ओं देखाड़्यो: के उनालामेऱ्याआ फोलवा वाअहीं पोआली एक टोपली होय. 2 तिये कोयो, "ए आमोस, ताहूं कि देखाअहे?"

आंय कोयो, "उनालामेऱ्याआ फोलवा वाअहीं पोआली एक टोपली."

ताहां यहोवा देवे माहूं कोयो, "माआं माअहूं इस्राएलोअ सेलवाऱ्यीइ वेल आवीत लागीही; ओमे आंय तियाहा फाशुउ ने सोड़ो." 3 यहोवा देवोअ वसन होय, "तेदिहीं मंदीरोअ गिते विखामेहें बोदलात जाय, आन तोड़ोअ वोडू टिग ओत जाय; आन हुंद्ली जागे तियांहां ठावकेज टाकी देवाय."

इस्राएलोअ आरवाइलो

4 ओं उनाआ, तुमू जे गरब्योहों गिइंत लेएहूं होदताहा आन देसोअ कांगाल माअहोंहों आरवुहूं होदताहा, 5 जे कोताहा, "नोवू कोयों सेके ताहां आपू दाणा वेसीत सेको? आरामोअ दिही केदिहीं सेके, के जिया वाअहीं आपू आपाअ गोवें वेसीइलोअ काजे मापलो आन ताराजाहा एहेलुहू ओलवू कोइत लेहूं, के माअहुंहूं ठोगीत सेको. 6 आन कांगालोहों पोशा आपीत कोइत, आन गोरब्योहों एक जोड़ी खाहड़ाआ किमतेम वेसाते लेत लेतेहे, आन खाराब ओन वेसीत सेके?"

7 जियापोअ याकोबोहो वोडाय कोइलोअ जागू होय, तोज यहोवा देव, सोताआ शप्पत खात कोइत कोहे, आंय तुमाआ कोड्लाज कामोहों केदिहीं ने विहीराओ. 8 केहें यी गोठी वाअहीं धरती ने कापे के? तिहींपोऱ्येए रोनारे आखे विखु ने कोए के? ओ देस आखो बादो मिसर देसोअ नील नोयीइ होस रोय, जे वाद्या कोअहेन घोटीत जाहे. 9 यहोवा देवोअ ओंज वसन होय, "तिया गालाहा आंय माजोन दिहेज दिही बुडाड़ीहीं, आन या देसोहो दिहीदोवल्येज आंदारो कोई देहीं. 10 आंय तुमाआं खुसीइ तिवारोहो सेटे कोइत विखू कोआड़ीहीं; आन आंय तुमा आखाआ विखाआ आंगड़े पोवाड़ीहीं, आन तुमा आखाआ मुन्के बोड़ावीहीं, आन जेहलुहू एखला पोऱ्याआ विखु कोअतेहे तेहलुहू विखु कोआड़ीहीं, आन तियाआ सेवट कोठीण दुखोअ दिहोम जेहें ओवे."

11 यहोवा देवोअ ओंज वसन होय, "पाला, एहेलाहा दिही आवताहा, जाहां आंय या देसोमेहें काल पाड़ी देहीं; तेहेलाम ने ओनोअ फुक रोये के ने पाअयोंअ तिही रोय, पोन यहोवा देवोअ वसन उनाइलोअ फुकेन तिही रोय. 12 माअहें यहोवा देवोअ वसन या दोऱ्या रोत फोला दोऱ्याआ जागे जाआं आन पालामाअहें रोत ते उगतामाअहें जाआं होदी होदीइ थाके, पोन तियांहां ने जोड़े. 13 तेहेलाम बाहरी जुवान पोऱ्यान पोऱ्यी बेनू तोरह्येज कोमाइत जाय. 14 जें माअहें शोमरोनोअ पापमूल देवताआ शप्पत खातेहे, आन जें कोतेहे, ‘दानोअ देवताआ जिवोअ शप्पत, आन बेर्शेबाआ पंथाआ शप्पत,’ तें आखे निसे पोड़े तिहीं रोत ने उठे."