1 Naho nee namwona mndima wa uwanga kwa Muungu aseeya kulawiiya uwanga akawa katoza ufunguo wa kwengiiya mwe tubwi kuu dekuwado mwe si ya wantu wekuuyao na nyuma akawa na mnyololo mkuu mwe mikono yakwe. 2 Akadigwiiya ido zoka, zoka wa kae uyo etangwae Mbanasi hambu Shetani akamfunga kwa minyololo kwa miyaka elufu mwenga. 3 Mndima wa uwanga kwa Muungu akadiasa mwe si ya wekuuyao na nyuma na kudivugaiya, nee agea mhuli disekudaha kuwazaganya wantu mwe inusi adi aho miyaka elufu mwenga isiye. Miyaka iyo ikasiya aekewa kwa kisingi kidodo.

4 Naho naona vigoda vya kiseuta na wantu wekwevikaiavyo, wantu awo wekhigwa udaho wa kuamua. Viyaviya nee namwona muye za wada wekuchinjwao kwaajii ya kuwagombekea wantu mbui za Yesu na kwaajii ya kuwabiikia Mbui Yedi ya Muungu. Awo nee wada ambao khawekumvika yuda kaa na kizuu chakwe, naho khawekugewa mhuli he vibea vyao na mwe mikono yawo, wandima wa Muungu awo newawa wagima vituhu na kugookea hamwe na Klistu kwa myaka elufu mwenga. 5 Wada watuhu wekuuyao na nyuma hae na wada wekuchinjwao khawanawayuyuke adi kubua myaka elufu mwenga. Uwo nee uyuyuko wa bosi. 6 Muungu enda awajaiye muno wada wantu ekuwayuyusao maa ya bosi. Ufe wa kaidi khauna uwe na udaho kwa wowo, wendawawe waviki wa Muungu na wa Klistu, na wendawagookee hamwe nae kwa myaka elufu mwenga.

7 Inu miyaka elufu mwenga ikeza kusia, Shetani endaaekewe kulawa mwe kifungo chakwe. 8 Uyo endaalawe chongoi na kuvoka kuwatiiya wantu wa si zose wekuzagaao kia hantu wantu, wantu awo wekuzagaao kose mwe inusi ni wamasa wa Muungu, nao nee wetangwao Gogu na Magogu. Shetani endaawakisanye wantu awo hamwe kwaajii ya khondo, nao wendawawe wangi inga msanga wa phwani. 9 Nee wemboka mwe si yose wakiika bunga kambi za wantu wa Muungu na mzi wa Muungu aukundisao, Akini moto useeya kulawa uwanga kwa Muungu kuwadagamiza. 10 Naho Shetani yuda awatiiaye katambikwa mwe tumbwi diwakado moto mkai na baluti, umo yuumo yuda kaa na yuda muoni mhokho, wose awo wendawasuumizwe kio na musi misi yose kwesiho kisiikizi.

11 Naho nikaona kigoda cha useuta kikuu king'aacho na kimuona yuda ekwekaaye uwanga yakwe. Inusi na uko uwanga vikaga hemeso yakwe na khavikuonekana vituhu. 12 Nee nawaona wantu wada wekuuyao na nyuma wakuu kwa wadodo wagooka hemeso ya kigoda cha useuta. Vitabu vikagubulwa nee kitabu kituhu kikagubulwa yaani kitabu cha ugima. Wantu wada wakaamuiiwa kuigana na ntendwa zawo wekugosoazo inga zekuandikwavyo mwe viya vitabu. 13 Mazimshindo nee yawalavya wada wekuuyao na nyuma ndani mwakwe. Ufe na si ya wantu wekuuyao na nyuma zikawalavya wantu wekuuyao na nyuma ndani mwakwe. Kia yumwe akaamuiwa kuigana na ekugosoavyo mwe inusi. 14 Yekwembokaho ayo, ufe na si ya wekuuyao na nyuma vaaswa ndani mwe tumbwi da moto. Tumbwi ido da moto nee ufe wa kaidi. 15 Mntu yoyose yuda ambae zina dakwe khadikuoneka diandikwa mwe kitabu cha ugima, aaswa mwe ntondoo da moto.