1 तेकोवावालू आमोस जो मेडा-बोकड़ाआ सारवाल्योमेऱ्युउ ओतू, तियाआ ओं वसन होय; जो तिये यहुदाआ राजा उज्जीयाआ आन योवाशोअ बेटाह्हा इस्राएलोअ राजा यारोबामोअ दिहोमेहें भुकंपाआ बेन वोरह्योंअ पेल इस्राएलोअ बाप्तिमेहें दर्शन देखीत कोयो:

2 "यहोवा सियोनोम पुकारु कोए,

येरुसालेम रोत तियाआ आवाज उनाड़े;

ताहां सारवाल्योअ जागू विखा कोए,

आन कर्मेल डोगोअ सुटी सुल्लाइत जाय."

3 यहोवा देव एहें कोहे, "दमिश्कोअ ताल-ताल कोअल्या गुनाआं वाखरी आंय तियाआ डोंड ने सोड़ो; काहाके तिये गिलादोहो मोलीइलोअ लोड़ाआ सादानोवाअहीं मोलीत टाक्युहू. 4 तियाहा काजे आंय हजाएलोअ किल्लाम आग लागाड़ीहीं, आन तियावाअहीं बेन्हदेदोअ किल्लू बी बोलीत जाय. 5 आंय दमिश्कोअ गेटोहो तोड़ीत टाकीहीं, आन आवेन नावोअ काटोम रोनाराहां आन बेतएदेनोअ कोअमेएं आधिकारीही आरवीत टाकिहीं; अरामवालाहां बांदीत कोइत कीर लेत जाते रोय, यहोवा देवोअ ओंज वसन होय."

6 यहोवा देव एहें कोहे, "गाजाआ ताल-ताल कोअल्या गुनाआं वाखरी आंय तो डोंड ने सोड़ो; काहाके तें आखा माअहोंहों गुलाम कोइत तियांहां एदोमोअ आथोम पाड़ीइलोअ काजे लेत गोयेहे. 7 तियाहा काजे आंय गाजाआ होयरोअ वाड़ीमेहें आग लागाड़ीहीं आन तिहीं वाअहीं तियाआ किल्लू बोलीत जाय. 8 आंय अशदोदोअ रोनाराहां आन अश्कलोनोअ आधिकारी आरवीहीं; आंय माआं आथ एक्रोनोअ विरुद्दाम सालाड़ीहीं, आन बाकी पलिश्ती माअहें आरवात जाय, यहोवा देवोअ ओंज वसन होय."

9 यहोवा देव एहें कोहे, "सोरोअ ताल-ताल कोअल्या गुनाआं वाखरी आंय तियाआ डोंड ने सोड़ो; काहाके तियां आखा माअहोंहों गुलाम कोइत एदोमोअ ताबाम कोइत देदेहे आन पायहोअरीइ शप्पत ओर ने कोअयी. 10 तियाहा काजे आंय सोर होयरोअ वाड़ीमेहें आग लागाड़ीहीं, आन तिहीं वाअहीं तियांआं गोड बोलीत जाय, एहें कोत यहोवा देव कोहे."

11 "एदोम, यहोवा देव एहें कोहे, एदोमोअ ताल-ताल कोअल्या गुनाआं वाखरी आंय तियाआ डोंड ने सोड़ो; काहाके तिये सोताआ पायहोहो तारवाइ वाअहीं ओड़ीत लागुहू आन वाहीं दया ने कोअयी, पोन खिजेमेहें कायम सिरतुज रोयू, तियाआ खोत हादाफल मिकीत रोयू. 12 तियाहा काजे आंय तेमान होयरोमेहें आग लागाड़ीहीं, आन तिहीं वाअहीं बोस्राआ किल्लाम आग पेटात जाय."

13 यहोवा देव एहें कोहे, "आम्मोनोअ ताल-ताल कोअल्या गुनाआं वाखरी आंय तियाआ डोंड ने सोड़ो; काहाके तियां सोताआ हींव वादाड़ीलोअ काजे गिलादोअ मुलखोअ पोटावाली बोईंहीं सिरीत टाक्यी. 14 तियाहा काजे आंय राब्बाआ होयरोअ वाड़ीमेहें आग लागाड़ी देहीं, आन तिहीं वाअहीं तियाआ किल्लू बी बोलीत जाय. तियी लोड़ायीइ दिहोमेहें पुकारु ओवे, तो वादुउ आन पुत्याआ दिही ओवे; 15 आन तियांआं राजा तियाआ सिपायड़ाअरी जेलेमेहें जाय, यहोवा देवोअ ओंज वसन होय."