1 अश्वेरोशोअ पोर्‍यु दारा जो मादी ओतू, तो खास्द्याआं देसोपोअ राजा बोण्युतो. 2 तियाआ राज्याआ पेहला वोरह्योमेहें, आंय दानियेले सोका पुस्तकों वाअहीं समजीत लेदो के, यिर्मया भविश्यवक्ताहा यहोवा देवे आपल्या वसनोअ परमाणे थोड़ेक वोरह्ये सेकीत जाय तिहींइं फासाड़ी, मोन्ज्ये सत्तर वोरह्योंअ फासाड़ी येरुसालेमोअ उजड़ीइल्यी दशा पुरी ओत जाय. 3 ताहां आंय माआं सोब प्रभु देवोअ वोल कोइत प्रार्थना कोअयी, आन उपास कोइत पेंडीइ पोताआ आंगड़े पोवित, खाँओंम बोहीत विनंती कोअयी. 4 आंय माआं देव यहोवाहा एहेंकोइत प्रार्थना कोअयी आन पापोहो कबुल कोअयू, "प्रभु देवा, तु वोडाम वोडु आन मानपानोअ जोगुहू देव होय. तापोअ मेर कोअनाराअरी आन आदेश माननाराअरी तु ताआ शप्पत पुरी कोअहे आन दया कोअहे.

5 "आमू पाप कोअयू, लबाड़ी कोअयी, खाराब कामे कोअये, ताआ नाकार कोअयू, ताआ आदेश आन नियमोहों तोड़ी देदू. 6 ताआ सेवक जे भविश्यवक्ता ओता, ते आमाआं राजां, आधिकाऱ्यों, डायहां आन आखा माअहोंअरी ताआ नावसे गोठी कोअयी, तियांआं आमू ने उनाअया. 7 प्रभु, तु धर्मी होय, पोन आज आमुहूं लाजवाअहूं पोड़ेहे, मोन्जे येरुसालेमोम रोनारा आखा यहुद्याहां, जागेवाले, सेटेवाले आखा इस्राएलवाला माअहोंहों, तापोऱ्युउ विश्वास तोड़ल्यु कोत तियांहां वेरासेर कोइत टाक्येहे, ताआ विरुद्दाम खाराब कामे कोअल्ये कोत तियांहां लाजवाअहूं पोड़ेहे. 8 यहोवा देवा, आमू आमाआं राजाहां आधिकाऱ्योहों आन डायहान-होंअका ताआ विरुद्दाम पाप कोअयुहू, तियाहाकोत आमुहूं लाज आवेहे. 9 पोन यहोवा प्रभु, तु दयालू होय. जियां माअहूं खाराब कामे कोअये तेबी माफी आप्यी, आमू खोरीज ताआ विरुद्दाम काम कोअयोहो. 10 आमू ते आमाआं यहोवा देवोअ कायदू उनाइत कोइत बी ने मान्ये, जो तिये तियाआ सेवक भविश्यवक्ता वाअहीं कोत आप्युतो. 11 आखे इस्राएलवाले ताआ शिक्शण ने मान्ये; तियां आखा ताआ वोल सोब मुउड़ीत लेदी; तें ताआ गोठी ने उनाअये. तिहीं वाअहीं जे हाराप आन नियम देवोअ सेवक मोशेए कायदामेहें लेखाअया, ते हाराप आमापोअ आवित लागा; काहाके आमू तियाआ विरुद्दाम गुनू कोअयुहू. 12 तियाहाकोत तिये आमाआं आन पुडाऱ्योअ बाप्तिमेहें जें वसने कोयेते, तें तिये आमापोअ वोडी अड़सन लेतावित पुरे कोअये; जेहेलिही आफत येरुसालेमोपोअ पोड़्यीही, तेहलिही धरतीपोअ काज ने पोड़्यी. 13 जेहेलोहो मोशेए कायदामेहें लेख्योहो, तेहेंज कोइत ए आखी अड़सन आमापोअ आवीत पोड़्यी, तेबी आमू आमाआं देव यहोवाआ आगाड़ी आमाआं खाराब कामोंहों मानुहूं काजे तियार ने ओवे, आन ने ताआ खोरी गोठीपोअ ध्यान देदो. 14 तियाहाकोत यहोवा देवे सोसी-समजीत आमापोअ अड़सन टाक्यी; काहाके आमाआं देव यहोवा जेते कामे कोअहे तियां आखामेहें खोरु ठरेहे; पोन आमू तियाआ गोठी ने उनाअये.

15 "ओमे, आमाआं देवा, प्रभु, ताआ माअहोंहों मिसर देसोमेहें रोत, वोडी ताकतवाला आथोवाअहीं काडीत लेत आयू आन ताआ वोडो नाव कोअयो, जों आज जाआं नावलीइतेहे, पोन आमू पाप कोअयुहू आन खाराब कामे बी कोअयेहे. 16 प्रभु, आमाआं पाप आन आमाआं डायहांआं खाराब कामोंअ वाखरी आमाआं आसेपासेए आखे माअहें येरुसालेमोअ वोल ताआ माअहोंओं बदनामी कोअतेहे; तियाहा काजे तु ताआ आखा हाजा कामों वाअहीं ताआ खोत आन जलन ताआ सोका डोगोपोअ बोठ्ला ताआ होयर येरुसालेमोपोअ रोत काडीत ले. 17 आमाआं देवा, ताआ सेवकोअ प्रार्थना आन विनंती उनाइत कोइत, ताआ उजड़ीइल्या सोका जागापोअ ताआ मुखोअ उजालो सोमकाड़; ए प्रभु, ताआ नावोअ वाखरी ओं कोअ. 18 माआं देवा, आमाअहें कान दे, ताआ नजर आमाआं वोल कोअ, आमाआं उजड़ीइल्यी दशा आन तिया होयरोहो बी पाल जों ताआ कोवाअहे; काहाके आमू जे आगाड़ी विनंती कोअतेहे, आमू हाजे होय एहें कोत नाहां, पोन ताआ वोडी दयापोअ भरीवसू मिकीत कोइत कोअतेहे. 19 प्रभु, उनाइत ले; माआं प्रभु, पापोअ माफी आप; प्रभु, ध्यान मिकीत जो कोइलाआ होय तों कोअ, वाआ मा लागाड़ही, ए माआं देवा, ताआ होयर आन ताआ माअहें ताआज कोत ओलखाअतेहे; तियाहा कोत ताआ नावोअ वाखरी एहें कोअ."

20 "एहें कोइत आंय प्रार्थना कोअतुतो, आन माआं आन माआं इस्राएलवाला पाव्हीइलाआं पापोअ कबुली कोअतुज, आपाआ यहोवा देवोअ हुंबर तियाआ सोका डोगोअ काजे विनंती कोअतुतो, 21 ताहां तो माटी गाब्रीएल जियाहा आंय तियी वेले देख्यो जेहेलाम माहूं पेलुज दर्शन ओवोतो, तो जोरे जोरे उडीत माआ जागे आयू, हांस्तीइ वेले गाराहा कोइलोअ वेले माहूं टेक्यु; माहूं समजाड़ीत गोठी कोउ वोल्यु. 22 तिये माहूं कोयो, ‘ए दानियेल, आंय ताहूं बुद्दी आन समज आपीइलो काजे निहींत आयुहू. 23 जेहेलाम तु विनंती कोइलाअ सुरुवात कोअयी, ताहांज आदेश जोड़्यू, तियाहा कोत आंय ताहूं कोअलोअ काजे आयुहू; काहाके तु मेरालु ठर्‍युहू; तियाहा कोत तु तियी गोठीही समजीत ले आन दर्शनोअ गोठीइ अर्थ जाईंत ले.’"

24 "ताआ माअहें आन ताआ सोका होयरोअ काजे सत्तर आठीवड़ा ठरवाअयाहा, काहाके तियामेहें तियांआं सेवट जाआं पाप कोइलाआ आन खाराब काम कोइलाआ सोड़ी देअहूं जोवे, आन हादाफल्योअ सतीपण प्रगट ओवुहूं जोवे; आन दर्शनोअ गोठी पोअ आन भविश्यवाणी पोअ सिक्कू लागुहूं जोवे, आन सोकाम सोकाआ अभिशेक कोअहूं जोवे. 25 तियाहा कोत ओं जाईंत आन समजीत ले, काहाके येरुसालेमोहों फाशोअ बोहाड़ीइलोअ आदेश निहींइलो वाअहीं अभिशेक कोअल्या* मुख्याआ वेले जाआं हांत आठीवड़ा सेके. तिहीं रोत बाहासाट आठीवड़ा सेके, तेहेलाम सोवकड़ी आन खायारान-हायारा तिया होयरोहो फाशोअ तारासोअ दिहोम बोहाड़े. 26 ते बाहासाट आठीवड़ा सेकीत जाय, तेहेलाम तिया देवोअ निवड़ीइल्या माट्योहो माइत टाके; पोन किज ने आथ लागे; आन बिहीरा आवनारा मुख्याआ माअहें होयर आन सोका जागाहा आरवीत देय, आन तिया मुख्याआ सेवट फोला खाडाआ होस ओवे; तेबी तियाआ सेवट जाआं लड़ायी ओवती रोय; काहाके तियाहा उजाड़ीइलो नक्की ठरीत गोयोहो. 27 तो मुख्यू एका आठीवड़ाआ काजे वारुज जोओंअरी कड़क शप्पत खाय, पोन आरदाज आठीवड़ा सेके तेहेलाम तो अर्पण आन गाराहा कोइलाआ बोंद कोए; ताहां उजाड़नारी सिसड़ाअली वस्तू देखाय आन ठरल्यी गोठ पुरी ओवे ताअहूं जाआं उजाड़नारापोअ देवोअ खोत रोय."