1 Nee namwona mndima mtuhu wa uko uwanga kwa Muungu mwenye udaho akaseeya kulawa uko uwanga kwa Muungu. Kavikwa zunde na mnywa mazi mwe mtwi wakwe, cheni chakwe inga zuwa na miundi yakwe nayo inga mihindo ya moto. 2 Nee katoza kitabu kidodo chekugubulwacho. Akajata wayo wakwe wa kuume mwe mazimshindo na wayo wakwe wa kumoso kajata si khavu, 3 nakwetanga kwa mgutio mkuu inga mgutio wa simba. Ekugombekaho kwa mgutio mkuu tuntumo mfungate nee zalavya kisindo. 4 Tuntumo mfungate zekulavyavyo mgutio, miye nikakunda kuandika. Akini nee nasikia mgutio kulawa uwanga kwa Muungu ukagombeka, "Mbui za tuntumo izo mfungate ni sii, wesekuandika!"

5 Naho yuda mndima wa uko uwanga nekumonae kagooka uwanga ya mazimshindo na uwanga ya sanga khavu akenua mkono wakwe wa kuume uwanga kwa Muungu, 6 naye akaaha kwa Muungu ekaaye misi yose kwesaho kisiikizi, mwekugosoa uwanga kwa Muungu na vintu vyose vyeumo umo mwake, inusi na vyose vyeumo, hamwe mazi mshindo na vyose vyekuwamo umo mwakwe. Akagombeka, "Kisingi cha kuzizimiza muno kisia! 7 Akini kisingi yuda mndima wa uwanga endahoatowe gunda dakwe, Muungu endaaiganize ntegaji yakwe ya sii inga ekuwaambiavyo wandima wakwe waoni."

8 Naho uda mgutio nekuutegeezao kulawa uwanga kwa Muungu ukagombeka nami vituhu ukanamba, "Hita ukakidoe kiya kitabu chekuvugulwacho mwe mkono wa yuda mndima wa uko uwanga kwa Muungu, agookae uwanga ya mazimshindo na uwanga ya si khavu."

9 Nee namtimia uyo mndima wa uko uwanga kwa Muungu nakumgombeka anekhe kiya kitabu kidodo. Nae akanitambaisa, "Kidoe na ukide. Mwe kanwa chako chendakiwe kimwiiye inga woki, akini mwe ifu dako chendakiwe kisungu!"

10 Nee nakidoa kitabu kidodo kulawa mwe mkono wa uyo mndima wa uwanga kwa Muungu na kukida. Naho nekiwa kimwiiye mwe kanwa changu inga woki, akini nekukimezaho kikawa kisungu mwe ifu dangu. 11 Akawamba, "Endeea kuwamba wantu kiya ukigosoacho mwe si na wantu wangi na wantu wa mbai nyingi na Maseuta!"