1 Yekwembokayo ayo nikategeeza mgutio mkuu inga mgutio wa zumwezumwe kuu da wantu kulawa uwanga kwa Muungu wagombeka, "Zumbe atogolwe, uwohozi na ukuu na nguvu vina Muungu yetu! 2 Kwaviya uwamuio wakwe ni wakwei na nee ikundigwavyo, kwaviya kamuamuiya yuda mkianga mkuu kawatenda wantu mwe inusi wagosoe ufyaimi kwa ukianga wakwe. Muungu kamuihiza kwaajii kawakoma wandima wakwe." 3 Wakagombeka, "Muungu atogolwe! Mosi wa moto uwokao uda mzi wendaukwee uwanga misi yose kwesiho kisiikizi!" 4 Wada wadaa ishiini na nne na wada wenye ugima wane wakenamiza mitwi yao asi na kumvikia Muungu ekaae mwe kigoda cha useuta wakagombeka, "Muungu atogolwe, Pepa!"

5 Naho nee kwalawiya mgutio mwe kigoda cha useuta, ukagombeka, "Nywie watumwa wakwe wose mtogoeni Muungu yetu, nywie mwekumuogoha, mwekumtunya muno Muungu, wakuu kwa wadodo!" 6 Nee nasikia mgutio inga zumwezumwe kuu da wantu, naho inga mgutio mazi mangi na tuntumo kuu dikagombeka, "Zumbe atogolwe kwaviya Zumbe Muungu yetu mwenye udaho agookea. 7 Tiwe na nyemi na tumtowee vigeegee, naho tumtunye Muungu mwenye ukuu kwaviya ndoza ya Mwanangoto ibua naho mwai kaikwa kae. 8 Naho kekhigwa kuvaa gwanda zekugosolwazo kwa nyuzi zing'aazo na zisuntika." Gwanda izo zisuntika, zing'aa ni ugosoaji wekuemewao ni Muungu ukagosolwa ni wantu wa Muungu.

9 Nee mndima wa uko uwanga kwa Muungu akanigombeka, "Andika aya, wana nyemi wada wekugonekwao mwe khande ya ndoza ya Mwanangoto." Nee mndima wa uwanga kwa Muungu akaendeea kunigombeka, "Izi ni mbui za kwei za Muungu."

10 Aho nee nakinta mavindi na kwenamiza mtwi wangu hemeso yakwe nikakunda kumvika, akini yee akanigombeka, "Eka usekutenda ivyo, miye ni mndima wa Muungu inga wee na wanduguzo, wose tawagombekea wantu mbui za Yesu. Mvike Muungu!"

Kwaviya yada wagombekayo waoni yalawa kwa Yesu.

11 Naho nee naona uko uwanga kwa Muungu kuvugulwa na nekuwa na falasi ing'aayo. Mkwea falasi uyo nee ketangwa mzumiwa na mkwei, naho uwamuiya wantu ikundigwavyo na kutoana khondo ikundigwavyo. 12 Meso yakwe yekaa inga mwali wa moto, naho mwe mtwi wakwe nekavaa ntaji nyingi za kiseuta, nekawa na zina dekuandikwado ambado khahana mntu yoyose adimanyae iya yee mwenye ikedu. 13 Nekavaa khanzu yekuchovyado mwe phome, naho zina dakwe etangwa, "Mbui ya Muungu." 14 Mazumwezumwe ya wekaawo uko uwanga kwa Muungu wekuvaao gwanda zekung'aazo naho zisuntika muno nee wambasa wakwea falasi. 15 Mwe muomo wakwe kulawa paange kai na kwa paange ido endaawavote wantu wa si zose. Uyo endaagookee kwa ngoda ya chuma, na kuminya divai mwe kiminyio cha kuminyia zabibu chekumemacho maya kuu ya Muungu mwenye Udaho. 16 Naho ana zina diandikwa mwe gwanda dakwe na he kibea chakwe, "Seuta wa maseuta na Zumbe wa mazumbe."

17 Nee namwona mndima wa uwanga kwa Muungu yumwe kagooka mwezua, akatoa mgutio kwa wadege wose wekuwao wapuuka uwanga, "Soni mkintane hamwe kwa ntafuno khuu ya Muungu. 18 Soni mde vimba vya maseuta na wakuu wakhondo na wantu wenye nguvu na nyama ya falasi na wada wakweao na mii ya wantu wose wekuwao watumwa na wesaokuwa watumwa, wamanyikanao na wesaokumanyika, wakuu kwa wadodo!"

19 Naho nee namwona yuda kaa hamwe na maseuta wa mwe inusi na wakhondo. Wakintana ili watoane na yuda ekaae uwanga mwe falasi ing'aayo hamwe na wanakhondo wakwe. 20 Akini yuda Kaa akagwiiwa hamwe na yuda muoni mhokho agosoae vihii hantu hemeso yake naho nee kawazaganya wada wantu wekuwao na mhuli wa yuda kaa hamwe na wada wavikiao kizuu chakwe. Kaa uyo na muoni nee watambikwa mwe tumbwi wose waidi uku ni wagima, dekumemado maiwe ya madini ya chokaa yekukweeya moto, 21 na wada wakhondo wekusigaao nawo wakomwa kwa mhamba wekulawao mwe muomo wa yuda mkwea faasi akweaye faasi mwekung'aayo. Wadege wose weguta kwa kuda nyama za vimba vya awo wekukomwao.