1 Miye mdaa muongoezi nakuandikia mbuyangu Gayo nikukundisae kwei.

2 Mbuyangu nikukundisae, naombeza kuwa uendee vitana kwa yose mwe wekazi wako. Nakuombea mwii wako uwe vitana, uku ukiendeeya vitana mwe uhamwe wako na Muungu mwe muye. 3 Nekhiwa na nyemi muno, wamwe wa wandugu wekubuaho aha wanitamwiiza kuwa waendeeya kutongea ukwei na kuwa misi yose wekaa mwe ukwei. 4 Khahana kintu kinitamwiizacho muno kusima kutegeeza kuwa wana wangu waendeeya kwekaa mwe ukwei.

5 Mbuyangu wee ni mzumiwa mkwei kwa yada uyagosoayo kwa wanduguzo, etiho ni wageni kwako. 6 Ndugu awo wawagombeka zumwezumwe da wantu wamzumiiyao Klistu wa aha mbui ya ukundiso wako. Nakuombeza muno uwaambiize waendee na ntambo yao inga Muungu akundavyo. 7 Kwaviya wavoka ntambo yao kwaajii ya ndima ya Klistu kwesiho uwambiizi wowose kulawa kwa wantu wesaokumzumiiya Klistu. 8 Naho swie wantu timzumiiyao Klistu takundigwa kuwaambiiza wantu awa ili tigosoe ndima hamwe nao kwaajii ya ukwei.

9 Nee khiandika bauwa njihi kwa ido zumwezumwe da wantu wamzumiiyao Klistu, akini Diotilefe uyo akundae kuwa mgookezi wao, khakunda katu kunitegeeza. 10 Aho nendahoneze nendaniike pwii mbui zose agosoazo, mbui za ufyaimi atigombekazo na uhokho agombekao kuusu swie, viyaviya yee aemea kuwahokea wandugu zetu wekuwao mwe ntambo na kuwakindia wantu watuhu wakundao kuwahokea na ageeza kuwaguusa wahauke mwe zumwezumwe da wantu wamzumiiyao Klistu.

11 Mbuyangu Gayo, wesekutongea dodose da ufyaimi iya dekuwado dedi. Mntu yoyose agosoaye yedi uyo ni wa Muungu, akini agosoaye ya ufyaimi uyo khammanya Muungu.

12 Kiya mntu amtogoa Demetilio kwa yada matana agosoayo, na ndima zakwe zaonyesha kuwa ni mntu yedi, swie naswi tamgombekea vitana, wee nawe wamanya kuwa tigombekacho ni kwei.

13 Ninazo mbui nyingi za kuwagombeka, akini khikunda kukuandikia mwe bauwa. 14 Nakauwiiya kukuvuiya kinyio na aho tendatitamwiiye. 15 Nakuombea kwa Muungu uwe na uivanisi, na wambuya wako wa aha Efeso wakuugusa na wee wauguse wambuya wetu wose wauko kiya yumwe yee ikedu.