1 Wambuya zangu mwesekumzumiiya kiya mntu akagombeka aongoewa na Muye wa Muungu, akini mgeezeni muone inga mntu uyo kwei aongoewa na Muye wa Muungu hambu khivyo, kwaajii waoni wangi wa uhokho waaho mwe inusi. 2 Inu nee sia ya kumanya inga mntu uyo aongoewa na Muye wa Muungu, kiya mntu egombekae mwenye kuwa Yesu Klistu keza mwe inusi akawa inga mntu, mntu uyo aongoewa na Muye wa Muungu. 3 Akini mntu yoyose mwesaekumzumiya Yesu, khaongoewa na Muye wa Muungu. Mntu uyo ana muye wa kuhigana na Klistu. Na nywie mtegeeza kae kuwa mhigana na Klistu eza, na isasa keza kae mwe inusi.

4 Akini nywie wana, ni wana wa Muungu, naho muwavota kae aho waoni wa uhokho. Kwaviya uyo Muye ekaae umo mwenu ana udaho kusima muye ekaae umo mwa wantu wesaokumzumiiya Muungu. 5 Waoni awo ni wantu wa mwe inusi, wagombeka mbui za mwe inusi na wantu wa mwe inusi wesaokumzumiiya Muungu wawategeeza. 6 Akini swie ni wantu wa Muungu. Mntu ekuwaye wa Muungu atitegeeza, akini mntu esaekuwa wa Muungu khatitegeeza. Aho kwa sia iyo tadaha kubukhua kugombeka uyo ni Muye wa kwei na uyo ni muye wa uhokho.

7 Wambuya zangu tikundisane, kwaviya ukundiso walawa kwa Muungu. Kiya mntu mwekuwa na ukundiso ni mwana wa Muungu, naho ammanya Muungu. 8 Mntu esayekuwa na ukundiso khammanya Muungu, kwaviya Muungu ni ukundiso. 9 Muungu kaonyesha ukundiso wakwe kwetu, kwa kumuagiiya Mwanawe wa ikedu eze mwe inusi ili tiwe na ugima kwembokea yee. 10 Unu nee ukundiso weivyo, swie khio tekuvokao kumkundisa Muungu, iya yee nee katikundisa ata akamlavya Mwanawe awe ntambiko ya kuekewa mavigaviga yetu.

11 Wambuya zangu ikawa Muungu nee katikundisa ivi, na swie naswi takundigwa kukundisana. 12 Khahana mntu yoyose mwekumuona Muungu katu, akini inga tikikundisana Muungu ekaa umu mwetu na ukundiso wakwe watitenda tiwakundise watuhu inga atikundisavyo.

13 Tamanya kuwa tekaa umo mwake, Muungu nae ekaa umu mwetu kwaviya yee katekha Muye wakwe. 14 Swie tiona na kuwamba watuhu kuwa Tate kamuagiiya Mwanawe, atende Mwohozi wa wantu wa mwe inusi yose. 15 Kiya mntu agombekae na kuzumiiya kuwa Yesu ni Mwana wa Muungu, Muungu ekaa mwe uhamwe na mntu uyo na mntu uyo ekaa mwe uhamwe na Muungu. 16 Aho, swie tamanya na tazumiiya kuwa Muungu atikundisa.

Muungu ni ukundiso, na kiya mntu ekaae mwe ukundiso ekaa mwe uhamwe na Muungu, na Muungu ekaa mwe uhamwe na mntu uyo. 17 Kwa sia iyo, Muungu aiganiza ukundiso wakwe kwetu, ili tiwe watintimavu mwe msi uda wa kuamuiiwa. Kwaviya wekazi wetu mwe inusi inu, waigana na ambavyo Yesu ekuwavyo akekaa. 18 Mwe ukundiso khahana kuogoha, ukundiso wa kwei wausa kuogoha kose, mntu yoyose aogohaye, ukundiso wa Muungu khaumo umo mwakwe, kwaviya mntu aogohaye endaamuiwe.

19 Swie tina ukundiso kwaajii Muungu nee kavoka kutikundisa. 20 Mntu akagombeka kuwa amkundisa Muungu, akini amkima mweziwe, mntu uyo ni mhokho. Kwaviya mntu esayekumkundisa mweziwe ambae amuona, khadaha kumkundisa Muungu ambae khamuona. 21 Unu nee mwiko ekutekhao Klistu, amkundisae Muungu viyaviya akundigwa kumkundisa mweziwe.