1 Yekwembokayo ayo, nee naona uvi uvugulwa uko uwanga kwa Muungu.

Na uda mgutio nekuutegezao aho bosi ambao neuwa inga mgutio wa gunda ukagombeka, "Soo uku nikuonyeshe mbui zendazozilawiiye kisingi chezacho." 2 Ahoaho nikawa mwe Muye, nikaona kigoda cha useuta uku uwanga kwa Muungu, naho mntu yumwe nee kekaa uwanga ya kigoda icho. 3 Uyo mwekwekaa, uwanga yakwe kang'aa inga iwe detagwado yasipi na iwe da yombe khuu dekhundu. Mnywa mazi neuwa wang'aa inga iwe da yombe khuu detangwado zumalidi dikazunguuka kigoda cha useuta phande zose. 4 Nekuwa na vigoda vya useuta makumi maidi na nne vyekuzunguukavyo kigoda cha useuta vyekwekaiwavyo na wadaa makumi maidi na nne, wekuvaao magwanda yekung'aayo hamwe na ntaji za zahabu. 5 Mwe kigoda icho cha useuta kwalawiiya umbauwa na tuntumo hamwe na umbauwa. Hemeso ya kigoda cha useuta, nekuwa na taa mfungate zekuwazo zaka. Iyo nee muye mfungate ya Muungu. 6 Naho hemeso ya kigoda cha useuta nekuwa na kintu kikaoneka inga mazimshindo ya kioo yang'aayo inga iwe ding'aado muno.

Kiya kigoda cha useuta nee kigatigati na kizungukwa phande zose na viumbe wanne wenye ugima wamema meso mwii mgima hemeso na hemgongo. 7 Kiumbe wa bosi mwenye ugima kekaa inga simba na wakaidi kekaa inga njeku na wa ntatu nekawa na cheni inga cha mntu na wane kekaa inga tai apuukae. 8 Kiya kiumbe kimwe mwe wada wenye ugima wane newawa na mawawa mtandatu yekumemayo meso ndani na chongoi. Kwesiho kuhumuiza kio na musi watoa wiya,

"Mng'azi, Mng'azi, Mng'azi, Zumbe mwenye nguvu,

Ekuwaye na mweaho na ezae."

9 Kisingi chose wada viumbe wane wenye ugima watoaho wiya wa kumwekha ukuu na kumtunya na kumtogoa yee ekaae mwe kigoda cha useuta, mwekaae misi yose kwesiho kisiikizi, 10 wada wadaa makumi maidi na nne wakinta mavindi na kwenamiza mitwi yao asi hemeso ya yuda ekaae mwe kigoda cha useuta na kumvika yee ekaae misi yose kwesiho kisiikizi. Waika ntaji zao hemeso ya kigoda cha useuta wagombeka,

11 "Wafaa wee Zumbe yetu na Muungu yetu,

Kuhokea ukuu na ntunyo na nguvu.

Kwaviya ni wee mwekuumba vintu vyose,

Naho kwa kukunda kwako kuumba vintu vyose na viaho."