आमोस 6

इस्राएलोअ आरवाइलोअ

1 तियांआं केतीही विते तियांआं जें सियोनोमेहें होकेहे रोतेहे, आन तियांआं बी जें शोमरोन डोगोपोअ बेफिकऱ्ये रोतेहे, जें देसोमेहें नावलाअतेहे, जियांआं जागे इस्राएलोअ घराणाआ माअहें आवया कोअतेहे! 2 कलने होयरोम जात कोइत पाला, आन तिहीं रोत हमात नावोअ वोडा होयरोम जावा; फाश्योअ पलिश्तीइ गत होयरोम जावा. केहें तें यां बेनू राज्या रोत जाअखे हाजे होय के? केहें तियांआं हींव तुमाआ हींवे रोत जाअखी वोडी होय के? 3 तुमू बाक्ता दिही सेटे कोई देताहा, आन राड़ेवाली गादी आहने लेत आवताहा. 4 तुमू आथीइ दातोअ बोणावल्यी पोलांगीपोअ हुवताहा, आन जिवज्योअ आथरुपोअ गुडा पोलावीत हुवताहा, आन तुमू खोटामेएं बोकड़े-वासड़े हाजे मात्ले पालीत खात लेताहा. 5 तुमू रोंअठ्याअरी गित गावताहा, आन दाविदोअ होस बाती बातीइ वाजे ओकले वाअहीं बोणाताहा; 6 तुमू सिंगलेन सिंगले दाराक्शाआ रोहो टोहलीइताहा, आन हाजो हाजो तेल हारताहा, पोन योसेफोपोअ आवनारी आफत देखीत नाहां रोड़ता; 7 आन तियाहा काजे तियांआं देसोम रोत तेज वेगा काडी देवाय, आन जे गुडा पोलावीत हुवताहा, तियांआं मोज्या जाती रोय.

8 सेनाआ प्रभु यहोवा सोताआ शप्पत खात कोइत कोयोहो, "जिहींपोअ याकोब वोडाय कोअहे, तियाआ माहूं सीस लागेहे, आन तियाआ किल्ला माहूं नाहां गोमता; आन आंय या होयरोहो आन तिहींम रोनारा आखाहा दुस्मोनोअ आथोम पाड़ी देहीं."

9 जर एखा कोअमेहें दोहो माटी वासाअयाय, तेबी मोइत जाय. 10 जेहेलाम एखाआ आजलुह्हू जो तियाहा डाग देनारु ओये, तियाआ आडोहों कोअमेहें रोत काडीत लेत जाअलोअ काजे आखले, आन जों कोअमेहें खुणे ओय तियाहा कोय, "केहें ताअरी एखु होयजी के?"

ताहां तों कोय, "कोडोन्ने;"

ताहां तो कोय, "ठावकू रो! आपू यहोवा देवोअ नाव ने लेएहूं जोवे."

11 काहाके यहोवा देवोअ आदेशो वाअहीं वोडा कोअमेहें डुसू पोड़ीत जाय आन हाना कोअमेहें सिहीं पोड़ीत जाय. 12 केहें कोड़ा खड़कापोअ गुगदे के? केहें एखु एहलीही जागे बोलोद जुपे के, जिहीं तुमू न्यायोहो जेरोम बोदल्यो आन हाजा कामोअ फोलवे कोड़वाम बोदलीत टाक्येहे?

13 तुमू एहलीही फालतू गोठी वाअहीं खुस ओवताहा आन कोताहा, "केहें आपू सोताआ दोमोपोअ कारनाइम होयर ने जिक्या के?"

14 तिहींज वाअहीं सेनाआ यहोवा देवोअ ओंज वसन होय, "ओ इस्राएलोअ कुटूंबा, पाल, जें हमात काटोम रोत ते अराबा खाडीइ जागे जाआं तुमुहूं अड़सनेम टाके, एहेलाहा देसोअ माअहें तुमाआ विरुद्द उबे कोअहीं."