1 Naho nikategeeza mgutio mkuu kulawa Mwenyumba ya Muungu uko uwanga ukawagombeka wada wandima mfungate wa uko uwanga kwa Muungu, "Hitani mkatiiye wiga izo mfungate za maya ya Muungu mwe inusi."

2 Mndima wa bosi akaita kutiiya wiga wakwe mwe inusi, nee yalawiiya mahihu yenye usungu muno kwa wada wose wekuwao na mhuli wa yuda mnyama na wada wekuvikiao kizuu chakwe.

3 Mndima wa kaidi akatiiya wiga wakwe mwe mazimshindo, mazi yakwe nee yahituka na kuwa phome ya mntu mwekuuyae na nyuma, na kiya chenye ugima mwe mazimshindo kikauya na nyuma.

4 Mndima wa ntatu akatiiya wiga wakwe mwe mazigizigi ya mazi na soko, nee vyahituka phome. 5 Nikamtegeeza mndima mgookezi wa mazi akagombeka, "Ewe Mng'azi, weaho na wekuwaye. Wee kuamuwa viya vyekukundigwavyo. 6 Kwaviya wawakoma waoni na wantu wa Muungu, wawatenda wandima wako walawe phome na kuuya na nyuma. Isasa kuwekha wantu awa wafyaimi phome waidomee, ivyo nee wakundigwavyo kugosolewa!" 7 Naho nikategeeza mgutio kulawa he ingo da kulaviya ntambiko ukagombeka, "Zumbe Muungu mwenye udaho! Uwamuio wako ni wa kwei na nee ikundigwavyo!"

8 Mndima wa nne akatiiya wiga wakwe kwe zua, nee zua dekhigwa nguvu ya kuwoka wantu inga moto. 9 Wantu nee wahya kwa zuguto dakwe kai, nee wakamdumua Muungu mwenye udaho wa masuumizo ayo. Naho wakaemea kumhitukiya na kumtogoa Muungu.

10 Naho mndima wa shano akatiiya wiga wakwe mwe kigoda cha useuta cha yuda kaa. Kiza kikaseeya mwe useuta wa yuda mnyama, wantu nee wauma limi zawo kwa usungu uda wekuonao, 11 wakamdumua Muungu wa uwanga kwa uda usungu wekuonao na kwa maihu yawo, akini khawakuhituka na kueka mbui zawo fyaimi.

12 Nee mndima wa mtandatu akatiiya wiga wakwe mwe zigizigi kuu Fulati. Mazi ya zigizigi dia nee yanyaa, ili kuika sia ya maseuta kulawa kulawiaho zua. 13 Naho nikaona muye fyaimi ntatu waoneka inga majula, umwe ulawiiya mwe muomo wa zoka na umwe ulawiiya mwe muomo wa yuda kaa na umwe ulawiiya mwe muomo wa yuda muoni mhokho. 14 Iyo nee muye za mazaiko wagosoao mbui za kuondomaza. Muye izo nee ziitazo kwa maseuta wose wa si zose, kuwaika hamwe kwaajii msi mkuu wa khondo wa Zumbe Muungu mwenye udaho.

15 "Tegeeza! Neza inga mbavi! Kajaiwa mntu acheezae na kuvaa magwanda yakwe, asekweza kuita kimbwigii uko na uko na kugea soni hemeso ya wantu!"

16 Muye izo zikakisanya maseuta hantu ekwetangwao kwa Kiebulania Halimagedoni.

17 Naho mndima wa mfungate akatiiya wiga wakwe uwanga, nee kwalawiya mgutio mkuu mwe kigoda cha useuta mwe Nyumba ya Muungu, ukagombeka, "Igosoka kae!" 18 Kukalawiiya umeme na vuzo na tuntumo na singisiko kuu da si, naho singisiko ido khadizati kulawiiya kuvokea aho Muungu ekuwaumbavyo wantu mwe inusi. 19 Naho mzi mkuu wa Babeli ukepanga hantu hantatu na mizi mikuu ya si zose ikagwa yose. Nae Muungu khekuujaa uda mzi mkuu wa Babeli. Akaushuutiza udomee kulawa kikombe cha divai ya maya yakwe khuu. 20 Visiwa vyose nee vyaga na miima yose khaikuoneka vituhu. 21 Naho fua khuu ya maiwe makuu yenye uzito wa kilo hamsini kwa kiya dimwe kulawa uko uwanga ikawanyiiya wantu, nawo wakamdumua Muungu kwaajii ya suumizo ido da fua khuu ya maiwe, kwaviya suuba iyo neiwa khuu muno.