1 Mamakhanyi viya Tate Muungu atikundisavyo muno, ata swie tetangwe wana wa Muungu! Naho kwei nee teivyo, nee mana wantu ambao khawamtegeeza na kugosoa yada akundayo Muungu khawatimanya inga swie ni wana wa Muungu, kwaviya khawammanya Muungu. 2 Wambuya zangu, isasa swie ni wana wa Muungu. Muungu khazati kutionyesha viya tendavyotiwe kisingi chezacho. Akini tamanya kuwa Klistu endahoeze vituhu, tendatiigane nae. Naho tendatimuone inga eivyo. 3 Kiya mntu mwenye kauwiyo idi mwe Klistu, aendeee kwesunta ili awe inga Klistu eivyo.

4 Mntu yoyose agosoaye mavigaviga, khategeeza miagiiyo kwaviya mavigaviga ni kutokutegeeza miagiiyo. 5 Mwamanya kuwa Klistu nee keza kutiusia mavigaviga yetu, mana yee khana mavigaviga yoyose. 6 Mntu yoyose mwekaa mwe uhamwe na Klistu khagosoa mavigaviga, akini kiya mntu agosoaye mavigaviga khamva naho khammanya Klistu ni ndai.

7 Wanangu msekuzumiya katu kutiiwa ni mntu yoyose. Mntu yoyose agosoaye mbui zikundigwazo na Muungu azumiwa na Muungu inga viya Klistu azumiwavyo na Muungu. 8 Akini kiya mntu agosoaye mavigaviga ni wa Shetani, kwaviya Shetani kawa kagosoa mavigaviga kuvokea aho bosi. Kwaajii iyo, Mwana wa Muungu nee keza mwe inusi kuidagamiza ndima ya Shetani.

9 Kiya mwekuwa mwana wa Muungu, khagosoa mavigaviga kwaviya ana khachu ya Muungu umo mwakwe, khadaha kugosoa mavigaviga kwaajii yee ni mwana wa Muungu. 10 Mntu yoyose esayekugosoa mbui ziya zikundigwazo na Muungu hambu esayekumkundisa mweziwe, uyo khio mwana wa Muungu. Kwa sia inu tadaha kumanya wana wa Muungu na wana wa Shetani.

11 Mbui mwekuitegeezayo kuvokea aho bosi, nee inu takundigwa kukundisana! 12 Tesekutenda inga Kaini kwa kuongoeewa na yuda Ibiisi akamkoma mvunawe. Kwambwai kamkoma? Kwaajii Kaini nekawa na ntendwa fyaimi, akini mvunawe nekawa na ntendwa zedi.

13 Isasa wandugu zangu mwesekuhondomaa inga wantu wa mwe inusi, wakawakima nywie. 14 Swie tamanya kuwa temboka kae kulawa mwe nguvu za ufe na kwengia mwe ugima, kwaajii tawakundisa wazumizi wezwetu. Mntu esaekuwa na ukundiso asigaa mwe nguvu za ufe. 15 Kiya amkimae mweziwe ni mkomaji, na nywie mwamanya kuwa mkomaji yoyose yuda khana ugima wa misi yose kwesiho kisiikizi. 16 Swie timanya ukundiso ni mbwai, kwaviya Klistu nee kalavya ugima wakwe kwaajii yetu. Viyaviya swie takundigwa tilavye ugima wetu kwaajii ya wantu watuhu. 17 Akini mntu akawa na vintu vingi vya inusi na amoona nduguye khana kintu na akaemea kumwambiiza mweziwe, adaha viivihi kugombeka kuwa amkundisa Muungu? 18 Wanangu niwakundisao, tesekukundisana kwa ntamwiizi du, iya tikundisane kwei kwa kugosoeyana yekuwayo yedi.

19 Tikakundisana ivyo, neivyo tadaha kumanya kuwa swie ni wantu tiutongeao ukwei, naho khatinatiwe na maatu hemeso ya Muungu. 20 Kwaviya ata inga mioyo yetu yatiamuiiya kuwa tina mavigaviga, tawa na uivanisi hemeso ya Muungu kwaajii tamanya Muungu ni mkuu kusima mioyo yetu naho amanya kiya kintu. 21 Wambuya inga mioyo yetu khaitiamuiiya kuwa tina mavigaviga, neivyo tadaha kuwa na utintimavu hemeso ya Muungu. 22 Naho tahokea kwakwe chochose tikiombezacho, kwaviya tatoza miko yakwe na kugosoa yamtamizayo. 23 Naho mwiko wakwe nee unu, kumzumiiya Mwanawe Yesu Klistu na kukundisana inga ekutiagiiavyo. 24 Mntu yoyose ategeezae na kugosoa viya miko ya Muungu ikundavyo, ekaa umo mwakwe Muungu, na yee Muungu ekaa umo mwakwe. Kwa sia ya Muye wa Muungu tekuhokeao kulawa kwa Muungu, tamanya kuwa Muungu ekaa umu mwetu.