आमोस 3

1 ओ इस्राएलवाला, तुमाआ पुरा कुटूंबाआ बाप्तिम मोन्ज्ये जियांहां आंय मिसर देसोम रोत काडीत लेतायुहू, तें तुमू यहोवा देवे जों वसन कोयोहो तों उनाआ, तों एहें कोइते: 2 "धरतीपोऱ्याआ आखा माअहूंमेहें रोत आंय निस्तो तुमापोअ मोन लागाड़्योहो, तियाहा काजे आंय तुमाआं आखा खाराब कामोअ डोंड आपीहीं."

भविश्यवक्ताआ काम

3 "जर बेन माटी एकमेकापोअ राजी ने ओय, ताहां का ते आरी मिलीत सालीत सेके के?"

4 "हावोज ने जोड़्यो ताहां सिहूंवाग घांगरीत सेके के? केहें जुवान सिहूंवाग विण हावोज तोअयेज तियाआ दोराम रोत घांगरे के?"

5 "फांदुज ने मांड्यू ताहां कांय सिड़ी फांदाम लागीत सेके के?"

"केहें काविहीं बिगर फोश्येज फांदू पुयींपोअ रोत उसकड़े के?"

6 "होयरोम तुरी फुके ताहां माहें ने थुरथुर कापे वोले के?"

"केहें यहोवा देवे मोकल्या सिवाय एखा होयरोम एखु आफत पोड़ीत सेकेहे के?"

7 "एहेंज कोइत प्रभु यहोवा देव तियाआ सेवक भविश्यवक्ताहां तियाआ गुप्त्यी गोठी फोड़ीत कोया सिवाय किज नाहां कोअतू."

8 "सिहूंवाग घांगऱ्यू ताहां कोडू ने बिय?"

"यहोवा देव गोग्यू ताहां कोडू होय जो भविश्यवाणी ने कोए?"

शोमरोनोअ आरवाइलोअ

9 अशदोदोओन मिसर देसोअ किल्लाआ बाप्तिम पुकारु कोअ, "शोमरोनोअ डोगोपोअ टिग वोलीत पाला के तिहींम की जातीइ दोंगा आन तिहीं विसमेहें केतुहू तारास होय!"

10 यहोवा देवोअ ओंज वसन होय, "जें माअहें तियांआं किल्लामेहें दोंगू आन लुटल्या पोशा हेंगालतेहे, तियांहां सिदो काम कोइलोअ नाहां मुंदू." 11 तियाहा काजे यहोवा देव एहें कोहे, "देसोहो केंडवारनारु दुस्मोन रोय, आन तो ताआ ताकत काडीत लेय, आन ताआ किल्लू लुटीत लेय!"

12 यहोवा देव एहें कोहे, "जेहें कोइत सिहांवागोअ जोड़बाम रोत बेन गुडा नेताहां कानोअ एक तुकड़ू टाकाड़तेहे आन आथरुउ एक खुणू नेताहां खाट्लाआ पायाआ एक तुकड़ू टाकड़तेहे, तेहेंज कोइत इस्राएलोवाला माअहुंहूं जें शोमरोनोमेहें रोतेहे, तियांहां बी तो टाकाड़े."

13 "उनाआ, आन याकोबोअ कुटुंबाहा ताबलीत कोवा एहें सेनाआ प्रभु, यहोवा देव कोहे. 14 जेहेलाम आंय इस्राएलोहो तियाआ पापोअ डोंड आपीहीं, तेहलाजमेहें आंय बेथेलोअ देवान्याहां डोंड आपीहीं, आन देवान्याआं हिंग टुटीत कोइत पुयींपोअ ओदरीत पोड़े.✝3:14 2 राजां 23:15 15 आंय हियालेए आन उनालेए कोओहो, बेनुहूं ओदारीहीं; आन आथीइ दातोअ बोणावल्ये कोएं बी आरवीत टाकीहीं, आन वोडे वोडे कोएं आरवात जाय, यहोवा देवोअ ओंज वसन होय."