1 Naho nikamuona Mwanangoto kagooka he muima wa sayuni, hamwe nae nekuna na wantu laki mwenga na alubaini na nne elufu, ambao mwe vyeni vyao waandikwa zina da uyo Mwanangoto na Tati yakwe. 2 Nee nikategeeza mgutio kulawa uwanga kwa Muungu, mgutio inga wa mazi mangi na tuntumo kuu. Mgutio nekusikiao neuwa inga watowa vinubi wakitowa vinubi vyao. 3 Wada wantu newatoa wiya mhya hemeso ya kigoda cha useuta na hemeso ya wada viumbe wenye ugima wane na wada wadaa. Khahana mntu yoyose ekudahae kuhina wiya uwo iya ni wada du wantu laki mwenga na alubaini na nne elufu wekukombolwao mwe inusi. 4 Wantu awo ni wada ambao khawekwegea usama kwa kugona na wavyee kuvokea kuvyaigwa kwao nao weika kwaajii ya ndima ya Muungu. Awa wamtongea Mwanangoto hohose aitako. Waoholwa kulawa mwe wantu watuhu watenda inga malavyo ya bosi kulavigwa kwa Muungu na Mwanangoto. 5 Khawekumanya kugombeka uhokho katu na khawana masa yoyose.

6 Naho nee naona mndima wa uwanga kwa Muungu mtuhu akapaa uwanga, akawa na Mbui Yedi ya misi yose kwesiho kisiikizi, ya kuwabiikia wantu wa mwe si, kwa wantu wa kiya si na kiya mbai na vigombeko na miyango. 7 Nee agombeka kwa mgutio mkuu, "Mtunyeni Muungu na mwekheni ntogoo, kwaviya kisingi cha Muungu cha kuamuiiya wantu wose kubua. Mvikiani yee mwekugosoae uko uwanga kwa Muungu na inusi na mazimshindo na soko ya mazi!"

8 Mndima wa kaidi akambasa yuda wa bosi, akagombeka, "Wagwa, wagwa wantu wa mzi mkuu wa Babiloni, wawadomeza wantu wa si zose divai yakwe khai ya kugosoa ukianga!"

9 Mndima wa ntatu akawabasa wada waidi, akagombeka kwa mgutio mkuu, "Mntu yoyose amvikiae yuda kaa na kizuu chakwe na kuhokea mhuli wakwe he kibea chakwe na he mkono wakwe, 10 yee mwenye endaadomee divai ya maya ya Muungu, iyo yekuikwayo mwe kikombe cha maya yakwe kwesiho kuhanganywa na mazi. Mntu uyo endaasumike kwa moto wa baluti hemeso ya wandima wekuikwao kwaajii ya Muungu na hemeso ya Mwanangoto. 11 Naho mosi wa moto uwasuumizao wakwea uwanga misi yose kwesiho kisiikizi. Wantu awo wekumvikiao mnyama na kizuu chakwe na kumanyika kwa zina dakwe, khawana wahumwize kusumiika kio na musi."

12 Ivyo wantu wa Muungu wategeezao miko ya Muungu na kumzumia Yesu, wakundigwa kuzizimiza.

13 Nee nategeeza mgutio kulawa uko uwanga kwa Muungu ukagombeka, "Andika aya, wajaiwa wada wose wauyao na nyuma wakawa waungana na Zumbe kuvokea isasa!"

Muye wa Muungu agombeka, "Haika wendawahumuize kulawana na suuba zao, kwaviya mbui za ntendwa zao ntana zitawatongea."

14 Naho nee nakauwa nikaona zunde ding'ang'azikao. Na uwanga wa zunde ido nekuwaaho yumwe ekwekaae inga Mwana Mntu, naho kavaa ntaji ya zahabu he mtwi wakwe na katozeeza nyengo khai. 15 Naho mndima wa uko uwanga kwa Muungu mtuhu akalawiiya mwe Nyumba ya Muungu uko uwanga, Nee alavya mgutio mkuu kwa yuda mwekukaa mwe mazunde akagombeka, "Doa nyengo yako ukasenge ubosi kwaviya kisingi cha ubosi kibua na ubosi wakwe udahaa!" 16 Yuda ekwekaae mwe mazunde, akayasa nyengo yakwe mwe inusi na ubosi wa mwe inusi ukabondwa.

17 Naho nikamwona mndima mtuhu akeza kulawiiya mwe Nyumba ya Muungu uko uwanga kwa Muungu, nae katoza nyengo khai.

18 Nee mndima mtuhu, yuda mgookezi wa moto akeza kulawa he ingo da kumvikia Muungu da uko uwanga, akamgombeka kwa mgutio mkuu yuda mndima ekutozae nyengo khai, "Tumia nyengo yako ukasenge vikonyo vya zabibu za mwe inusi, kwaviya ziiva!" 19 Nee mndima wa uwanga kwa Muungu akawasa nyengo yakwe mwe inusi, akazisenga zabibu za mwe inusi na kuzigea mwe hantu ha kukamuiya divai, nee maya ya Muungu. 20 Zabibu zikakamuiwa hantu ha kukamuiya divai yekuwayo chongoi ya mzi, phome nee yalawa hantu ha kukamuiya, nee mseeo wakwe ukatenda kina cha mita mwenga na nusu na uhae wakwe kilomita mia ntatu.