दानियेल 5

बेलेतशेस्सरोअ पांगात

1 बेलशस्सर नावोअ राजा तियाआ हाजार आधिकाऱ्योंहों वोडी पांगात आप्यी, आन तियां आखा मिलीत दाराक्शाआ रोहो*5:1 दाराक्शाआ रोहो दाराक्शाआ होरु पिदू. 2 दाराक्शाआ रोहो पिता पिताम तियाआ आब्हे नबुकदनेस्सरे येरुसालेमोअ मंदिरोम रोत होना-सांदीइ जें बासने काड्येते तें लेत आवे तेहें बेलशस्सरे आदेश आप्यु, आन राजा आन तियाआ आधिकारी, आन राण्यी आन तियीइ साकऱ्यी नेहें मिलीत तियां बासनोम रोत पित सेके. 3 ताहां जें होनाआ बासने येरुसालेमोमेहें देवोअ मंदिरोम रोत काड्येते, तें बासने तिहीं लेतावये; आन राजान तियाआ आखा आधिकारी, राण्यीन तियींइं साकऱ्यी नेहें आखे मिलीत तियां बासनोमेहें पिने वोल्ये. 4 ते दाराक्शाआ रोहो पित कोइत होनाआ, सांदीइ, इसत्लेए, लोड़ाआ, कादुउ, आन डोणोअ देवताआ स्तुती कोअया कोअतेते.

5 तेताजमेहें माहुंउं आथोअ होसर्‍यीइ ईंगाअठ्यी निहीत कोइत कोंदिलोअ सामने राजवाड़ाआ सुनो हारल्या पितड़ापोअ किवानीइ लेखी वोल्यी; आन जो आथ लेखतुतो तो भाग राजाहा एतुज नजरे पोड़्यू. 6 तियाहा देखीत राजा बित गोयु, आन तो मोनाआ मोनोम काबरात गोयु, आन तियाआ कंबरेए नोहे डिल्ले ओत गोये, आन तियाआ टोसणे कापी कापीइ एकमेकाहा तेड़काए वोल्ये. 7 ताहरुउ राजा जाअखीलीही जोरे आअड़ीत कोइत जाणकारोहों, खास्द्याहां आन बिहीरा भविश्य कोनाराहां हादाड़ीलोअ आदेश आप्यु. जाहां बाबेलवाला जाणकार तियाआ जागे आया, तेहेलाम राजा तियांहां कोनु वोल्यु, "जों कोडो फोलो लेखल्यो होय याहा वासीत कोइत याआ अर्थ माहूं समजाड़े, तियाहा आंय जामण्या रंगोअ साअको आपीहीं, आन तियाआ गोलामेहें होनाआ हाकल पोवाड़ीहीं; आन माआं राज्यामेहें तिसरु तोज राज कोए." 8 ताहराआ राजाआ आखा जाणकार माटी मायते आया, पोन तिया लेख्याहा ने वासीत सेका आन ने राजाहा तियाआ अर्थ समजाड़ीत सेका. 9 तिहींइंरी बेलशस्सर राजा जाअखीलुहू बित गोयु आन काबराकाबर ओत गोयु; आन तियाआ आधिकारी बी फिकरेम पोड़ीत गोया.

10 राजा आन आधिकाऱ्योंअ गोठी उनाइत कोइत, राणी रोटू खाअलोअ कोअमेहें आयीन कोनी वोल्यी, "राजा, तू हादाफल जिवतु रोअहूं जोवे! ताआ जिव एवडू मा पाड़ीत लेही आन नाराज मा ओवीही. 11 ताआ राज्यामेहें दानियेल नावोअ एक माटी होय जियाआ नाव ताआ आब्हे बेलतशस्सर मिक्योतो. तियामेहें पवित्र देवहोंअ आत्मा रोतीही, आन तिया राजाआ दिहोमेहें तियामेहें उजालो, हुशारी आन देवहोंअ हारकी बुद्दी सापड़्यी. नबुकदनेस्सर राजा, ताआ आब्हू जो राजा ओतु, तिये तियाहा आखा जाणकारोओन, बोड़वाआन, खास्द्याआं, आन बिहीरा भविश्य कोत आपनाराआ मुख्य ठरव्युतो, 12 काहाके तियामेहें हाजाम हाजु आत्मा, हान, समजदारी, होपनाआ अर्थ कोअलाआ, दोड़ाअली गोठी उखरीत काडीइलोअ आन सोंवसु दुर कोइलाअ सेक्ती सापड़्यी. ताहरोअ जियाआ नाव राजे बेलतशस्सर कोत मिक्यतो तिया दानियेलोहो हादी द्या, आन तो या लेख्याआ अर्थ कोत आपे."

लेख्याआ अर्थ कोत आपीइलो

13 ताहां दानिएलोहो राजाअ सामने मायते हाद्यु. राजा दानियेलोहो फुसू वोल्यु, "दानियेल, जो माआं आब्हू नबुकदनेस्सर राजा यहुदा देसोम रोत लेतायू तियां यहुदी गुलामोमेऱ्युउ तु होय के? 14 आंय ताआ बाप्तिमेहें उनाअयुहू के देवहोंअ आत्मा तामेहें रोतीही; आन बुद्दी, समजदारी, आन हाजाम हाजी ओकल तामेहें रोहे. 15 पाल, ओं लेखल्यो होय याहा वासे आन याआ अर्थ माहूं कोतापे तेहें काजे ओमे जाणकार, बोड़वा माटी माआं सामने हादाअयाते, पोन ते यी गोठीइ अर्थ ने समजाड़ीत सेक्या. 16 पोन आंय ताआ बाप्तिमेहें उनाअयुहू के दानियेल निकाअली गोठी फोड़ीत कोत सेकेहे. तियाहा काजे ओमे जर तु या लेख्याहा वासीत सेकही आन याआ अर्थ बी माहूं समजाड़ीत सेकही, ताहां ताहूं जामण्या रंगोअ साअको, आन ताआ गोलाम होनाआं हाकल पोवाड़ीहीं, आन माआं राज्यामेहें तिसरु तुज राज कोअही."

17 दानियेले राजाहा कोयो, "ताआ भेट ताजपोअ रोअहूं दे; आन जे भेट तु आपनारु होय, ते एखाहा आपजी; पोन ए लेखल्यी गोठी आंय राजाहा कोत आपीहीं, आन याआ अर्थ बी आंय ताहूं समजाड़ीहीं.

18 "राजा, वोडाम वोडे देवे ताआ आब्हा नबुकदनेस्सरोहो राज्य, वोडाय, मानपान, आन सालती आप्यीते; 19 आन तियी वोडायी वाअहीं जे देवे तियाहा आप्यीते, देसोदेसोअ, राज्या राज्याआ आखे माअहें, आन जुदी जुदी बाशा गोगनारे तियाआ सामने थुरथुर कापतेते; जियाहा माइलोअ ओय तियाहा तो माईं देतुतो, आन जिवतो मिकीइलो ओय, तियाहा जिवतो मिकतुतो; जियाहा उसो कोइलो ओय तियाहा उसो कोअतुतो, आन जियाहा पाड़ीइलो ओय तियाहा पाड़ी देतुतो. 20 पोन जेहेलाम तियाआ मोन फुगीत उठ्यो, आन तियाआ आत्मा एतीही कठीण ओत गोयी के तो वोडाय कोउ वोल्यु, तेहेलाम तियाहा तियाआ राजगादीपोअ रोत उतारी देदू, आन तियाआ सालती आरवी देदी; 21 तियाहा मोनव्योम रोत काडी देदू, आन तियाआ मोन जनवारोअ होसर्‍योअ ओत गोयो, आन तो रान गोदड़ाअरी रोयू; तो बोलदोअ होस सारु सोऱ्यू, आन तियाआ डिल जुगोमेर्‍याअ साकलावाअहीं पिग्या कोअतोतो, ताहां तिये जाइंत ने लेदो के वोडाम वोडू देव मोनव्योअ राज्याम राज कोअहे आन जियाहा तिया पदोपोअ मिकीइलाअ ओय तियाहा मिकेहे."

22 "तेबी, बेलशस्सर, तु जो तियाआ बेटुह्हू होय, आन ओं आखो ताहूं मुंदू ओतो, तेबी ताआ मोन नम्र ने ओवो. 23 गाठ्योअ तुमे होरगाआ मालख्योअ विरुद्दाम मुन्को उसो कोइत तियाआ कोअमेऱ्येए बासने मागाड़ीत कोइत ताआ सामने मिकीत लेवाड़्ये, आन ताआ मुख्याहान, राण्यीहीं, आन तियींइं साकऱ्यीहीं नेहें आरी लेत कोइत तुमे तियांमेहें दाराक्शाआ रोहो पिदू; आन होनान-सांदीइ, इसत्लेए आन कादुउ, आन लोड़ाआन डोणोअ देवता, जें नाहां पालते, नाहां उनाअतेन नाहां की जांअते, तियांआं स्तुती कोअयी. पोन जियाआ आथोमेहें ताआ जिव होय, आन जियाआ ताबामेहें ताआ इंडीइलो-फिरीइलोअ होय, तिया देवोअ तुमे मानपान ने कोअयू. 24 तिहींज वाअहीं ओ आथोअ एक भाग तियाअहेंज रोत प्रगट ओवुहू आन तें शब्दे लेखाअयेहे."

25 "जे शब्दे लेखाअयेहे ते एं होय: मने, मने, तकेल, आन ऊपर्सीन.*5:25 मने, मने, तकेल, आन ऊपर्सीन. मने ताहां "गोणीइलो," तकेल ताहां तोलीइलो, आन ऊपर्सीन-वाटीइलो 26 या लेख्याआ अर्थ ओं होय: मने, मोन्ज्ये देवे ताआ राज्याआ दिही गोणीत कोइत तियाआ सेवट कोइ देदोहो. 27 तकेल, मोन्ज्ये तु समजीत ले एका ताराजाम तोलाअयु आन ओलवू निहींयुहू. 28 परेस, मोन्ज्ये ताआ राज्य वाटीत कोइत मादीही आन पारसी माअहुंहूं आपी देवाअयोहो."

29 ताहरुउ बेलशस्सरे आदेश आप्यु, आन दानियेलोहो जामण्या रंगोअ साअको आन याआ गोलामेहें होनाअ हाकल पोवाड़्यी; आन वाजवाल्यो तियाआ बाप्तिमेहें आअड़ीत कोयो के, "राज्यामेहें तिसरु मुख्यू दानियेलुज राज कोए." 30 तेदिहींज राती खास्द्याआं राजा बेलशस्सरोहो माइत टाक्यू, 31 आन तिहींइं फासाड़ी दारा जो मादी ओतू आन बाहासाट वोरह्योअ ओतु तो राजगादीपोअ बोठू.