1 Naho kukaoneka ntangio khuu ya kuhondomaza uko uwanga kwa Muungu. Nekuwa na mvyee ekuvikwae zua na mweenge wekuwao asi ya miundi yakwe na ntaji za ntoondo kumi dimwe na mbii mwe mtwi wakwe. 2 Mvyee uyo nee ana ndaa, akalavya mgutio kwa maumevu na usungu wa kwefungua mwana.

3 Nee kwalawiya utangio mtuhu uko uwanga kwa Muungu. Nekuwa na zoka mwekundu mwenye mitwi mfungate na phembe kumi dimwe na kiya mtwi neuwa na ntaji. 4 Naho mkia wakwe ukabuuta selusi mwenga ya ntoondo za uwanga na kuzasa he inusi. Nee zoka uyo akagooka hemeso ya yuda mvyee, mwekuwae hehi kwefungua kwekaa tayali kumda mwana. 5 Yuda mvyee nee efungua mwana kigosi, ekuikwae tayali kugookea si zose kwa ngoda ya chuma. Mwana uyo nee adoigwa na kwegalwa kwa Muungu he kigoda cha Muungu cha useuta. 6 Yuda mvyee nee aguukia he kiwawe, hantu ekuikiwao ni Muungu aindwe kwa misi elufu mwenga mia mbii na sitini.

7 Naho kukaawia khondo uko uwanga kwa Muungu, mndima Mikaeli hamwe na wandima wakwe wa uwanga kwa Muungu wakatoana na yuda zoka nado dikatoana hamwe na wandima wakwe. 8 Akini zoka uyo na wandima wakwe nee wavotwa, khawekukundigwa vituhu uko uwanga kwa Muungu. 9 Aho zoka ido dikasigwa asi, zoka ido ni yuda zoka wa kae ekwetangwae Shetani na Ibiisi awatiiaye wantu wa si zose, kaaswa asi hamwe na wandima wakwe.

10 Nee nasikia mgutio mkuu kulawa uko uwanga kwa Muungu ukagombeka, "Isasa Muungu yetu kawaohoa wantu wakwe katumia udaho wakwe kuvoka ugookezi wakwe. Isasa Klistu Yesu naye kaonyesha udaho wakwe, neiwa ivyo kwaviya mmasa wa wazumiizi wenzwetu kaswa asi, naam ambaye nekawa awakoea masa hemeso ya Muungu kio na msi kaswa asi. 11 Wazumiizi wezwetu wamvota zoka kwa nguvu ya phome ya Mwanangoto na kwa kugombeka ukwei kwa mbui ya Yesu, naho khawekuona kuwa kwekaa kwao ni kintu, nee watayali ata kuuya na nyuma. 12 Ivyo, kuweni na nyemi nywie mwekaao uwanga kwa Muungu na vyose vyeumo ndani. Akini mwendamuone, mwekaao mwe si na mwe mazimshindo kwaviya Shetani kaseezwa kwenu, ana maya muno kwaviya amanya kuwa kisingi chakwe kisigaa kijihi."

13 Zoka ido ekumanyaho kuwa kaaswa asi mwe si, nee avoka kumguusa yuda mvyee ekufunguae mwana kigosi. 14 Akini mvyee uyo, akekhigwa mawawa maidi ya tai mkuu, ili asooke adi hantu hakwe hekuikwaho vitana kwaajii yakwe he kiwawe, kuda endaaikwe kwa myaka mitatu na nusu. 15 Aho, dia zoka nee atahika mazi mangi inga tondoo da mazi, nee yamtimia yuda mvyee ili yambuute. 16 Akini si nee yamuambiza yuda mvyee ikegubua inga kanwa na kuakhia yada mazi yekulawayo mwe muomo wa nyoka. 17 Ivyo zoka ido dikamkima muno yuda mvyee, nee ahauka na kuita kutoana na uvyao wa uyo mvyee. Na awo nee wada wategeezao miko ya Muungu na kuwamba wantu watuhu mbui za Yesu. 18 Zoka dikagooka khandakhanda ya mazimshindo.