1 "Umwandikie, mndima wa uko uwanga kwa Muungu agookeaye zumwezumwe da wantu wamzumiiyao Klistu da uko Efeso.

"Miye nitozae ziya ntoondo mfungate na kwenda gatigati ya vintu mfungate vya zahabu vya kuikia taa. 2 Namanya mbui zako zose, namanya ugosoavyo kiya udahavyo na uzizimizi wako, namanya kuwa khudaha kuwazizimiza wantu wafyaimi, naho kuwahima wada wegombekao kuwa wagiiwa na khio, nahodu ukamanya ni wahokho. 3 Namanya kuzizimiza masuumizi mangi, kwaajii ya kunizumiiya miye nahodu kwekusokea. 4 Akini kuna mbui mwenga khutenda vitana, nayo ni kuubada ukundiso wako wa bosi. 5 Mamakhanya ni hahi wekugwao, uhituke na ubade mavigaviga yako na kugosoa mbui ziya za bosi. Akini inga wesahokuhituka na kubada mavigaviga yako, nendaneze hako na kukuusia kintu chako cha zahabu za kuikia taa hantu hakwe. 6 Akini nakutogoa mwe kintu kimwe, wee wakimwa na yada wagosoayo Wanikolai inga niyakimavyo miye.

7 "Mwenye magutwi ya kutegeeza na ategeeze yada ambayo Muye wa Muungu ayagombeka mazumwezumwe ya wantu wamzumiiyao Klistu!

"Kwa yuda mvoti nendanimwekhe kuda matunda ya mti wa ugima wekuhandwao hemnda wa Muungu.

8 "Umwandikie mndima wa uko uwanga kwa Muungu agookeaye zumwezumwe da wantu wamzumiiyao Klistu da uko Similina kugombeka.

"Miye ni wa bosi na wakisikiizi, ambae nee kiuya na nyuma na ni mgima vituhu, nagombeka ivi. 9 Namanya suuba zako na viyaviya ukiwa wako, akini kwa kwei wee ni mntu mwenye vintu vingi, namanya wekukugombekavyo vya ufyaimi wada wagombekao kuwa ni Wayahudi naho khio, iya ni zumwezumwe da wantu wa Shetani. 10 Usekuogoha kintu chochose kwa yada yakundigwayo yakusuumize. Tegeeza Shetani awageeza wose na kuwagea wamwe wenu mwe geeza naho mwendampate suuba kwa misi kumi dimwe. Akini muwe wazumiwa ata kuuya na nyuma. Miye nendaniwekhe funge ya ugima.

11 "Mwenye magutwi ya kutegeeza na ategeeze yada ambayo Muye wa Muungu ayagombeka mazumwezumwe ya wantu wamzumiiyao Klistu.

"Yoyose adahae kuzizimiza ayo, khanaaumizwe na ufe wa kaidi."

12 "Umwandikie mndima wa uko uwanga kwa Muungu agookeaye zumwezumwe da wantu wamzumiiyao Klistu da uko Peligamo kugombeka.

"Miye nenao uhamba wa makai phande zose nagombeka ivi, 13 namanya aho wekaao, hantu ambaho Shetani agookeya! Naho kuendeea kuwa mzumizi wangu, naho kwekuemea kuwa wanizumiiya miye, ata misi ziya za Antipasi mntu mwekunizumiiya, kwei ekukomwao hantu hada ekaao Shetani. 14 Akini nina mbui ncheche za kugombeka nawe. Wauko wamwe wenu watongeao mahinyo ya Balaamu yee mwekumhinyae Balaki kuwatenda wantu wa Isilaeli wagosoe mavigaviga, ya kuda khande za ntambiko ambazo zilavigwa kwa vizuu na kugosoa ukianga. 15 Viyaviya una wantu watongeao mahinyo ya Wanikolai. 16 Aho hituka na kubada mavigaviga, nendaneze hao kinyio na kutoana na awo wantu kwa paange da muomo wangu.

17 "Mwenye magutwi ya kutegeeza na ategeeze yada ambayo Muye ayagombeka mazumwezumwe ya wantu wamzumiiyao Klistu!

"Mvoti nendanimwekhe ida khande yetangwayo mana yekufiswayo. Nendanimwekhe iwe ng'azi dekuandikwado zina dihya. Naho khahana mntu ekudimanyado akini ni yuda adiokheado."

18 "Umwandikie mndima wa uko uwanga kwa Muungu agookeaye zumwezumwe da wamzumiiyao Klistu wa uko Tiyatila, kugombeka.

"Inu nee mbui ya Mwana wa Muungu, mwenye meso inga moto na wayo zakwe zang'aa inga shaba yekusuntwayo muno." 19 Namanya mbui zako zose. Namanya ukundiso wako na uzumizi wako na ndima yako na uzizimizi wako. Isasa wagosoa vyedi muno kusima aho bosi. 20 Akini nenayo mbui mwenga kwako ya kukugombeka, wee wamzizimiza yuda mvyee Yezebeli etangae muoni, yee awahinyae na kuwatiiza wandima wangu wagosoe ukianga na kuda khande zekulavigwazo ntambiko kwa vizuu. 21 Khimwekha phasi ya kuhituka na kubada mavigaviga, akini khakunda kubada ukianga wakwe. 22 Tegeeza! Isasa nendanimtende awe mtamu muno na miye nendaniwatende awo wagosoao nae ukianga, kuwekha masuumizi makai inga khawana wabade sia zao fyaimi. 23 Na miye nendaniwakome wada wamtongeao kwa utamu mfyaimi, aho nee mazumwezumwe yose ya wantu wamzumiiyao Klistu yamanye kuwa miye nee nisunguumae mioyo na mamakhanyi za wantu. Na miye nendanimuihe kiya yumwe kuigana na ntendwa zakwe.

24 "Akini nawamba nywie watuhu mweuko Tiyatila ambao khamtongea mahinyo ya Yezebeli, naho mwesaokuhina mbui za ndani muno za Shetani. Isasa khinaniwagenyezee miagiiyo mituhu kusima ida muimanyayo. 25 Akini endeeni kutegeeza mbui yangu ambayo muihokea, nizumiiyeni adi aho nendahoneze.

26 "Naho avotae na kugosoa yada Muungu ayakundayo, nendanimwekhe udaho wa kuwagookea wantu mwe si zose, 27 endaawagookee kwa udaho wenye nguvu na wada wesaokutegeeza endaawatuetue inga vintu vya uongo vituikavyo. 28 Miye kihokea udaho kulawa kwa Tate. Na miye nendanimwekhe ida ntoondo ya keokeo.

29 "Mwenye magutwi ya kutegeeza na ategeeze yada ambayo Muye ayagombeka mazumwezumwe ya wantu wamzumiiyao Klistu!"