1 Nee namwona Mwanangoto atuwa umwe wa mahula mfungate, nikasikia yumwe wa wada viumbe wenye ugima wane akagombeka kwa mgutio inga wa tuntumo, "Soo!" 2 Nee nakauwa nikamwona falasi mwekung'aae, naho yuda akweae uyo falasi nekawa na uta naho kekhigwa ntaji ya useuta. Naye akalawa akawa kawavota wantu naye aendeea kuwavota.

3 Naho Mwanangoto akatuwa uda mhula wa kaidi, nee namsikia yuda kiumbe mwenye ugima wa kaidi akagombeka, "Soo!" 4 Akalawiiya falasi mtuhu mwekhundu muno na yuda akweae falasi kekhigwa paange khuu na udaho wa kutenda wantu wekae kwa khumbizi mwe inusi na wantu wakomane.

5 Naho Mwanangoto akatuwa mhula wa ntatu, nee namsikia yuda kiumbe mwenye ugima wa ntatu akagombeka, "Soo!" Nikakauwa nee namwona falasi ekuchutae, yuda akweae falasi nee katoza uzani wa kuhimia mwe mkono wakwe. 6 Nikategeeza inga mgutio ulawaho kwa wada viumbe wenye ugima wane ukagombeka, "Kibaba kimwe cha ngano kwa maiho ya msi umwe hamwe na vibaba vitatu vya shahili kwa hea mwenga. Akini wesekubananga mavuta wala divai!"

7 Mwanangoto akatuwa mhula wa nne, nee namsikia yuda kiumbe mwenye ugima wane akagombeka, "Soo!" 8 Nee nakauwa nikamwona falasi langi ya mazeu na zina da mkwea falasi uyo detangwa ufe na mwe si ya wekuuyao na nyuma nee wakawa wambasa he mgongo, nee wekhigwa udaho mwe lobo mwenga ya inusi, wawakome wantu kwa uhamba na saa na matamu na wanyama wakai mwe inusi.

9 Naho Mwanangoto akatuwa mhula wa shano, hada asi he ingo da kufukizia ubani nikaona muye za wada wekuchinjwao kwaajii ya kubiikia Mbui Yedi ya Muungu naho wazumia mbui yakwe. 10 Wakaiya kwa usungu na mgutio mkuu, "Wee Zumbe Mng'azi na mzumiiwa. Wendaugoje ata ini kuwaamuiiya wantu wekaao mwe inusi na kuihiza kwa kutikoma swiswi?" 11 Kiya yumwe wao akekhigwa khanzu yekung'aayo, naho wakagombekwa wagoje kwa kisingi kijihi kubua aho ntaazia ya wandima wezwao hamwe na ndugu zao wakundigwao wakomwe inga viya wekukomwavyo wowo.

12 Nee nakauwa, Mwanangoto ekutuwaho mhula wa mtandatu, nee kwalawiiya singisiko kuu, zuwa nedawa dichuta inga gwanda da gunia dekugosolwado na mazoya ya mbuzi, mweenge ukahituka ukawa mwekhundu inga phome. 13 Ntoondo za uko uwanga kwa Muungu nee zagwa uwanga mwe si inga matunda ya mkuyu yesayokutoga yagwavyo kisingi mti wakwe ukasingiswa na pheho. 14 Na uko uwanga kukatatuka phande mbii inga kaatasi yekuzengetwayo, kia muima na kia kisiwa vikausigwa hantu hakwe. 15 Nee maseuta wa mwe inusi na wakuu na waongoezi wa maasikai na wenye mai nyingi na wenye nguvu na kia mtumwa na wekuekewae wakefisa wowo wenye gatigati ya maiwe mwe miima. 16 Naho wakaigombeka miima hamwe na maiwe makhuu, "Tugwiiyeni, mkatufise hae na yuda ekaae mwe kigoda cha useuta na utifise hae na maya ya Mwanangoto. 17 Kwaviya msi mkuu wa maya ubuwa, ni ndai adahae kuigana?"