1 Naho nee naona uwanga kwa Muungu kuhya na inusi mhya. Uwanga uko kwa Muungu kwa bosi na inusi ya bosi yaga, khavikuonekana vituhu, nayo mazimshindo khaikuoneka vituhu. 2 Nee naona mzi wa Muungu mwenye, Yelusalemu mhya, ukaseeya kulawa uko uwanga kwa Muungu, uikwa vitana inga mvyee ekuhambwavyo vitana kwaajii ya muumewe. 3 Nikategeeza mgutio mkuu kulawa he kigoda cha useuta ukagombeka, "Isasa Muungu ekaa gatigati yao, naho endaekae nawo na kuwatenda wantu wakwe nawo wendawatende Muungu yao. 4 Uyo endaawahanguse mesozi yawo yose kwaviya ufe khauko vituhu wala usungu wala maumevu wala ndio, kwaviya mbui za kae zemboka."

5 Yuda mwekwekaae mwe kigoda cha useuta akagombeka, "Kauwa navivuza wanda vintu vyose." Naho akanigombeka, "Andika mbui izi, kwaviya ni zakuzumiwa na zakwei." 6 Nee anigombeka, "Diigania! Miye ni Alufa na Omega, wa bosi na wakisikizi. Mwenye khiu nendanimwekhe mazi yalawayo kwe soko ya ugima yesayo kuwa na maiho. 7 Yoyose endaeavote mbui za ufyaimi za shetani endaahokee aya, miye nendaniwe Muungu yakwe nae endaawe mwanangu. 8 Akini waogoaho na wesaokuzumiiya na wada watiiyao wantu na wakianga na wasawi na wavikiao vizuu na wahokho wose hantu aho ni mwe ntondoo dekumemado moto na baluti. Inu nee ufe wa kaidi."

9 Naho yumwe wa wada wandima mfungate wa uko uwanga kwa Muungu yuda wekuwao na mawiga mfungate yekumemayo masuumizo ya kisikizi, keza na kunigombeka, "Soo! Nendanikuonyeshe yuda mwekuhamba mkaziwe Mwanangoto." 10 Muye wa Muungu nee wanengia, nee anegaa kwe muima ulehao na kunionyesha mzi wa Muungu. Yelusalemu ukaseeya kulawa uwanga kwa Muungu. 11 Uwo mzi wang'aa kwa ukuu wa Muungu. Ung'azi wakwe neuwa inga wa iwe da yombe khuu detangwado yasipi, ding'aado inga kioo. 12 Neuwa na kanto khuu, wekuwao uzunguuka naho ilehayo yenye nyuvi kumi na mbii na kiya umwe nee ukaindwa na mndima wa uko uwanga kwa Muungu. Uwanga ya kiya uvi paandikwa zina dimwe mwe mazina ya mbai kumi na mbii ya Waisilaeli. 13 Nekuwa na nyuvi ntatu kia phande, phande ya awio da zua nyuvi khuu ntatu na kasikazini nyuvi khuu ntatu na kusini nyuvi khuu ntatu na bindikio da zua nyuvi khuu ntatu. 14 Kanto za mzi uwo zizengwa na maiwe ya msingi kumi na mbii, naho uwanga he kia iwe haandikwa zina da muagiiwa yumwe wa wada wagiiwa kumi na mbii wa Mwanangoto.

15 Yuda mndima wa uko uwanga kwa Muungu mwekugombeka na miye nekawa na khombati ya zahabu ya kuhima uda mzi hamwe na nyuvi zakwe na kanto zakwe. 16 Mzi uda waigana kosekose, upana na ulefu wakwe vyaigana, ivyo mndima wa uwanga kwa Muungu akauhima mzi uda kwa khombati dakwe, neuwa na upana na ulefu na kimo wa kuita kilometa elufu mbii na magana maidi. 17 Ekubindaho akahima ukanto wakwe, nao neuwa na mita sitini kwa kihimo cha meso cha kiuntu ambacho mndima wa uwanga kwa Muungu kahima. 18 Ukanto uwo nee uzengwa kwa maiwe mekhundu ya yombe khuu yetangwayo yasipi na mzi wenye nee uzengwa kwa zahabu ntana, ing'aayo inga kioo, 19 Na msingi wa ukanto wa uwo mzi nee uhambwa kwa maiwe ya kia mbai ya maiwe ya yombe khuu. Iwe da bosi ni dekhundu detangwado yasipi na dakaidi detangwa salifa na dantatu detangwa kalikedoni na dakane detangwa zumalidi. 20 Na dashano detangwa sadoki na damtandatu akiki na damfungate detangwa kilisolito na danane detangwa zabalajadi na dakenda detangwa topazi na dakumi dimwe detangwa kilisopilaso na dakumi dimwe na mwenga detangwa yasinito na dakumi dimwe na mbii detangwa ametisito. 21 Na zia nyuvi khuu kumi dimwe na mbii na kia uvi mkuu nee ugosolwa na madini ya lulu. Na kia baabaa yekuwayo khuu igosolwa kwa madini ya zahabu ntana, ing'aayo inga kioo.

22 Mwe mzi uwo nchekuona Nyumba ya Muungu kwaviya Zumbe Muungu mwenye udaho na Mwanangoto, kwaviya nee wenye mzi uwo. 23 Naho mzi uwo khaukunda zua wala mweenge wa kueta ung'azi kwaviya Ukuu wa Muungu wawang'azia na taa yakwe ni Mwanangoto. 24 Wantu wa mwe si zose wendawekae mwe ung'azi wakwe, maseuta wa inusi wendawegae vintu vyao vyose wekuwavyo navyo. 25 Naho nyuvi zakwe khazinazivugalwe msi wose, kwaviya mda khamna kio. 26 Wantu wa mwe inusi wose wendawegae untajii wao wose na vintu vyao vyose vya yombe khuu mwe mzi umo. 27 Akini khahana kintu chochose chengiacho umo chesachokukundigwa ni Muungu, wala mntu yoyose agosoae mbui za kuihiza hambu za uhokho khanaengie. Ni wada du wekuandikwao mwe kitabu cha ugima cha Mwanangoto nee wendaowengie umo ndani.