1 Wanangu nawaandikia mbui izi, ili mwesekugosoa mavigaviga, akini ikalawiya mntu akagosoa mavigaviga tinaye yumwe ativikia kwa Tate, nee Yesu Klistu ekuzumiwaye na Muungu. 2 Yee Klistu nee ntambiko ya kuusia mavigaviga yetu, naho khio kwa mavigaviga yetu du, iya viyaviya kwa mavigaviga ya wantu wose wa mwe inusi.

3 Naho tadaha kugombeka kwei muno tammanya Muungu inga tikatoza miko yakwe. 4 Mntu akagombeka kuwa ammanya Muungu, akini khatozeeza miko yakwe, mntu uyo ni mhokho naho khaumanya ukwei. 5 Akini mntu yoyose ategeezaye na kugosoa Mbui ya Muungu, uyo nee mwenye ukundiso wa kwei wa Muungu umo mwakwe. Tadaha kumanya kuwa tihamwe na Muungu, 6 mntu yoyose agombekae yuhamwe na Muungu, akundigwa kwekaa inga ekwekaavyo Klistu.

7 Wambuya zangu niwakundisao, mwiko unu tiwaandikiao khio mhya, ni mwiko udauda wa kae mwekuwao nawo kuvokea aho bosi. Mwiko uwo wa kae ni ida mbui mwekuitegeezayo kae. 8 Hetiho, mwiko unu niwaandikiayo ni mwiko mhya na ukwei wakwe waoneka mwe Klistu na viyaviya umo mwenu. Kwaviya kiza chausigwa, na ung'azi wa kwei uvoka kae kung'aa.

9 Mntu yoyose agombekae ekaa mwe ung'azi akini amkima mweziwe, mntu uyo yuke mwe kiza. 10 Mntu yoyose amkundisae mweziwe yumwe ung'azi naho khahana kintu chochose ndani mwake kidahacho kumtenda agosoe mavigaviga. 11 Akini yoyose amkimae mweziwe ekaa mwe kiza na enda mwe kiza, naho khamanya kuda aitako kwaviya kiza kimtenda asekudaha kuona aitaho.

12 Nawaandikia nywie wana, kwaviya muekewa mavigaviga yenu kwembokea zina da Yesu Klistu. 13 Nawaandikia nywie akina tate, kwaviya mwammanya Klistu ambae nekawa aho kuvokea bosi. Nawaandikia nywie wabwanga na wandee kwaviya mumvota yuda Ibiisi.

14 Nawaandikia nywie wana kwaajii mwammanya Tate. Nawaandikia nywie kina tate kwaviya mwammanya yuda ekuwaye kuvokea bosi. Nawaandikia nywie wabwanga na wandee, kwaviya mna nguvu na Mbui ya Muungu yekaa umo mwenu naho mumvota yuda Ibiisi.

15 Wesekukundisa mbui fyaimi zekuwazo mwe inusi inu, inga mntu akakundisa mbui fyaimi zekuwazo mwe inusi inu, aho khamkundisa Muungu Tate. 16 Mbui za ufyaimi za mwe inusi nee izi, khwiina fyaimi za mwii, na khwiina kwa yada mafyaimi tiyaonayo, na kwevunia vintu tekuwavyo navyo, aya yose khayalawa kwa Tate, iya yalawa mwe inusi. 17 Inusi hamwe na khwiina zose fyaimi zemboka, akini mntu agosoae akundado Muungu ekaa misi yose kwesiho kisiikizi.

18 Wanangu niwakundisao, kisiikizi kihehi! Mtegeeza kae kuwa mhigani wa Klistu eza, isasa wahigani wangi wa Klistu weza kae, neivyo tamanya tiho mwe kisingi cha kisiikizi. 19 Wantu awo walawa gatigati yetu akini khawekuwa na uhamwe na swie, nee mana watibada, ati newawa hamwe na swie, nee wekaa na swie. Akini wakahauka wakaita, ili ioneke pwii khawekuwa na uhamwe na swie katu.

20 Akini nywie mhokea Muye wa Muungu na Klistu, ivyo nywie nyose mwaumanya ukwei. 21 Nawaandikia khio kwaviya khammanya ukwei, iya kwaajii mwaumanya na viyaviya mwamanya kuwa khahana uhokho wowose wekuwaho mwe iyo kwei.

22 Mhokho ni ndai? Ni yuda aemeaye kuwa Yesu khio Klistu. Mntu inga uyo nee muhigana na Klistu, kwaviya amuemeya Tate na Mwana. 23 Mntu yoyose amuemeaye Mwana, viyaviya amuemeya Tate na yoyose amzumiyae Mwana, viyaviya amzumiya Tate.

24 Naho mbui ida mwekuitegeezayo kuvokea bosi na yekae mwe mioyo yenu. Inga mbui iyo mwekuitegeezayo kuvokea bosi ikekaa mwenu, aho mwendamwekae misi yose mwe uhamwe na Mwana na Tate. 25 Naho kiaga ekutekhacho swie nee iki, cha kuhokea ugima wa misi yose kwesiho kisiikizi.

26 Nawaandikia mbui izi, kuusu wada wantu wageezao kuwatiiya nywie. 27 Akini nywie mhokea Muye wa Muungu ekaae umo mwenu. Ivyo khamkunda kuhinywa na mntu yoyose. Kwaviya yee awahinya kiya kintu naho mahinyo yakwe ni ya kwei, naho khio ya uhokho, ivyo tozani mahinyo ya uyo Muye na kusigaa mwe uhamwe na Klistu.

28 Ivyo wanangu, endeeyani kuwa mwe uhamwe na Klistu, ili kisingi endahoauye vituhu tiwe na utintimavu, na tisekweza kwefisa kwa soni tendahotikintane. 29 Mwamanya kuwa misi yose Klistu nee kagosoa mbui zimtamizayo Muungu muno, viyaviya mmanye kuwa kiya mntu agosoae mbui zikundigwazo na Muungu, ni mwana wa Muungu.