1 नबुकदनेस्सर राजे होनाआ एक मुर्ती बोणायी, ते साट आथ उसी आन सोव आथ पोली ओती. तिये मुर्तीही दुरा नावोअ बाबेलोअ सापड़ामेहें उबी कोअयी. 2 तियी मुर्तीइ थापनामेहें भाग लेय तेहें काजे नबुकदनेस्सर राजे आधिकार्‍योहों, मोंत्र्योहों, राज्यपालोहों, सल्लागारोहों, कारभार्‍योहों, न्यायाधिशोहों, जाणकारोहों आन पुरा राज्याआ वोडा-वोडा आधिकार्‍योहों हादाड़्या. 3 ताहां ते आधिकारी, मोंत्री, राज्यपाल, सल्लागार, कारभारी, न्यायाधिश, जाणकार आन पुरा राज्याआ आखा वोडा-वोडा आधिकारी टोलू वोल्या आन नबुकदनेस्सर राजाआ थापल्यी मुर्तीइ सामने उबा रोया. 4 ताहां राजाआ वोतीइ पुकारु फोड़नारे पुकारु फोड़्यू, "ओ आलांग आलांग राज्याआ जुदी-जुदी बाशावाला, कान द्या! तुमुहूं आगल्युउ ओ आदेश जोड़ेहे: 5 जेहेलाम तुमू तुरी, पावी, तंबिवरो, सितार*, पेपारो, आक्खी जातीइ वाजाआ आवाज उनाअहा, तेहेलाजमेहें मांड्या पोड़ीत नबुकदनेस्सर राजाआ थोपाड़ल्यी होनाआ मुर्तीही वोंदजा. 6 आन जो कोडो मांड्या पोड़ीत ने वोंदे तो तेहेलाजमेहें तुदड़ीइत्ली आगीइ बाठीमेहें टाकी देवाय." 7 तिहीं वाअहीं तेहेलाम आखी जातीइ माअहें जेहेलुहू तुरी, पावी, तंबिवरो, सितार, पेपारो, आक्खी जातीइ वाजाआ आवाज उनाअये, आन उनाअताज वाआ देसोदेसोअ आन राज्याआ आलांग आलांग जातीइ माअहें आन जुदी जुदी बाशा गोगनारे माअहें खुट्या पोड़ीत तियी होनाआ मुर्तीही वोंद्यो, जे नबुकदनेस्सर राजे थोपाड़्यीते.

8 तेहेलाजमेहें थोड़ाक खास्द्या माटी राजाआ जागे गोया, आन यहुद्यांआं विरुद्दाम कुहूरायी वाअहीं साड़ी कोआ वोल्या. 9 ते नबुकदनेस्सर राजाहा कोना वोल्या, "राजा, तू हादाजलम जिवतू रोअहूं जोवे! 10 राजा, तुमे ते ओ आदेश आप्युहू के जों माहुंउं तुरी, पावी, तंबिवरो, सितार, पेपारो यां आखी जातीइ वाजाआ आवाज उनाय, तों खुट्या पोड़ीत तियी होनाआ मुर्तीही वोंदुहूं जोवे; 11 आन जों कोडो खुट्या पोड़ीत ने वोंदे, तों तुदड़ीइत्ली आगीइ बाठीम टाकी देवाय. 12 पाल राजा, शद्रक, मेशक, आन अबेदनगो नावोअ थोड़ाक यहुदी माटी होय, जियांहां तुमे बाबेल देसोअ कामोपोअ नेम्याहा. तियां माट्यो ताआ आदेशोअ किज विसार ने कोअयू; ते ताआ देवताआ भक्ती नाहां कोअता, आन जे होनाआ मुर्ती तुमे थोपाड़्यीही, तियीही नाहां वोंदता."

13 ताहरुउ नबुकदनेस्सर राजा खोतेए बाल्लायी आदेश आप्यु के शद्रक, मेशक, आन अबेदनगोहो लेतावा. ताहां तियां माट्योहो राजाआ सामने हुजुर कोअया. 14 नबुकदनेस्सर राजे तियांहां फुश्यो, "शद्रक, मेशक, आन अबेदनगो, तुमू माआं देवताआ भक्ती नाहां कोअता, आन माआं थोपाड़ल्यी मुर्तीही नाहां वोंदता, ताहां केहें ओं तुमू मुद्दाम कोअताहा के? 15 ओमे जर तुमू तियार ओय, आन जेहेलाम तुरी, पावी, तंबिवरो, सितार, पेपारो यां आखी जातीइ वाजाआ आवाज उनाअहा, आन तेहेलामेहें मांड्या पोड़ीत माआ बोणावल्यी मुर्तीही वोंदहा, ताहां वासाअहा; आन जर तुमू ने वोंदहा ताहां तेहेलाजमेहें तुदड़ीइत्ली आगीइ बाठीमेहें टाकी देवाअहा; आन एहेलुहू कोड्लू देवता होय, जो तुमुहूं माआं आथोम रोत वासाड़ीत सेके?"

16 शद्रक, मेशक आन अबेदनगो यां तिया राजाहा कोयो, "राजा नबुकदनेस्सर, यी बाप्तिमेहें आमू ताआ सामने वासाओ एहलीही आमुहूं गरज नाहां हासवाअती. 17 आमाआं देव जियाआ आमू भक्ती कोअताहा तो आमुहूं तियी तुदड़ीइत्ली आगीइ बाठीम रोत बी वासाड़ीत सेकेहे; तेतोज नाहां राजा, पोन तो आमुहूं ताआ आथोम रोत बी सोड़वीत सेकेहे. 18 पोन जर ने बी वासाड़े, तेबी राजा ताहूं आमू कोत देताहा, के आमू ताआ देवताआ भक्ती ने कोअनारा, आन तुमे थोपाड़ल्यी होनाआ मुरतीही ने वोंदनारा."

19 ताहरीइ नबुकदनेस्सर राजाहा जुदी खोत लागी, आन तियाआ सोब खोतेवाअहीं रातणाआं ओत गोयी. आन राजा शद्रक, मेशक, अबेदनगोपोअ खिजवाअयू. आन तिये आदेश आप्यु के बाठी हांत भाग वादार तुदड़ावा. 20 ताहरुउ तियाआ सेयनिकोमेर्‍याआ मजबुत सेयनिकोहों राजे शद्रक, मेशक, अबेदनगोहो बांदीत कोइत यांहां तुदड़ीइत्ली आगीइ बाठीम टाकी देय तेहें आदेश आप्यू. 21 ताहरोअ यां तिनू माट्योहों तियांआं कुरतो, आंगड़े, पागड़ी आन आक्खे आंगड़ेन-हांगड़े बांदीत कोइत, तियी तुदड़ीइत्ली आगीइ बाठीमेहें टाकी देदा. 22 ते बाठी राजाआ कड़क आदेशोवाअहीं जुदी तुदड़ावी देदीते, तिहीं वाअहीं जे सेयनिक शद्रक, मेशक, अबेदनगोहो बांदीत कोइत आखल्या, ते सेयनिक बी आगीइ हेकेवाअहीं सुल्लाइत मोइत गोया, 23 आन तियीज तुदड़ीइत्ली आगीइ बाठीमेहें तिनू माट्योहो, शद्रक, मेशक, अबेदनगोहो बांदल्याज टाकी देदा.

24 ताहां नबुकदनेस्सर राजा बोगलाइत गोयुन उठीत बोठु, आन तियाआ मोंत्र्योहों फुसू वोल्यु, "केहें आपू यी आगीमेहें तिन माटी बांदीत कोइत ने टाक्याते के?"

तियें राजाहा उत्तर आप्यो, "होव राजा, हुदाअलीजे."

25 फाशोअ राजे कोयो, "पोन आंय शार माट्योहो आगीमेहें सुट्लाज फिरत्लाहा पालोहो, आन तियांआं डिल जाराक बी नाहां सुउंणाअयो; आन शोवथा माट्योअ अवतार देवोअ बेटाह्हाआ होसर्‍युउ होय."

26 ताहरुउ नबुकदनेस्सर राजा तियी तुदड़ीइत्ली आगीइ बाठीइ बाओअ जागे जात कोइत कोनु वोल्यू, "ए शद्रक, मेशक, अबेदनगो, ए वोडाम वोडा देवोअ सेवकहों, बारथे निहीत आवा!" ओं उनाइत कोइत शद्रक, मेशक, आन अबेदनगो आगीम रोत बारथे निहीत आवया. 27 जे तिहीं टोलु वोलीत रोयाते तियां कुन्ब्यों, आधिकार्‍यो, राज्यपाल, आन राजाआ मोंत्र्यो, तियां तिनू माट्योअहें पाल्यो, ताहां तियांआं डिलोम आगी वाअहीं डाजल्याआ वाहीं बी निशाणी ने सापड़्यी; आन तियांआं मुन्काआ एक सिंग्य बी नाहां सुउंणाअयो, आन तियांआं मोजे बी जेहेलेन तेहेलेज ओते, आन तियांआं डिलोपोऱ्योअ एक रुंग्हो बी ने सुल्लाअयो.

28 नबुकदनेस्सर राजा कोनु वोल्यू, "हाजू होय शद्रक, मेशक, आन अबेदनगोअ देव, जिये देवदूत मोकलीत कोइत तियाआ यां सेवकोहों वासाड़्या! काहाके तियां जुवानो राजाआ आदेश टालीत कोइत देवोपोअ भरीवसू मिक्यू, आन ओ विसार कोइत सोताआ डिल बी अर्पण कोअयो, के आमू आमाआं देवोहो सोड़ीत, बिहीरा देवताआ भक्ती नाहां कोअनारा, के वोंदनारा बी नाहां.

29 "तियाहा काजे ओमे आंय ओ आदेश काडोहो के देसोदेसोअ आखा माअहूं, आन जुदी जुदी बाशा गोगनारामेहें रोत जों कोडो शद्रक, मेशक, आन अबेदनगोअ देवोअ जाराक बी निंदा कोए, तियाआ पुकरान पुकरा कोआय, आन तियाआ कोअ उजाड़ी देवाय; काहाके एहेलुहू बिहीरु कोड्लुज देवता नाहां जो एहें कोइत वासाड़ीत सेके."

30 ताहरुउ राजा बाबेलोमेहें शद्रक, मेशक, आन अबेदनगोअ पद फाशोअ उसो कोअयो.