1 Miye mdaa muongoezi.

Nakuandikia wee mmaa mwekusagulwa na Muungu hamwe na wanao niwakundisao muno. Khio miye ikedu niwakundisae, naho na wose waumanyao uda ukwei wawakundisa nywie, 2 kwaajii ya iyo kwei ikaayo umo mwetu, nayo yendaiwe hamwe na swie misi yose.

3 Naho Muungu Tate na Mwana wakwe Yesu Klistu watipatie wedi na mbazi na uivanisi swie ambao taubasa ukwei na ukundiso.

4 Khiwa na nyemi muno kuona wamwe wa wanao wekaa mwe ukwei inga Tate Muungu ekutugombekavyo. 5 Na isasa mmaa nakuomba, khiyo kuwa nakuandikia mwiko mhya, ni uda tekuwao nawo kulawa aho bosi, ugombekao tikundisane. 6 Ukundiso mana yakwe ni kwekaa kwa kutoza miko yakwe Muungu. Mwiko mwekuutegeezao kulawa aho bosi nee unu, mwakundigwa nyose kwekaa mwe ukundiso.

7 Watiizi wangi walawiiya mwe inusi, wantu ambao khawazumiiya kuwa Yesu Klistu keza kwetu, mwe mwii wa mntu. Mntu atamwiiyae ivyo ni mtiizi na ahigana na Klistu. 8 Naho ekaeni ahe na awo, msekweza mkaza bue ndima yenu mwekuwayo mwaigosoa kwaajii ya Muungu, iya mdahe kwekhigwa funge yenu yekuiganiayo kulawa kwa Muungu.

9 Esayekuyatoza na kwekaa mwe mahinyo ya Klistu, iya ayabadaye, khana Muungu. Akini aendeeyae kutongea mahinyo ayo anae Tate na Mwana. 10 Naho inga mntu akeza kwena, kwesaho kuwahinya mahinyo ayo, msekumhokea nyumbani mwenu, naho msekumuugusa inga mntu amzumiiaye Klistu mwezwenu. 11 Kwaviya mntu yoyose amuugusaye ivyo mntu uyo, awa hamwe naye mwe ntendwa zakwe fyaimi.

12 Nina mangi yakuwagombeka, akini khikunda kuandika ayo mwe bauwa. Iya nakauwiiya kweza kwenu kuwavuiya na titamwiiye tendaho tionane, ili tiwe na nyemi muno.

13 Uku neiko wana wa umbudo mwekusagulwa ni Muungu, wakuugusa.