1 Naho mndima wa shano akatoa gunda dakwe. Nikaona ntoondo yekugwayo kulawa uwanga adi asi, naho yekhigwa ufunguo wa tumbwi da si ya wantu wekuuyao na nyuma. 2 Naho ntondoo iyo ikagubuwa ido tumbwi desadokuwa na kisikizi mosi ukakwea kulawa mwe tumbwi inga mosi wa tanuli kuu, zuwa na uwanga vikawa kiza kuawana na uda mosi. 3 Nzige wakalawa mwe uda mosi nee zengia mwe inusi yose zekhigwa udaho inga wa visuse. 4 Nee zaagiiwa zesekubananga mainde na mani na miti yoyose mwe inusi, iya wawabanange wantu wose ambao khawana mhuli wa Muungu mwe vyeni vyao. 5 Nzige aho khazikuagiiwa kuwakoma wantu iya kuwasuumiza du kwa kisingi cha miongo mishano. Naho masuumizo ayo yendayawe inga mntu ekuumwae na kisuse. 6 Mwe misi izo wantu wendawaondeze kuuya na nyuma akini khawana wauye na nyuma, ufe wendauwanyiike.

7 Nzige ziya zaoneka inga falasi wekuikwao tayali kwa khondo, mwe mitwi yao wawa na vintu vyekukaavyo inga ntaji za zahabu na vyeni vyao neziwa inga wantu. 8 Naho fii zawo ziwa inga fii za wavyee, meno yawo inga meno ya simba. 9 Vifuwa vyao vigubikwa na vintu inga gwanda da chuma. Mgutio wa mawawa wao neuwa inga mgutio wa magai yavutwayo ni falasi wangi waitao kwe khondo. 10 Newawa na mikia yenye miwa ya kuumiya inga visuse, mwe mikia yawo newawa na udaho wa kuwauma wantu kwa miongo mishano. 11 Naho wawa na seuta yao, naye nee mndima wa tumbwi desado kuwa na kisiikizi, zina dakwe kwa Kiebulania ni Abadoni na kwa Kiyunani ni Apolioni mana yakwe, "Mbanasi."

12 Mbui fyaimi za bosi zemboka, zisigaa mbii zeza.

13 Yekwembokayo ayo mndima wa mtandatu wa uwanga kwa Muungu akatoa gunda dakwe. Nikasikia mgutio umwe kulawa mwe mahembe mane za ingo da zahabu da kusoma ubani. 14 Mgutio ukamgombeka yuda mndima wa mtandatu wa uwanga kwa Muungu mwenye gunda, "Wavuguiye wada wandima wane wekuvugaiwao mwe zigizigi da mazi kuu da Fulati!" 15 Wada wandima wane wavuguiwa, nee waikwa kae kwaajii ya saa iyo ya misi ya muongo uwo na mwaka uwouwo, ili wakome selusi mwenga ya wantu mwe mafungu matatu, nee wawakoma. 16 Naho nikategeeza maasikai wakwea falasi newawa milioni mia mbii. 17 Nee ivyo nekuwaonavyo falasi na wakwea falasi, newana gwanda za chuma mwe vifuwa vyao, ziwa nyekundu muno inga moto na zabuluu inga uwanga na ya njano inga madini ya baluti. Mitwi ya falasi awo nee yaigana inga mitwi ya simba na mwe miomo yawo nee kwalawa moto na mosi na baluti. 18 Selusi ya wantu wakakomwa kwa matoa ayo matatu nayo ni moto na mosi na baluti yekulawayo mwe miomo ya falasi. 19 Kwaviya nguvu za falasi awo nee zimwe miomo yao na mikia yao. Mikia yao nee iyoneka inga nyoka naho neiwa na mitwi, wakatumia iyo kuwauma wantu.

20 Wantu wekusigaao ambao khawekukomwa na mapigo ayo, khawakuhituka na kubada kuvika vizuu wekuvigosoavyo wenye. Naho khawekubada kuvika mazaiko na vizuu vya zahabu na shaba na maiwe na miti, ambavyo khavidaha kuona, kutegeeza wala kwenda. 21 Wantu wada khawekumhitukia Muungu na khawekubada mbui zao fyaimi kukoma wantu wala usawi wala ukianga wala ubavi wao.