1 यहोवा देव एहें कोहे, "मोवाबोअ ताल-ताल कोअल्या गुनाआं वाखरी, आंय तियाआ डोंड ने सोड़ो; काहाके तिये एदोमोअ राजाआ आडे बालीत खाआं वाली देदू. 2 तियाहा काजे आंय मोवाब मुलखोमेहें आग लागाड़ीहीं, आन तिहीं वाअहीं करिय्योत होयरोअ किल्लू बोलीत जाय; आन मोवाब दोंगा, पुकारु, आन तुरीइ आवाज ओवता-ओवता मोइत जाय. 3 आंय तियाआ विसमेहें रोत न्याय कोअनारा आधिकाऱ्योहों आरवीत टाकिहीं, आन आरी-आरी तियाआ आखा आधिकाऱ्योहों बी माइत टाकिहीं," यहोवा देवोअ ओंज वसन होय.

4 यहोवा देव एहें कोहे, "यहुदाअ मुलखोमेहें ताल-ताल कोअल्या गुनाआं वाखरी, आंय तियाआ डोंड ने सोड़ो; काहाके तियां यहोवा देवोअ नियमोहों ने मान्ये आन तियाआ कायदाआ पालन ने कोअयो; आन जियीं गोठीइ फासाड़ी तियांआं डायडायहां सालताते, तियां ठोगोअ देवताआ वाखरी तें बी भटकीत गोयेहे. 5 तियाहा काजे आंय यहुदामेहें आग लागाड़ीहीं, आन तिहीं वाअहीं येरुसालेमोअ किल्लू बोलीत जाय."

6 यहोवा देव एहें कोहे, "इस्राएल तिन की, पोन शार गुनाआं वाखरी, आंय तियाआ डोंड ने सोड़ो; काहाके तियां निर्दुसोहों पोशाआ उस्ती आन गोरब्योहों एकी जोड़ी खाहड़ाआ काजे वेसी देदेहे. 7 तें लुलाहा आन टाकाअलाहा पुयींइं तुलाआ होस सेंदतेहे, आन नम्र माअहोंहों वाटेज रोत सेटे हारी देतेहे; आन माआं सोका नावोहो एठो कोइलोअ काजे बाह्हून बेटुह्हू बेनू एकुज कुवांरी पोऱ्यीइ जागे जाताहा. 8 ते उसन्ये साअके फांगीत देवान्याआं जागे हुवताहा, आन डोंडोअ रुप्यावाअहीं वेसातू लेद्लू दाराक्शाआ रोहो तियांआं देवताआ मंदीरोम पित लेताहा.

9 "मी तियांआं सामने रोत एमोरीवालाहां आरवीत टाक्येते, जें देवदार साड़ोअ होस उसे ओते, आन जियांआं ताकत वांज्या साड़ोअ होस ओती; तेबी आंय उसे रोत फलवे आन निसे तियाआ मुले तोड़ीत टाक्ये.✝ 10 आंय तुमुहूं मिसर देसोम रोत काडीत लेत आयू आन तुमू एमोरीइ देसोअ आधिकारी बोणे तेहें काजे रानोमेहें सालीही वोरह्ये जाआं लेत फिरतू रोयू. 11 आंय तुमाआ पोऱ्यामेहें रोत देवोअ भविश्यवक्ता बोणे तेहें काजे आन तुमाआ थोड़ाक जुवानोमेहें रोत नाजीर* बोणे तेहें काजे ठरव्याहा. ओ इस्राएलवाला, केहें ओं आखो बोराबर नाहां के? यहोवा देवोअ ओं वसन होय. 12 पोन तुमू नाजीरोहो दाराक्शाआ रोहो पिवाड़्यु, आन भविश्यवक्ताहा भविश्यवाणी ने कोइलोअ आदेश आपी देदू. 13 पाला, जेहें कोइत सिपाटो पुला बांदीत गाडामेहें दाबीत पोअतेहे तेहें कोइत आंय तुमुहूं दाबीहीं. 14 तियाहा काजे जोरे गुगदीइनाराहा नाहींत जाअलोअ बी जागू ने जोड़े, आन ताकतवालाआ ताकत किज कामोम ने आवे; ने बाहादीर तियाआ जिव वासाड़ीत सेके; 15 तोंद्लीवालू उबू ने रोत सेकनारु, ताबुड़ गुगदीइनारु ने वासाअनारु; कोड़ापोअ बोहीत जानारु बी सोताआ जिव ने वासाड़ीत सेके; 16 आन बाहदीरोमेएं जो जाअखू जोरावार ओय, तो बी तेदिहीं नागरुज गुगदू वोले, यहोवा देवोअ ओंज वसन होय."