1 Unu nee ugubuo wa Yesu Klistu ekwekhigwao na Muungu, ili awaonyeshe wandima wakwe mbui ziya ambazo zakundigwa zilawiiye ivi hehi. Naho Klistu akamwagiiya mndima wakwe wa uko uwanga kwa Muungu ili awegae ugubuo uwo kwa Yohana ekuwae mndima wakwe. 2 Naye Yohana kagombeka mbui zose ekuzionazo, Mbui izo ni uda ukwei ambao ugubulwa ni Yesu Klistu, ugubuo uwo nee Mbui ya Muungu. 3 Kajaiwa mntu yuda asomae mbui izi za uwoni na wajaiwa wada wategeezao na kutoza yekuandikwayo mwe kitabu iki, kwaviya kisingi cha mbui izi kihehi.

4 Miye Yohana nawaandikia nywie mazumwezumwe mfungate ya wantu wamzumiiyao Klistu ya uko mwe mzi wa Asia.

Wedi na uivanisi kulawa kwakwe yee mweaho, ekuwaye na ezae na kulawa kwa muye mfungate wekuwaho hemeso ya kigoda chakwe cha useuta, 5 na kulawa kwa Yesu Klistu ambae uyo misi yose agombeka Mbui ya kwei. Yee nee wabosi kuyuyuka kulawa kwa wekuuyao na nyuma na yee nee mgookezi wa Maseuta wose mwe inusi.

Yesu atikundisa na kwa ufe wakwe katiekea kulawa mwe mavigaviga, 6 viyaviya katitenda tiwe useuta wakwe na waviki wakwe timgosoee ndima Muungu Tati yakwe. Kwakwe Yesu Klistu uwe ukuu na udaho misi yose kwesiho kisiikizi! Pepa.

7 Kauwa! Eza mwe maangwi! Kiya mntu endaamwone, ata wada wekumtungao guha. Wantu wa si zose wendawatoe bwaimbo kwaajii yakwe. Haika! Pepa.

8 Zumbe Muungu mwenye udaho wose amba, "Miye ni Alfa na Omega yaani wa bosi na wakisiikizi mwe mbui zose, mweaho na ekuwaye na ezae."

9 Miye Yohana ndugu yenu ambae kwakuungana na Yesu, nawa hamwe na nywie he masuumizi mwe useuta wakwe na uzizimizi, miye neniwa mwe kisiwa kitangwacho Patimo, uko nee kigewa mwe kifungo kulawana na masa ya kubiikia Mbui Yedi ya Yesu Klistu. 10 Mwe msi wa kumvika Zumbe, nikavika mwe Muye wa Muungu, nikategeeza mgutio mkuu inga mgutio wa gunda he mgongo wangu. 11 Nee ugombeka, "Andika mwe kitabu yada uyaonayo, ukayegae kwa mazumwezumwe aya mfungate ya wantu wamzumiiyao Klistu, ambayo ni Efeso na Similina na Peligamo na Tiyatila na Salidi na Filadelifia na Laodikia."

12 Nee nahituka nikauwe ni ndai mwekugombeka na miye, nikaona vintu vyekugosolwavyo kwa zahabu vya kuikia taa mfungate. 13 Naho gatigati ya vintu vya kuikia taa, nee naona mntu inga Mwana wa Adamu, nekawa kavaa khanzu ilehayo na mkwiji wa zahabu ukawa ufungwa mwe kifua chakwe. 14 Fii zakwe nee zing'aa pee na meso yakwe yaka inga miale ya moto, 15 wayo zakwe inga shaba yekusuntwayo muno inga viya isuntwa mwe moto, na mgutio wakwe neuwa inga mgutio wa mazi mangi. 16 Mwe mkono wakwe wa kuume nekatoza ntoondo mfungate na mwe muomo wakwe ukalawiya uhamba wenye makai phande zose, cheni chakwe nee kikang'aa inga zuwa kai diwakado. 17 Nekumuonaho nikagwa he miundi yakwe inga ekuuyae na nyuma. Nee aniikia mkono wakwe wa kuume na kugombeka, "Usekuogoha! Miye ni wa bosi na wa kisikiizi." 18 Miye ni mgima! Nee kiuya na nyuma, akini isasa ni mgima misi yose kwesiho kisiikizi, naho nina udaho wa ufe na si ya wantu wekuuyao na nyuma. 19 Isasa andika mbui izi uzionazo, andika mbui zilawiyazo isasa na viyaviya andika mbui ziya zendazozilawiye kisingi chezacho. 20 Isasa nakunda kukugombeka ziya ntoondo mfungate wekuzionazo mwe mkono wangu wa kuume ni mbwai na vintu mfungate vya kuikia taa za zahabu ni mbwai, mana yakwe ni inu, ziya ntoondo mfungate ni wandima wa uko uwanga kwa Muungu wa mazumwezumwe mfungate ya wantu wamzumiiyao Klistu. Na viya vintu mfungate vyekugosolwavyo kwa zahabu vya kuikia taa ni mazumwezumwe mfungate ya wantu wamzumiiyao Klistu.