1 "Umwandikie mndima wa uko uwanga kwa Muungu wa zumwezumwe da wamzumiiyao Klistu da uko Salidi, kugombeka.

"Miye nenayo muye mifungate ya Muungu na ntoondo mfungate. Namanya ntendwa zao zose, naho wamanyika kuwa ni wagima kumbe wauya kae na nyuma! 2 Enuka, uzitende zitintimae mbui ncheche ntana zekusigaazo, kwaviya ata aya yahehi kuuya na nyuma, kwaviya nchekuona ndima zako kuwa ziigania hemeso ya Muungu. 3 Kumbuka yada wekuyategeezayo, wekuhinywayo na kuzumiiya, naho yatoze vitana na uhituke na kubada mavigaviga yako. Inga kwekugosoa ivyo nendaneze kwako inga mbavi, naho khauna umanye kisingi nendachoneze. 4 Akini wako wantu wancheche uko Salidi ambao khawakugea usama magwanda yao kwa kugosoa mavigaviga. Awo wakundigwa wawe hamwe na miye, uku wevika magwanda yekung'aayo. 5 Na mvoti endaahasikwe magwanda yekung'aayo, na miye khinanidiuse zina dakwe kulawa mwe kitabu cha ugima, naho nendanigombeke hemeso ya Tate na hemeso ya wandima wakwe wa uko uwanga kuwa ni wangu.

6 "Mwenye magutwi ya kutegeeza na ategeeze yada ambayo Muye ayagombeka mazumwezumwe ya wantu wamzumiiyao Klistu!

7 "Umwandikie mndima wa uko uwanga kwa Muungu agookeaye zumwezumwe da wamzumiiyao Klistu wa Filadelifia kugombeka.

"Miye nekung'aae na mkwei, miye mwenye komeo da Daudi, uyo akavugaa khahana adahae kuvugua na akavugua khahana adahae kuvugaa. 8 Namanya mbui zao zose. Kauwa kivugua uvi hemeso yako naho khahana mntu adahae kuuvugaa. Namanya una nguvu kidodo akini kuitoza mbui yangu naho kwekuniemea hemeso ya wantu. 9 Tegeeza! Nendaniwegae wantu wa zumwezumwe da Shetani kwako, wada wekwetangao ni Wayahudi akini khivyo ivyo, kwei ni wahokho. Awo nendaniwatende weze hako na kukukintia mavindi wadahe kumanya kuwa kikukundisa wee. 10 Kwaviya kutoza mbui yangu ya kuzizimiza, miye nendanikuinde mwe kisingi chose cha masuumizo yendayoyeze mwe inusi yose kuwageeza wantu wose wekaao mwe inusi. 11 Neza kwako kinyio! Tozeeza muno wekuwacho nacho, ili mntu yoyose asekukuhoka funge dako da uvoti."

12 Wavoti nendaniwatende mihindo mwe Nyumba ya Muungu wangu, naho khawanawalawe umo katu. Viyaviya nendaniandike uwanga yao zina da Muungu wangu na zina da mzi wa Muungu wangu, Yelusalemu mhya, mzi uda wendahousee kulawa uko uwanga kwa Muungu wangu. Naho nendaniandike uwanga yao zina dangu dihya.

13 "Mwenye magutwi ya kutegeeza na ategeeze yada ambayo Muye ayagombeka mazumwezumwe ya wantu wamzumiiyao Klistu!

14 "Umwandikie mndima wa uko uwanga kwa Muungu awagookeaye zumwezumwe da wamzumiiyao Klistu wa uko Laudikia kugombeka."

Miye netangwae Pepa, mvuhuzi mzumiwa na wa kwei, ambae ni vokeo da viumbe vyose ekuvigosoavyo Muungu nagombeka ivi. 15 Namanya mbui zako zose! Namanya kuwa weye khio wa pheho na khio wa moto, ebae nekuwa pheho hambu moto. 16 Akini kwaviya uvuguvugu, khio wa pheho na khio wa moto, nihehi kukutahika ulawe mwe muomo wangu! 17 Wagombekea wee ni mntu mwenye vintu vingi, naho unavyo vyose ukundavyo. Akini wee ni mnyonge na mwenye kuonewa mbazi naho ni mkiwa, na tuntu na vituhu ukimbwigii! 18 Nakwamba ugue zahabu kwangu yekusuntwayo kwa moto utende mntu mwenye vintu vingi kwei. Naho ugue gwanda ding'aado uvae na kugubika soni ya umwazi wako. Viyaviya gua mavuta ukahake hemeso yako udahe kukauwa. 19 Miye nee nawahaza na kuwekha sugusa wada wose niwakundisao. Ivyo gosoa kiya udahado na uhituke na kubada mavigaviga yako. 20 Tegeeza! Nagooka he uvi na kutoa hodi, mntu yoyose akategeeza mgutio wangu na kuvugua uvi, nendanengie kwakwe na kuda hamwe nae, nae endaade hamwe na miye. 21 Mvoti nendanimuike kwekaa hamwe na miye mwe kigoda changu cha useuta, inga viya miye mwenye nekuvotavyo nikekaa hamwe na Tate yangu uwanga mwe kigoda chakwe cha useuta.

22 "Mwenye magutwi ya kutegeeza na ategeeze yada ambayo Muye ayagombeka mazumwezumwe ya wantu wamzumiiyao Klistu!"