1 ओ शोमरोन राज्याआ मात्ली बोईं! ओ बाशान डोगोमेऱ्यीइ वासड़्यी! ओ संदेश उनाआ! तुमू जे कांगालोहों दोमत्यीही, आन गोरब्योहों सेंदीत टाकत्यीही, आन सोताआ माट्योहो कोत्यीही के, "ओमहूं लेतावाते, आपू पिहूं!" 2 यहोवा देव तियाआ सोकायीइ शप्पत खात कोइत कोहे, "पाला, तुमापोअ एहेलाहा दिही आवनाराहा, के तुमुहूं काटावाअहीं आन तुमाआ फासाड़ीइ पिड़ीही मासाआ गोली वाअहीं ओसकीत लेत जाय. 3 तुमामेएं हारेक जोओं पितड़ाआ डुसामेहें रोत निहींत जाहा; आन हार्मोनोअ डोगोमेहें टाकी देवाअहा," एहें कोत यहोवा देव कोहे.

4 "इस्राएल ने हुदरीत सेकू, बेथेलोम आवीत गुनू कोआ, आन गिलगालोम आवीत जाअखू गुनू कोआ; तुमाआ गाराहा वेगीइ आन तुमाआ दाहवू भाग तिसरा दिहोअ डिठ लेत आवया कोअजा; 5 खमीर कालीत धन्यवादोअ भेट आपा, तुमाआ राजीखुसी आपल्यी भेट कोत देखाड़ा; काहाके ए इस्राएलवाला, तुमुहूं तोम ओंज गोमत्लो," एहें कोत यहोवा देव कोहे.

6 "आंय ते तुमाआ आखा होयरोम फुकेए काल पाड़्यु, आन तुमाआ आखी जागे रोटाआ कमी पाड़्यीही, तेबी तुमू माआ आहने फिरीत ने आये," एहें कोत सेनाआ यहोवा देव कोहे. 7 "जाहां वाडीइलोअ तिन मोयना बाकी रोया, तेहेलाम आंय वोरहात ने पाड़्यू. आंय एका होयरोम पाईं पाड़्यो आन बिहीराम ने पाड़्यो; एका खेतोम पाईं पोड़्यो पोन बिहीराम ने पोड़्यो, तों उगात गोयो. 8 तियाहा काजे माअहें होयरो होयरो पिइलोअ पाईं होदीत फिऱ्ये, पोन तियांआं तिही ने उडी; तेबी तुमू माआ वोग वोलीत ने आये," एहें कोत यहोवा देव कोहे.

9 "आंय तुमाआ ओनोहो झांव आन किड़ा वाअहीं नुकसान कोइत टाक्यो, आन जाहां तुमाआ बोगिसू आन दाराक्शाआ मोलान, अंजीरेन जेयतुनोअ साड़े जाअखीलेहे वादीत गोये, ताहां टिड्ये तियांहां खात गोये; तेबी तुमू माआ जागे वोलीत ने आये," एहें कोत यहोवा देव कोहे.

10 "आंय मिसर देसोअ होस तुमाआ विसमेहें मोराय सालाड़्यी; तुमाआ कोड़ा बुउसाड़ीत तुमाआ जुवान्याहां तारवाइ वाअहीं माआड़्या; तुमाआ पोड़ावाआ घाण वास तुमाआ नाकोम पोतू; तेबी तुमू माआ जागे वोलीत ने आये," एहें कोत यहोवा देव कोहे.

11 "तुमामेऱ्याआ थोड़ाक जोओंहों आंय एहेलाहा आरव्या, के तियांआं दशा सदोम आन गोमोराअ होस ओत गोयी, आन तुमू आगीम रोत काडल्या सेन्काआ होस ओत गोये; तेबी तुमू माआ वोल फिरीत ने आये," यहोवा देवोअ ओंज वसन होय.✝ 12 "तियाहा काजे, ओ इस्राएल, आंय ताअरी एहेंज कोअहीं, तियाहा कोत आंय ओं काम ताअरी कोअहूं कोअहो, ओ इस्राएल, ताआ देवोअ सामने आवुहूं तियार ओत जा!"

13 "पाल, डोगोहो

आन वाराहा बोणावनारु

आन मोनवीइ मोनोअ विसार कोत आपनारु,

वेगीइ वेले आंदारो पाड़नारु,

जो धरतीइ उसा जागाम सालनारु होय;

तियाआज नाव सेनाआ यहोवा देव होय!"