1 "ओ इस्राएलोअ कुटूंबा, या विखाआ गितोअ शब्दे उनाआ जें आंय तुमाआ बाप्तिम कोहो:

2 इस्राएल देस एक कुवांरी पोऱ्यी होय,

जे पोड़ीत गोयी, आन फाशीइ उठीत ने सेकी;

तियीही तियीइ जागाजपोअ आस्टी देदीही आन तियीही उठाड़नारो कोडोज कायनाहां."

3 काहाके यहोवा देव एहें कोहे: "जिया होयरोम रोत हाजार सेयनिक निहींताते तिहींम रोत इस्राएलोअ होवुज बाकी रोय, आन जिहीं होव निहींताते तिहींमेहें दोहूज वासात रोय."

4 यहोवा देव, इस्राएलोअ घराणाहा कोहे: "माहूं होदा, ताहां जिवते रोहा. 5 बेथेलोहो मा होदहा, गिलगालोम मा जाहा, आन बेर्शेबाम मा जाहा; काहाके गिलगाल हुदाअलीज गुलामीम जाय, आन बेथेल हुंद्लो पोड़ीत रोय."

6 "यहोवा देवोहो होदा, ताहां जिवता रोहा, नेते तो योसेफोअ घराणापोअ आगीइ होस बाल्लात उठे, आन ते आग तियाहा बालीत टाके, बेथेलोमेहें तियीही उलवीइनारो कोडोज ने रोय. 7 ओ न्यायोहो कोड़वामेहें बोदलीइनारा आन हाजी गोठीही आरवीइनारा!"

8 "जो जुगोअ कोर

आन तारा बोणावनारु होय,

जो जाडा आंदाराहा उजालो बोणावी देहे,

दोऱ्याआ पाईं पुयींपोअ वोहाड़ी देहे,

तियाआ नाव यहोवा देव होय.

9 तो ताकतवालाहा ताबुड़ आरवीत टाकत्लू, आन गोडोहो बी आरवीत टाकत्लू."

10 कोर्ठामेहें जो खोरु न्याय कोअहे तियाअरी तें दुस्मोनी राखीत रोतेहे आन खोरी गोठ कोत देखाड़नारे याहां वाहीं बी नाहां गोमते. 11 तुमू गोरब्योपोअ दाबाव टाकताहा, आन तियांपोअ फालू एहें कोत ओन पाड़ावीत लेताहा, तिहींज वाअहीं तोम तुमू दोगड़ाआ कोएं बांद्येहे, पोन तिहींम तुमुहूं रोअहूं ने जोड़े. आन जो बाहरी एतुज दाराक्शाआ मोलू तुमू लागाड़्युहू, तिहींम रोत तुमुहूं रोहो ने पीइहूं जोड़े. 12 काहाके माहूं मुंदू होय के तुमाआ गुना जास्ती वजन होय. तुमू धर्मी माहुंहूं तारास देताहा आन लास खाताहा, आन कोर्ठोम गोरब्योअ न्याय बिगाड़ताहा. 13 तियाहा काजे जों समजदार ओय, तों एहलीही गाले ठावको रोअहूं जोवे, काहाके वेल खाराब होय.

14 तुमू कुहराय मा पोन हाजलाय होदा, ताहांज तुमू जिवते रोहा; आन जेहें कोइत तुमू कोताहा तेहलोज सेनाआ प्रभु यहोवा हुदाअलीज तुमाअरी रोय. 15 कुहराय काडा आन हाजलाय मिका, आन कोर्ठोमेहें न्याय टिकाड़ीत मिका; वाअलुहू सेनाआ प्रभु यहोवा योसेफोअ बाकी रोल्या माअहूं पोअ मेरवानी कोए.

16 तियाहा काजे सेनाआ देव, प्रभु यहोवा एहें कोहे: "आखी जागे जिहीं-तिहीं रोड़ीइलोअ सालू रोय. आखी सड़केज माहें किगलीइते इंडे; तें खेते कोअनाराहां रोड़े तेहें काजे, आन जें विखा कोइलोम हाजे कोड़ाअले ओय, तियांहां विखा कोएन रोड़े तेहें काजे हादे; 17 आन दाराक्शाआ मोलाम रोड़ीइलोअ सालू रोय," काहाके यहोवा देव एहें कोहे, "आंय तुमाआं विसमेहें ओवतुज जाहीं."

18 तियांआं केतीही विते, जें यहोवा देवोअ दिहोअ ईश्शा कोअतेय! यहोवा देवोअ दिहो वाअहीं तुमुहूं की जोड़े? तो ते उजालाआ नाहां पोन आंदाराआ दिही रोय. 19 जेहें कोइत फोलो तों सिहांवागोहो देखीत गुगदे आन तियाहा आसालो मिले; नेताहां कोअमेहें आवीत पितड़ाअरी आथ मिकताज एखू हाप टोसी देय. 20 यहोवा देवोअ दिही ओ उजालाआ नाहां पोन आंदाराआ दिही रोनारुहू, ए गोठ बोराबर कायनाहां के? होव, एताहा जाडा आंदाराआ दिही जिहींम वाहीं बी उजालो ने रोय.

21 "माहूं तुमाआ तिवारोअ सोगदाय आवेहे, आन आंय नाहां मानतू; तुमाआ वोडी सभा वाअहीं आंय खुस कायनाहां. 22 तुमू आगीइ आन ओनोअ जोवे तेती गाराहा आपहा, तेबी आंय खुस ने ओवो, आन तुमाआ पालल्या मात्ला जनवारोअ गाराहा बी आंय ने पालो.✝ 23 तुमाआ गितोअ कोकलू मारोत सेटे कोआ; तुमाआ रोंअठ्याआ आवाज आंय नाहां उनाअनारु. 24 पोन न्यायोहो खोबरीइ होस, आन हाजी गोठीही खाडीइ होस वोहुंहूं द्या."

25 "ओ इस्राएलोअ घराणा, तुमू हुंद्ला जागाम सालीही वोरह्ये जाआं जनवारोअ आन ओनोअ भेट कांय माहूंज आपतेते के? 26 तुमू तोम तुमाआ राजाआ तोंबु, आन तुमाआ सक्कुत मुर्तीइ पाट्लू, आन तुमाआ केयवान देवताआ तारु लेत फिऱ्या कोअतेते. 27 तियाहा काजेज आंय तुमुहूं दमिश्कोअ तिवोल जेलेम जाअहूं देहीं, सेनाआ देव यहोवाआ ओंज वसन होय."