1 Kiya mntu amzumiiaye kuwa Yesu nee Klistu, uyo ni mwana wa Muungu, naho kiya amkundisae tate, viyaviya amkundisa mwana wa uyo tate. 2 Kwa kumkundisa Muungu na kutongea miko yakwe, nee timanyavyo kuwa tawakundisa wana wa Muungu. 3 Kwaviya kumkundisa Muungu ni kutongea miko yakwe nahodu miko yakwe nimihufu, 4 kwaviya kiya mwekuwa mwana wa Muungu ana udaho wa kuvota mavigaviga ya inusi na mavigaviga ayo tayavota kwa kuzumiiya kwetu. 5 Ivi ni ndai adahae kuvota mavigaviga ya mwe inusi? Ni yuda azumiiaye kuwa Yesu ni Mwana wa Muungu.

6 Muungu katimanyisa kuwa Yesu Klistu ni mwana wa Muungu hada ekubatizwaho kwa mazi. Kagubulwa na Muungu kwa kubatiizwa na mazi na kwetiiya phome yakwe he mhamba, na Muye wa Muungu nee aonyeshae ayo kwaviya Muye ni kwei. 7 Ziaho sia ntatu ambazo zatitenda timanye kuwa Yesu kalawa kwa Muungu, 8 Muye wa Muungu na mazi na phome, awa wose watatu wagombeka mbui idaida kuwa Yesu kalawa kwa Muungu. 9 Tawazumiiya wantu wagombekaho mbui yekuwayo kwei, akini kiya agombekacho Muungu ni kikuu muno, na ivi nee vyeivyo Muungu ekutigombekavyo, nee katigombeka ukwei mwe mbui ya Mwanawe. 10 Kiya mntu amzumiiyae Mwana wa Muungu anayo iyo kwei ekutigombekayo, akini wantu wesaokumzumiiya Muungu, wamtenda kuwa Muungu ni mhokho, kwaviya khawazumiiya kiya ambacho Muungu katigombeka mwe mbui ya Mwanawe. 11 Iki nee ekutigombekacho Muungu, Muungu nee katekha ugima wa misi yose kwesiho kisiikizi na ugima uwo umo kwa Mwanawe. 12 Mntu yoyose mwekumzumiiya Mwana wa Muungu ana ugima uwo wa misi yose kwesiho kisiikizi, na yoyose esayekumzumiiya Mwana wa Muungu khana ugima uwo wa misi yose kwesiho kisiikizi.

13 Nawaandikia nywie mumzumiiyao Mwana wa Muungu ili mdahe kumanya kuwa mnao ugima wa misi yose kwesiho kisiikizi. 14 Unu nee utintimavu tekuwao nao hemeso ya Muungu, tikaombeza kintu chochose inga akundavyo yee, atitegeeza. 15 Ikawa tamanya kuwa atitegeeza kisingi timvikiaho, aho tamanya kuwa atekha yada timuombezayo.

16 Ikawa mntu yoyose anamwona mweziwe agosoa mavigaviga ambayo khayamuika hae na Muungu misi yose kwesiho kisiikizi, amvikie kwa Muungu nae Muungu endaamwekhe ugima. Nagombeka ivyo kwa wada ambao wagosoa mavigaviga inga ayo du, akini kuna mavigaviga ambayo yamuika hae mntu na Muungu misi yose kwesiho kisiikizi, Miye khigombeka amvikie mweziwe kwa mavigaviga ayo. 17 Kugosoa dodose dekuemewado na Muungu ni mavigaviga, akini kuna mavigaviga ambayo khayamuika hae mntu na Muungu misi yose kwesiho kisiikizi.

18 Tamanya kuwa kiya mwekuwa mwana wa Muungu khagosoa mavigaviga, kwaajii Mwana wa Muungu amuinda na yuda Ibiisi khadaha kumgosoeya dodose.

19 Swie tamanya kuwa ni wana wa Muungu, akini wantu watuhu wose ambao khawamtegeeza Muungu, waongoewa ni Ibiisi.

20 Naho tamanya kuwa Mwana wa Muungu keza, akatekha umanyi ili timmanye Muungu wa kwei naho tekae mwe uhamwe na Muungu wa kwei kwaviya tina uhamwe na Mwanawe Yesu Klistu. Uyu nee Muungu wa kwei na nee ugima wa misi yose kwesiho kisiikizi.

21 Ivyo wanangu niwakundisao, mwekae hae kuivika miungu ya uhokho.