1 Naho nekhigwa lingoti inga ngoda ya kuhimia na kwembigwa, "Enuka ukaihime Nyumba ya Muungu, na ingo da kufukiza ubani na uwataazie wantu wendaowavike umo mwe Nyumba ya Muungu. 2 Akini wesekuhima uwa wekuwao chongoi he Nyumba ya Muungu kwaviya wekhigwa wantu wesaokuwa Wayahudi kwaani wendawaujate mzi wekuikwao kwaajii ya Muungu, kwa kisingi cha miongo makumi mane na mbii. 3 Miye nendaniwaagiiye wavuhuzi wangu waidi walavye uwoni kwa kisingi cha misi elufu mwenga na mia mbii na makumi mtandatu uku wahasika magunia."

4 Awo wavuhuzi waidi ni miti ya mzaituni na taa mbii zigookazo hemeso ya Zumbe wa inusi. 5 Mntu yoyose akundae kuwazuu, moto wendaulawe mwe makanwa yao na kuwadagamiza wamasa wao na kia mntu mwendaeageeze kuwazuu endaauye na nyuma. 6 Awo wanao udaho wa kuvugaa uwanga ili fua isekunya mwe kisingi chose walavyao uwoni. Naho wana udaho wa kuhitua mazi yatende phome na udaho wa kuitoa si kwa matoa yoyose wakundayo wowo.

7 Kisingi wabindiiza kulavya mbui yedi ya Muungu, mnyama yuda alawaye mwe tumbwi da si ya wantu wekuuyao na nyuma, naho endaawavote na kuwakoma. 8 Vimba vyao vyendavisambae mwe sia ya mzi mkuu, kuda Zumbe ekugong'ondewao he mhamba, kwa ugombekaji wa kiuoni wetangwa Sodoma hambu Misili. 9 Wantu kulawa kiya si na kia mbai na vitamwiwavyo na miango wendawakauwe vimba vyao kwa misi mitatu na nusu, na khanawazumie vimba ivyo viikwe mwe mbia. 10 Wantu wekaao mwe inusi wendawawe na nyemi kwa ufe wa awo waoni waidi na kuwa na nyemi kwa kwekhiana funge kwaviya awo waoni waidi wawasuumiza wantu wekwekaao mwe inusi. 11 Akini mwe misi mitatu na nusu, nee wengiwa ni Muye wa ugima kulawa kwa Muungu, nawo wakagooka, wantu wose wekuwaonao wakengiwa ni maatu, 12 Naho wada waoni waidi wakategeeza mgutio mkuu kulawa uwanga kwa Muungu ukagombeka, "Sooni uku uwanga!" Nawo wakaita uwanga kwa Muungu uku wamasa wao wawakauwa. 13 Kisingi ichoicho nee kwalawiiya singisiko kuu da inusi, selusi mwenga ya mzi nee yagwa, wakauya na nyuma wantu elufu mfungate mwe singisiko ido. Wantu wekusigaao wakaogoha muno, wakamtogoa Muungu wa uko uwanga kwa Muungu.

14 Masuumizo makuu ya kaidi yemboka, akini kauwa yantatu yahehi kweza.

15 Yekwembokayo ayo, mndima wa mfungate wa uko uwanga kwa Muungu akatoa gunda dakwe, mgutio mkuu uwanga kwa Muungu ukagombeka, "Isasa useuta wa mwe inusi utenda kuwa useuta wa Zumbe yetu na Klistu wakwe ekusagulwae kuwa mwohozi, naho endaagookee misi yose kwesaho kisiikizi." 16 Wada wadaa makumi maidi na nne wekwekaao hemeso ya Muungu mwe vigoda vyao vya useuta, wakagwa asi na kwenamiza mitwi yao na kumvika Muungu, 17 wakigombeka,

"Takutogoa wee Zumbe Muungu mwenye udaho,

Weaho na wekuwae!

Kwaviya kuonyesha udaho wako mkuu na isasa wagookea inga Seuta!

18 Wantu wesaokukuzumiiya wa si ntuhu wengiwa ni maya,

Akini kisingi cha maya chako kibua,

Nee ni kisingi cha kuwaamua wantu wekuuyao na nyuma.

Viyaviya ni kisingi cha kuwekha funge wandima wako waoni

Wantu wako wose na wose waditogoao zina dako, wakuu kwa wadodo,

Kisingi cha kuwadagamiza wada wawadagamizao wantu mwe inusi!"

19 Aho Nyumba ya Muungu ya uko uwanga kwa Muungu ikavugulwa na Sanduku da Agane nee daoneka ndani mwake. Kukalawiiya umbauwa na mgutio na tuntumo na singisiko na fua khuu ya maiwe.