1 Naho nikaona mwe mkono wakwe wa kuume wa yuda ekaae mwe kigoda cha useuta, kitabu chekuandikwacho uku na uku na kuvugalwa na kuikwa mahula mfungate kuonyesha khachekuvugulwa.Kitabu chenye mihula mfungate

2 Nee namwona mndima mwenye udaho mkuu wa uko uwanga kwa Muungu akibiikia kwa mgutio mkuu, "Ni ndai afaae kutuwa mahula na kugubua kitabu?" 3 Akini khekulawiya mntu yoyose uko uwanga kwa Muungu wala mwe inusi wala asi mwe si ya wantu wekuuyao na nyuma, adahae kukigubua kitabu hambu kukikauwa ndani. 4 Nee naiya kwa usungu kwaviya khahana mntu mwekuoneka afaa kugubua kitabu, na kuona ndani. 5 Nee yumwe wa wada wadaa akanigombeka, "Wesekuiya. Kauwa, simba wa mbai ya Yuda, vokeo da Daudi kavota, naho adaha kutuwa mahula mfungate na kukigubua kitabu."

6 Nee naona Mwanangoto kagooka hada gatigati he kigoda cha useuta akawa inga kachinjwa, kazungukwa na wada viumbe wane wenye ugima na wada wadaa. Nekawa na phembe mfungate hamwe na meso mfungate ivyo nee muye mfungate ya Muungu zekugalwazo mwe inusi yose. 7 Mwanangoto akenda, akakidoa kiya kitabu mwe mkono wa kuume wa yuda ekaae mwe kigoda cha useuta. 8 Ekudoaho kiya kitabu wada viumbe wane wenye ugima hamwe na wada wadaa makumi maidi na nne wakakinta mavindi na kwenamiza mitwi yao asi hemeso ya Mwanangoto naho kiya yumwe nekawa na zeze na wiga za zahabu zekumemazo ubani. Ubani uwo ni mviko wa wantu wa Muungu. 9 Nee watoa wiya unu mhya,

"Wee wafaa kukidoa kitabu,

Na kutuwa mahula yakwe,

Kwaviya wee kuchinjwa,

Na kwa phome yako kumkombolea Muungu wetu,

Wantu kulawa kiya mbai na vitamwiiya vyose na wantu wa si zose,

10 Kuwatenda useuta wa waviki wamgosoee ndima Muungu yetu,

Nao wendawagookee wantu wose wa mwe inusi."

11 Nee nakauwa, nikategeeza mgutio wa wandima wangi wa uko uwanga kwa Muungu wesaokudahika kutaazika, wakawa wagooka uku wazuunguka kigoda cha useuta na wada viumbe wenye ugima hamwe na wada wadaa makumi maidi na nne, 12 wakagombeka kwa mgutio mkuu,

"Mwanangoto mwekuchinjwa afaa kuhokea

Udaho na kwekhigwa vintu vingi na umanyi na nguvu na ukuu na ntogoo."

13 Nikasikia viumbe vyose uko uwanga kwa Muungu na mwe inusi na asi ya inusi na mwe mazimshindo, naho viumbe vyose veumo mwe inusi vyose vikagombeka,

"Kwa yuda ekaae mwe kigoda cha useuta na Mwanangoto,

Ntogoo na ntunyo na ukuu na udaho na useuta,

Wa misi yose kwesiho kisiikizi."

14 Wada viumbe wane wenye ugima nee wagombeka, "Pepa!" Wada wadaa wakakinta mavindi na kwenamiza mitwi yao asi na kuvika.