1 Naho nee namuona kaa yumwe alawiiya mwe mazimshindo, nekawa na phembe kumi dimwe na mitwi mfungate, mwe kia phembe neiwa na ntaji, naho mwe kia mtwi wakwe nekuwa na zina da kumdumua Muungu. 2 Kaa ido nekumuonae kaigana inga sui, miundi yakwe inga mnyama etagwae dubu na kanwa chakwe inga wa simba. Uyo zoka akamwekha kaa ido nguvu zakwe hamwe na kigoda chakwe cha useuta na udaho wakwe mkuu. 3 Mtwi umwe wa ido kaa uoneka inga una kionda kikuu muno, akini kioneka kihona. Wantu wose wa mwe inusi wakahondomaa na kumtimia uyo mnyama. 4 Wantu wose nee wamvika yuda zoka kwaviya kamwekha udaho yuda kaa. Naho wakamvika uyo kaa na kugombeka, "Nindai ekuwae inga uyu kaa? Nindai adahae kuhigana nae?"

5 Kaa akekhigwa udaho wakugombeka mbui za kwevuna na kumdumua Muungu, naho akaekewa agookee kwa kisingi cha miongo alubaini na mbii. 6 Akavoka kumdumua Muungu, na kudidumua zina dakwe na hantu hakwe ekaao na kuwadumua wose wekaao uko uwanga kwa Muungu. 7 Nee ekhigwa nguvu ya kutoana khondo na kuwavota wantu wa Muungu, naho kekhigwa udaho wa kiya mbai na kiya si na kiya kigombeko na kiya muango. 8 Wantu wose wekaao mwe inusi wendawamvike uyo kaa, kwesahokuwa wada ambao mazina yao yaandikwa mwe kitabu cha ugima cha Mwanangoto ekuchinjwae kuvokea kugosolwa kwa inusi.

9 "Mwenye magutwi ya kutegeeza na ategeeze! 10 Mntu yoyose ekuikwae kudoigwa kwa nguvu, endaadoigwe, na mntu yoyose ekuikwae kukomwa na uhamba endaakomwe na uhamba. Ivyo wantu wa Muungu wakundigwa wawe wazizimizi na uzumizi."

11 Naho nee namwona kaa mtuhu alawiiya mwe si. Nekawa na phembe mbii inga phembe za ngoto, akini nee akatamwiiya inga zoka. 12 Naho nee akagosoa ndima kwa udaho ekwekhigwao na kaa yuda wa bosi kwaajii yakwe. Naho akawatenda wantu wose mwe inusi na vyose vyekuwamo umo kumvika kaa yuda wa bosi, nekawa na kionda cha ufe chekuhonacho. 13 Dikaa ido da kaidi dikagosoa vihii vikuu vya kuhondomaza, nee atenda moto usee mwe si kulawa uko uwanga kwa Muungu. 14 Nee awatiiya wose wekaao mwe inusi kwa vihii ivyo ekujaiwavyo kugosoa hemeso ya kaa wa bosi. Nee awagombeka wekaao mwe inusi wagosoe vizuu kwa kumtunya yuda kaa mwekuwaye kajeruhiwa kwa uhamba akini akawa mgima vituhu. 15 Kaa uyo akekhigwa udaho wa kuvuzia muye kiya kizuu cha yuda kaa wa bosi ata kudaha kugombeka na kuwatenda wantu wada wesaokuivikia wakomwe. 16 Kaa uyo nee awashuutiza wantu wose wadodo kwa wakuu na wenye vintu vingi na wakiwa na watumwa na wada wekuikiwao muhuli mwe mikono yao ya kuume hambu he vibea vyao. 17 Nee aemeza mntu yoyose kugua hambu kutaga chochose kwesiho mwekuikwae mhuli, iyo nee zina da kaa au namba ya zina dakwe.

18 Hanu kwakundigwa umanyi. Mntu mwenye kumamakanya vitana na kudaha kubukhua namba iyo ya mnyama, kwaviya ni namba ya mntu. Namba iyo ni mia mtandatu sitini na mtandatu.