1 Miye Yuda mndima wa Yesu Klistu na Yakobo ndugu yangu, nawandikia bauwa inu nywie mwekwetangwao na Muungu Tate na mkundiswao naye na kuwaika pheho kwaajii ya Yesu Klistu.

2 Namwombeza Muungu awaomee mbazi, na uivanisi na ukundiso.

3 Wambuya niwakundisao, kitamiwa muno kuwaandikia kuusu uohozi ambao taushiiki swie wose, akini kiona yakundigwa niwaandikie bauwa inu, kuwaombeza muno mgosoe kiya didahikanado kwevunia uzumizi ambao Muungu kawekha wantu wakwe maa mwenga kwa kisingi chose. 4 Nawaandikia bauwa inu, kwaajii kuna wantu watuhu ambao khawamtegeeza Muungu na wengiza kwa sii na kuwa hamwe na nywie. Wantu awa wahitua mbui ya wedi wa Muungu yetu ili wagosoe mavigaviga na kumuemea Yesu Klistu muongoezi mkuu, Zumbe yetu. Akini kuvokea aho kae iyandikwa kuwa wantu awa wendawaamuiwe.

5 Etiho mwamanya vitana ayo yose, nakunda kuwakumbusa kuwa Zumbe nee kawakomboa wantu wa Isilaeli kulawa mwe si ya Misili wekuwaho wasuumizwa, akini badae akawadagamiza wada wose ambao wekuemeao kumzumiiya. 6 Na kumbukani awo wandima wa uwanga kwa Muungu ambao waza uwongoezi wao. Nee wabada hantu hao ha kwekaa. Ivyo Zumbe kawaika mwe kiza na kuwazengeteza minyololo misi yose kwesiho kisiikizi adi aho wendaho waamuiwe msi wekuwao mkuu. 7 Kumbukani Sodoma na Gomola na mizi yekuwayo hehi nayo, wantu awo wagosoa inga wekugosoavyo wandima wa uwanga kwa Muungu, wagosoa ukianga na kubasa khwiina za mwii ambazo khaziigana na ambavyo Muungu ekuwaumbavyo, na Muungu akawekha sugusa ya moto wa misi yose kwesiho kisikiizi iwe hinyo kwa wantu wose.

8 Na ivyo wantu awa ambao khawamtegeeza Muungu waigana nao. Waota sozi, sozi izo zagea usama mii yao, waemea ukuu wa Muungu na kudumua viumbe vikuu ambavyo vyekuavyo uko uwanga kwa Muungu. 9 Ata Mikaeli mndima mkuu wa Muungu ekuhiganaho na ibiisi, na kutambaisana nae kwaajii ya mwii wa Musa khekugeeza kumuamuiya Ibiisi kwa kumdumua, iya kamgombeka ivi Zumbe mwenye na akuwakie. 10 Akini wantu wagombeka mafyaimi mbui wesazokuzimanya. Na mwe mbui ziya wamanyazo na kuyagosoa kwesiho kumanya inga wanyama wesaokuwa na akii na ayo nee yendayo yawadagamize. 11 Mbwii yao kwaviya waita mwe sia ya Kaini, na kutongea masa ya Balaamu kwesiho kwekindia kwaajii ya maiho, wao wendawadagamizwe mwe masa yao inga kola ekudagamizwavyo. 12 Wantu awo ni wabanasi mwe sikukhuu zenu za ukundiso, kuda khande kwa kwekauwa wowo wenye kwesiho soni, wowo ni inga mazunde yesayo na fua yapuuswayo ni pheho, mana yakwe khawana ukwei mwe wekazi wao, na wowo ni inga miti ambayo khaina matunda kisingi cha ubosi, na ing'olwa na kunyaa. 13 Wowo ni inga mawimbi makuu ya mazimshindo, ntendwa zao za soni zaambazika inga povu da mawimbi, waaho inga ntoondo zesazo kutuiya, zekuikwazo mwe kiza kikuu misi yose kwesiho kisiikizi.

14 Na Henoki, mntu wa mfungate bada ya Adamu kalavya mbui za uwoni uwanga ya awo, akamba kauwa, Zumbe Muungu endaeze na maelufu ya wandima wakwe wangi muno, 15 kuwaamuiiya wantu wose na kuwekha sugusa wose wesaokumtongea Muungu kwaajii ya ntendwa zao zose za ubanasi wekugosoazo kwesiho kumpatiiza Mungu na kwa mbui zao zose za ufyaimi wantu wagosoao mavigaviga wekumdumuao.

16 Wantu awa ni wada wang'ung'uzikao na kugombeka ufyaimi kwa wantu watuhu, wendao kwa kutongea khwiina zao za ufyaimi, wetogoa muno na kugombeka mbui za kuwatamiiza wantu ili wapate vintu kulawa kwa watuhu.

17 Iya nywie wambuya yakumbukeni yada mwekwembigwayo na aho kae na waagiiwa wa zumbe yetu Yesu Klistu, 18 kuwa kisingi cha kisikiizi wendawaweaho wantu wawabeao nywie, wantu watongeao khwiina zao za ufyaimi zihiganazo ni Muungu. 19 Wantu awo nee wada wawatendao mwesekwevana, na wamamaakhanya mbui za inusi, naho khawana Muye wa Muungu. 20 Akini nywie wambuya etintimazeni mwe uzumizi wenu ambao walawa kwa Muungu mwenye, vikani kwa udaho wa Muye wa Muungu. 21 Ekaeni mwe ukundiso wa Muungu na uku mkakauwiya kwa nyemi majaiwa ya Zumbe yetu Yesu Klistu, na kwa mbazi zakwe endaawekhe ugima wakwe wa misi yose kwesiho kisikiizi.

22 Wafiieni mbazi wada ambao wana maatu mwe kuzumiiya kwao, 23 watuhu waohoeni kulawa mwe moto wa uamuiiyo na watuhu muwafiie mbazi, akini mwekae meso na kuemea kugosoa ufyaimi wao wose.

24 Muungu nee adahae kuwainda mwesekweza kwaga na adaha kuwaeta hemeso yakwe mwe ukuu wakwe, mkawa na nyemi muno kwesiho ufyaimi wowose. 25 Yee nee Muungu ikedu Mwohozi yetu kwa sia ya Yesu Klistu Zumbe yetu. Atogolwe muno kwaviya yee ana ukuu na udaho na ugookezi kuvokea aho kae, isasa na misi yose kwesiho kisiikizi! Pepa.