1 Yekwembokayo ayo nikaona wandima wa uko uwanga kwa Muungu wane, wagooka he phembe nne za mwe inusi, kukindia khusi isekuvuma mwe si, mwe mazimshindo wala he mti wowose. 2 Nee namwona mndima mtuhu wa uko uwanga kwa Muungu akeza kulawa awiyo da zua, katoza alama ya mhuli wa Muungu mwenye ugima. Nee awetanga kwa mgutio mkuu wada wandima wanne wa uko uwanga kwa Muungu wekwekhigwao udaho wa kubananga si na mazimshindo. 3 Uyo mndima wa uwanga kwa Muungu akagombeka, "Mwesekubananga si na mazimshindo hamwe na miti adi hada tendahotiwagee alama ya mhuli wandima wa Muungu wetu mwe vibea." 4 Naho nikategeeza ntaazia ya wada wekugewao alama ni wantu laki mwenga na elufu makumi mane na nne ya mbai zose za wantu wa Isilaeli. 5 Wantu wekugewao mhuli ni mbai ya Yuda wantu kumi na mbii elufu na mbai ya Lubeni wantu kumi na mbii elufu na mbai ya Gadi wantu kumi na mbii elufu. 6 Na kulawa mbai ya Asheli wantu kumi na mbii elufu na mbai ya Nafutali wantu kumi na mbii elufu na mbai ya Manase wantu kumi na mbii elufu. 7 Mbai ya Simoni wantu kumi na mbii elufu na mbai ya Lawi wantu kumi na mbii elufu na mbai ya Isakali wantu kumi na mbii elufu. 8 Na kulawa mbai ya Zabuloni wantu kumi na mbii elufu na mbai ya Yusufu wantu kumi na mbii elufu na mbai ya Benjamini wantu kumi na mbii elufu.

9 Hamwe na ayo, nikaona zumwezumwe kuu da wantu ambado khahana mntu adahae kudintaazia, wantu wa kia si na mbai na muango na vitamwiwavyo, naho wagooka hemeso ya kigoda cha useuta na hemeso ya Mwanangoto wavaa khanzu zekung'aazo naho watoza matambi ya mitende. 10 Wakagombeka kwa mgutio mkuu, "Uohozi una Muungu yetu ekaae mwe kia kigoda cha useuta na Mwanangoto!" 11 Wandima wose wa uko uwanga kwa Muungu wakagooka kukizunguuka kigoda cha useuta hamwe na wadaa na wada viumbe wenye ugima wane. Naho wakakinta mavindi na kwenamiza mitwi yao hemeso ya kigoda cha useuta na kumvika Muungu, 12 wakigombeka, "Pepa, ukuu na umanyi na ntogoo na ntunyo na udaho na nguvu vina Muungu yetu misi yose kwesiho kisiikizi, Pepa!"

13 Yumwe wa wada wadaa akaniuza, "Wantu awa wekuvaao khanzu zing'aazo ni wakina ndai naho walawa kuhi?"

14 Nee namtambaisa, "Mkuu khimanya iya wee wamanya." Nee anigombeka, "Awa ni wada wekuhonao mwe masuumizi makuu, naho wasunta khanzu zao mwe phome ya Mwanangoto na kuzitenda zing'ae. 15 Nee mana wagooka hemeso ya kigoda cha useuta cha Muungu naho wamvika kio na musi mwe Nyumba yakwe. Yuda ekaae mwe kigoda cha useuta endaawagubike kwaviya yuhamwe nawo na kuwainda. 16 Khanawaone saa vituhu wala khiu na zuwa khadinadiwoke wala kizuguto kikai khakina kiwoke vituhu. 17 Kwaviya Mwanangoto ekuwae gatigati ya kigoda cha useuta endaawe mwiisi wako, naho endaakuongoee he soko za mazi ya ugima. Naho Muungu endaawaanguse mesozi yawo yose."