1 Naho yumwe wa wada wandima mfungate wa uko uwanga kwa Muungu wekuwao na mawiga akanibasa na kunigombeka, "Soo uone sugusa ekwekhigwayo yuda mkianga mkuu nee mzi mkuu wekusengwao khandakhanda ya mazi mangi. 2 Maseuta wa inusi wagosoa ukianga hamwe nae na wantu wa mwe inusi wakolwa ni divai ya ukianga wakwe."

3 Naho Muye wa Muungu nee waniongweeya na kunegaa he kiwawe. Uko nee namuona mvyee kekaa uwanga ya kaa mwekhundu mwekumema mwii mgima mazina ya kumdumua Muungu, mnyama uyo nekawa na mitwi mfungate na phembe kumi dimwe. 4 Mvyee uyo nekavaa gwanda da zambalau na dekhundu, naho nee kehamba kwa vintu vyekugosolwavyo na zahabu na maiwe yenye yombe kuu na lulu. Mwe mkono wakwe nee katoza kikombe cha zahabu chekumemacho mbui za kuihiza na ntendwa fyaimi za ukianga wakwe. 5 Mwe kibea chakwe kuandikwa zina da sii, "Babeli mkuu, mami yao da wakianga wose na mbui zose za kuihiza mwe inusi." 6 Nee namwona yuda mvyee kakolwa na phome ya wantu wa Muungu hamwe na phome ya wantu wekukomwao kwaajii ya kuwagombeka watuhu mbui ya Yesu.

Nekumuonaho nee nahondomaa muno. 7 Akini, mndima wa uko uwanga kwa Muungu akaniuza, "Kwambwai wahondomaa? Nendanikugombeke sii ya uyo mvyee hamwe na yuda kaa amwenuaye mwenye mitwi mfungate na phembe kumi dimwe. 8 Kaa yuda wekumuonae nekawa mgima aho bosi, akini isasa kauya na nyuma. Naho yuhehi kukwea kulawiiya mwe tumbwi da si ya wantu wekuuyao na nyuma akini Muungu endaamkomwe. Wantu wose wekaao mwe inusi wendawahondomae, wantu wose ambao mazina yawo khayekuandikwa kuvokea aho bosi mwe kitabu cha ugima kuvokea kuumbwa kwa inusi, wendawahondomae kumwona kaa uyo ambae aho bosi nekawa mgima naho akauya na nyuma akini isasa endaalawiiye vituhu."

9 "Hanu hakundigwa akii na umanyi, ida mitwi mfungate ni viima mfungate ekaae yuda mvyee. Viyaviya mitwi iyo ni maseuta mfungate. 10 Mwe maseuta awo mfungate, washano wagwa kae, yuaho yumwe khazati kweza, akini endahoeze endaagookee kwa kisingi kijihi du. 11 Yuda kaa ekuwae mgima aho bosi, akini isasa kauya na nyuma ni seuta wa nane, uyo ni yumwe wa wada mfungate, naho endaakomwe.

12 "Ziya phembe kumi dimwe wekuzionazo ni maseuta kumi dimwe ambao khawazati kugookea, akini wendawekhigwe udaho wa kugookea kwa saa dimwe du na yuda kaa. 13 Wose awa kumi dimwe wevana, naho wendawamwekhe yuda mnyama nguvu na udaho wawo wose. 14 Wendawatoane na Mwanangoto, akini Mwanangoto hamwe na wada ekuwetangao na kuwasagua ambao ni wazumiiwa, endaawavote kwaajii yee ni Zumbe wa mazumbe naho Seuta wa maseuta."

15 Naho yuda mndima akanigombeka, "Yada mazi wekuyaonayo hada ekaaho yuda mkianga, ni mazumwezumwe ya wantu wa kiya si na wantu wa kia muango na wa kiya vigombeko. 16 Phembe ziya kumi dimwe wekuzionazo hamwe na yuda mnyama wendawamkime yuda mkianga, wendawawoke kiya kintu ekuacho nacho nakumwasa kimbwigii. Wendawade nyama yakwe na mavuha yakwe wendawayoke moto. 17 Kwaviya Muungu kaika mwe mioyo yawo kiya akundacho wagosoe, wevane wowo wenye na kumwekha uyo kaa useuta wa kugookea kubua hada mbui ekugombekazo Muungu ziiganie.

18 "Naho yuda mvyee wekumuonae ni uda mzi mkuu, uwagookeao maseuta wose wa inusi."