1 Naho mndima wa uko uwanga kwa Muungu akanionyesha zigizigi da mazi ya ugima, denye mazi yang'aayo inga viya kioo, walawa kwe kigoda cha kiseuta cha Muungu na cha Mwanangoto. 2 Zigizigi ido diseeya gatigati ya sia khuu ya mzi uwo. Mwe kia phande ya zigizigi ido nekuwa na mti wa ugima wekuwao na matunda maa kumi na mbii kwa mwaka, yani kia muongo. Mani yakwe ni mzigi wa kuwahonya wantu mwe si zose. 3 Khahana kintu chekubadiwacho lazi mwe mzi uwo.

Kigoda cha useuta cha Muungu na cha Mwanangoto chendakiwe mwe mzi uwo, hamwe na wandima wakwe wendawamvike. 4 Mwendawaone cheni chakwe na zina dakwe dendadiandikwe mwe vibea vyawo. 5 Khakuna kuwe na kio wala khawanawakunde taa wala ung'azi wa zua, kwaviya Zumbe Muungu endaawamuiikie na kuwagookea inga maseuta wa misi yose kwesiho kisiikizi.

6 Naho mndima wa uko uwanga kwa Muungu akanigombeka, "Mbui izi ni zakwei na zakuzumiiwa. Zumbe Muungu awekhae waoni Muye wakwe, kamuagiiya mndima wakwe wa uko uwanga kwa Muungu awaonyeshe wandima wakwe mbui zikundigwazo kulawiiya."

7 Yesu nee anigombeka, "Tegeeza! Neza kinyio! Wajaiwa wada watozeezao mbui za uwoni zekuwazo mwe kitabu iki!"

8 Miye Yohana, kiona na kutegeeza mbui izi zose, naho nekubindaho kutegeeza na kuona, nikakinta mavindi hemeso ya yuda mndima wa uwanga kwa Muungu mwekunionyeshae mbui izo, naho nikakunda kumvika. 9 Akini yee akanigombeka, "Eka usekutenda ivyo! Miye ni mndima wa Muungu inga wee na wanduguzo waoni na wose wategeezao miagiiyo yekuwamo mwe kitabu iki. Wee mvike Muungu." 10 Naho nee anigombeka, "Wesekutenda sii mbui za uwoni zekuwamo mwe kitabu iki kwaviya kisingi cha kulawiya mbui izo kihehi. 11 Mntu yoyose agosoae ya ufyaimi aendeee kugosoa ufyaimi wakwe, na mntu yoyose agosoae mbui za soni aendeee kugosoa mbui za soni, mntu yoyose agosoae yakundiswao ni Muungu aendeee kugosoa yada yakundiswayo ni Muungu, mntu yoyose ekuwaye wa Muungu aendeee kuwa wa Muungu."

12 Yesu akanigombeka, "Tegeeza! Neza kinyio na funge nendadonimwekhe kia yumwe kuigana na mbui zakwe. 13 Miye ni Alufa na Omega, ni wa bosi na wa kisikizi, nee nivokae mbui zose na kuzibuza kisiikizi."

14 Ebae wada wasuntao magwanda yao, wazumiwa kuda matunda ya mti wa ugima na kuzumiwa kwengia mwe mzi kwa kwembokea nyuvi zakwe. 15 Na mwe mzi uwo kuna makui ambayo ni wantu wagosoawo mavigaviga, ambao ni wada wasawi na wakianga na wakomaji, nawavikao vizuu na wose wakundisao kugombeka uhokho, wendawekae chongoi.

16 Miye ni Yesu khimuagiiya mndima yangu wa uwanga kwa Muungu awaonyeshe nywie mbui izo kwa zumwezumwe da wantu wamzumiiyao Klistu. Miye ni mvyaigwa wa muango wa Daudi Miye ni ntoondo ing'aayo ya keokeo da mtunga ihu.

17 Muye wa Muungu na mwai wa Mwanangoto wagombeka, "Soo!"

Kia mntu ategeezae idi, na agombeke, "Soo!"

Ekuwae na khiu na eze, na akundae adoe mazi ya ugima kwesiho maiho.

18 Miye Yohana nawahaza wantu wose wategeezao uwoni wa mwe kitabu iki, mntu yoyose endaeaomee mbui yoyose mwe mbui izi, Muungu endaamuomee mafyaimi kwa yekuandikwayo mwe kitabu iki. 19 Inga mntu yoyose endaeahunguze mbui yoyose za uwoni mwe kitabu iki, Muungu khanaambade ade tunda da mti wa ugima na khanaamuekee kwekaa mwe mzi unu, na kitabu iki chagombeka aya yose.

20 Yee agombeka mbui izi agombeka, "Neza Kinyio."

Chondechonde, Zumbe Yesu Soo.

21 Nawaombea ili wedi wa Zumbe Yesu uwe na nywie nyose. Pepa.