1 Naho Mwanangoto akatua mhula wa mfungate, uko uwanga kwa Muungu kukanyamaa myee kwa kisingi cha nusu saa. 2 Naho nee nawaona wada wandima mfungate wa uko uwanga kwa Muungu wagookao hemeso ya Muungu, wekhigwa magunda mfungate.

3 Mndima mtuhu wa uko uwanga kwa Muungu akabuwa, ekuwaye na chetezo cha zahabu akagooka he ingo da kulaviya ubani. Nee ekhigwa ubani mwingi alavye malavyo hamwe na maombezi ya wantu wa Muungu wose uwanga ya ingo da zahabu dekuwado hemeso ya kigoda cha useuta. 4 Uda mosi wa ubani nee wakwea uwanga, hamwe na maombezi ya wantu wa Muungu kulawa mwe mikono ya yuda mndima wa uko uwanga kwa Muungu ekugookae hemeso ya Muungu. 5 Naho yuda mndima wa uko uwanga kwa Muungu akadoa chetezo akakimemeeza moto wa ingo da kulaviya ubani, nee awasa mwe inusi, ukalawiya mgutio wa umbauwa na tuntumo na singisiko da inusi.

6 Aho, wada wandima mfungate wa uko uwanga kwa Muungu wenye magunda mfungate wakawa tayali kutoa magunda ayo.

7 Mndima wa bosi akatoa gunda dakwe, nee kwalawiya fua ya maiwe na moto vihanganywa na phome, nee vyatiiwa mwe si. Selusi mwenga mwe si nee ihya, fungu dimwe da miti nee dahya hamwe na mani mawisi yose nee yahya.

8 Mndima wa kaidi akatoa gunda dakwe, kintu inga muima mkuu wekuwakao moto kikaaswa mwe mazimshindo. Selusi mwenga ya mazimshindo ikahituka phome, 9 selusi mwenga ya viumbe mwe mazimshindo vikauya na nyuma, na selusi mwenga ya jahazi kuu, ikabanangwa.

10 Naho mndima wa ntatu wa uko uwanga kwa Muungu akatoa gunda dakwe. Ntoondo kuu ikaaka inga moto ikagwa na kutua uwanga ya selusi mwenga mwe mazigizigi ya mazi na soko za mazi. 11 Zina da ntoondo iyo ni "Usungu." Selusi mwenga ya mazi yakawa masungu, wantu wangi wakauya na nyuma kulawana na kudomea mazi ayo, kwaviya usungu utendesa.

12 Naho mndima wa nne wa uko uwanga kwa Muungu akatoa gunda dakwe. Nee Selusi mwenga ya zuwa, na selusi mwenga ya mweenge na selusi mwenga ya ntoondo, zikabada kulavya ung'azi. Ivyo selusi mwenga ya ung'azi nee yawa kiza. Selusi mwenga ya musi nee yawa kio.

13 Naho nikakauwa nikasikia mgutio wa mbizi akipuuka uwanga kutendesa, uku agombeka kwa mgutio mkuu, "Mwenda mpate suuba, mwenda mpate suuba wantu wekaao mwe inusi kisingi wandima watatu wa uko uwanga kwa Muungu wekusigaao wendahowatoe magunda yao!"