1 Yekwembokayo ayo, nee namwona mndima mtuhu wa uko uwanga kwa Muungu akaseeya kulawa uwanga kwa Muungu. Uyo mwenye udaho mkuu na inusi yose iyo yang'aa kwa ukuu wakwe. 2 Akalavya mgutio mkuu akagombeka, "Ugwa Babeli mzi mkuu ugwa! Isasa kutenda hantu wekaao mazaiko na muye mifyaimi, na hantu wekaao wadege wafyaimi na kusukiza. 3 Kwaviya wantu wa si zose wakolwa ni divai khai ya ukianga wakwe. Maseuta wa mwe inusi wagosoa ukianga nae, naho wachuuzi wa mwe inusi watenda kuwa wantu wenye vintu vingi kulawana na nguvu za khwiina zakwe zekutendesazo."

4 Naho nikategeeza mgutio mtuhu kulawa uko uwanga kwa Muungu ukagombeka,

"Mlawe mwakwe nywie wantu wangu!

Ili mwesekugosoa vintu vifyaimi, agosoavyo yee

Naho mwesekweza kuhokea sugusa, ambayo Muungu endaawekhe wantu awo.

5 Kwaviya mavigaviga yakwe yawa mangi muno,

Zimelundikana adi uko uwanga kwa Muungu

Naho Muungu yutayali kumwekha sugusa kwa ntendwa zakwe fyaimi.

6 Mgosoeni inga viya awagosoeavyo nywie,

Muhieni maa mbii kwa yada yose ekuwagosoeayo.

Mhanganyieni mwe kikombe divai khai maa mbii,

Kusima ida ekuwekheni nywie.

7 Mwekheni masuumizo na usungu kuigana na kwevunia kwakwe

Kuigana na kwekaa kwakwe kwa kukundisa mwenye

Kwaviya nee akagombeka mwe moyo wakwe, miye ni seuta wa kivyee

Miye khio mvyee mwekufiwa ni mgosi na khinanibwiiwe na usungu.

8 Kwaajii iyo masuumizo yendayampate msi umwe,

Utamu na mbazi na saa.

Endaokwe moto,

Kwaviya Zumbe Muungu mwenye kumuamua ana udaho."

9 Wada maseuta mwe inusi wekugosoao ukianga nae na kwekaa wekaisi wa kukundisa wenye, wendawaiye na kutoa bwaimbo kisingi wendaowaone mosi wa kuhya kwakwe. 10 Wagooka hae nae kwa kuogoha masuumizo yakwe, wakagombeka, "Wendauwone, wendauwone wee Babeli mzi mkuu umanyikanao muno na wenye nguvu! Kwa saa mwenga du uwamuiyo ukupata!"

11 Wachuuzi mwe si wendawaiye nakumtoeya bwaimbo, kwaviya khahana mntu mwekusigaae wakugua vintu vyao, 12 khahana wakugua maiwe ya zahabu na maiwe ya feza na maiwe ya yombe kuu na lulu. Gwanda da kitani na gwanda da zambalau na gwanda za halili na gwanda nyekhundu. Na kiya mti na kiya chekugosolwacho na phembe na kia cha yombe kuu na via vigosolwavyo kwa phembe za tembo via vya shaba na vya chuma na vya malumalu, 13 mdalasini na viungio na uvumba na manemane na ubani. Na divai na mavuta ya mzaituni na unga mtana na ngano. Na wanyama ng'ombe na ngoto na falasi na magai yabuutwayo na watumwa na wantu watuhu. 14 Wachuuzi wendawamwambe, "Kwaza vintu vyose wekuwavyo wavikundisa muno na kwaza vintu vyose vya yombe kuu vyekukutendavyo kuwa mtana, khunauvione vituhu!" 15 Wachuuzi wekuwao matajii kulawana na mzi uwo wendawagooke hae kwaajii ya kuogoha masuumizo yakwe. Wendawaiye na kutoa bwaimbo. 16 Wakagombeka, "Mbui fyaimi zakubwiiya mbui fyaimi zikubwiiya wee mzi mkuu! Kuzweeya kuvaa gwanda da kitani na gwanda da zambalau na gwanda dekhundu na kwehamba kwa vintu vyekugosolwavyo kwa zahabu na vyekugosolwavyo kwa maiwe ya yombe khuu na lulu. 17 Kwa saa mwenga du vintu vyako vingi vyose vyaga!"

Madeeva wa mei wose na wantambo wao wose na wagosoaji ndima mwe mei na wose wachuuzi kwa sia ya mazimshindo nee wagooka kwa hae, 18 wekuonaho mosi wa kuhya kwakwe nee waiya na kugombeka, "Khahana mzi mtuhu mkuu inga unu!" 19 Waketiiya sanga mwe mitwi yao wakiiya na kutoa bwaimbo kugombeka, "Masuumizo yakubwiiya masuumizo yakubwiiya! Ni mzi uda wenye mei wose zitambazo mwe mazimshindo watenda matajii kwa utajii wakwe kwa saa mwenga du kwaza kia kintu!"

20 "Muwe na nyemi nywie uwanga kwa Muungu kwaajii ya kugwa kwa mzi wa Babeli na wantu kwa Muungu na wagiiwa wa Muungu na waoni wakwe muwe na nyemi kwa yada yekulawiayo mwe mzi uwo, kwaviya Muungu kamuamuiya kwa yada ekuwagosoeayo ninywi!"

21 Mndima wa uko uwanga kwa Muungu yumwe mwenye udaho akenua iwe khuu da kubundugia na kudiasa mwe mazimshindo akagombeka, "Ivi nee mzi wa Babeli wendaubomolwe na khaunauwoneke vituhu. 22 Mgutio wa zeze na watoa fiimbi na watowa magunda khazinazisikike vituhu ndani ya mzi uwo, naho khahana fundi wa namna yoyose ida endaeaoneke vituhu ndani mwako, wala mgutio wa iwe da kubundugia khadinadisikike vituhu ndani mwako. 23 Ung'azi wa taa khauna uoneke ndani mwako katu, wiya wa ndoza khaunausikike ndani mwako katu. Wachuuzi wako ni wantu wamanyikao mwe inusi na kwa usawi wako kawazaganya wantu wa si zose!"

24 Mzi uwo nee ukatoigwa kwaviya umo wantu wa Muungu nee wakomwa, mwe mzi uwo nee kukaoneka phome ya waoni, phome ya wantu wa Muungu na phome ya wantu wekukomwao mwe inusi iyoneka mwe mzi uwo.