1 Naho naona utangio wa kuhondomaza mtuhu mwe maangwi, nekuwa na wandima mfungate wa uwanga kwa Muungu wekutozao masumizo mfungate ya kisikizi, kwa iyo maya ya Muungu yasia.

2 Naho nikaona kintu inga mazimshindo ya kioo ihanganywa na moto, nikawaona wada wantu wekumvotaho yuda kaa na kizuu chakwe, uyo zina dakwe digombekwa kwa ida namba wagooka khandakhanda ya mazimshindo ya kioo watoza vinubi wekwekhigwavyo na Muungu, 3 naho wakatoa wiya wa Musa mndima wa Muungu na wiya wa Mwanangoto wakagombeka,

"Wee Zumbe Muungu mwenye udaho,

Ntendwa zako ni khuu na za kuhondomaza

Wee Seuta wa si zose,

Sia zako ziaho inga ikundigwavyo na za kwei.

4 Zumbe ni ndai mwesaekukuogoha wee?

Ni ndai mwesaekuditogoa zina dako?

Ni wee ikedu uyedi muno,

Wantu wa si zose wendaweze na kukuvikia,

Kwaviya mbui zako ziaho inga ikundigwavyo na zigubulwa kwa wantu wose."

5 Yekwembokaho ayo nikakauwa vituhu. Nikaona Nyumba ya Muungu uko uwanga ivugulwa, nyumba iyo iyaho inga tweya da Muungu, ambado Muungu kekaa gatigati ya wantu kuda he kiwawe. 6 Wada wandima mfungate wa uko uwanga kwa Muungu, wekuwao na masuumizo mfungate wakalawa mwe Nyumba ya Muungu wamevaa gwanda dekugosolwado kwa kitambaa chekung'aacho na mikwiji ya zahabu mwe vifua vyao. 7 Naho yumwe wa wada wenye ugima wane akawekha wada wandima mfungate wiga mfungate za zahabu zekumemazo maya makuu ya Muungu ekaae misi yose kwesiho kisiikizi. 8 Ukuu na nguvu za Muungu zikatenda Nyumba ya Muungu kumema mosi, naho khahana mntu yoyose ekudahae kwengia mwe Nyumba ya Muungu adi kisiikizi cha masuumizo mfungate kulawa kwa wada wandima wa uwanga kwa Muungu mfungate yendahoyasie.