1 Isasa wandugu zangu, kuwani na nyemi kwa kuwa hamwe na Zumbe! Miye khisokea kuuwiiya yada nekubindayo kuyaandika hada bosi, kwaviya yendayainde uzumizi wenu. 2 Ekaeni hae na wahinyi washuutizao kuwa wamzumiiyao Klistu wose wakundigwa kugwiswa. Awo waaho inga makui makai, ivyo ekaeni hae na wagosoawo ufyaimi uwo. 3 Akini swie nee wantu tekugwiswao kikweikwei na khio wowo, swie tamvikia Muungu mwe Muye wakwe, tevunia Yesu Klistu na kumkauwia khio mwe mwii, 4 ata inga miye mwenye nadaha kukauwiiya mbui za mwii. Inga kuna mntu evunia kukauwiiya mbui za mwii, miye ninayo mangi muno yakukauwiya kusima mntu uyo. 5 Miye nee kigwiswa msi wa nane tangia nekuvyaigwavyo, miye ni Muisilaeli kulawa mbai ya Benjamini, ivyo miye ni Muebulania wa kweikwei, kwaajii nee khiwa Mfalisayo kwa kutoza miagiiyo ya Musa vitana, 6 Nee nikagosoa kia nidahado ata nikadisuumiza zumwezumwe da wantu wamzumiiyao Klistu, mwe kugosoa mbui yedi ili nizumiwe na Muungu kwa kutegeeza miagiiyo miye nee khina masa yoyose. 7 Akini mbui zia zekuwazo naziona kuwa zina myengizo kwangu, isasa nayaona kuwa ni hasaa kwaajii ya Klistu. 8 Naho khio ayodu, iya naona kiya kintu kuwa ni hasaa du kwaajii ya mbui yedi muno ya kummanya Klistu Yesu, Zumbe yangu na kwaajii yakwe khizumiia kubada kiya kintu, nimeyaona ayo yose kuwa inga mafusi ili nidahe kuwa na Klistu, 9 na kuungana nae. Khikauwiiya vituhu kuwa nazumiwa hemeso ya Muungu, kwa kutoza miagiiyo ya Musa iya nakauwiiya kuzumiwa na Muungu kwa kumzumiiya Klistu. Muungu nee anitaanziae kuwa mntu nizumiwaye kwakwe kwaajii namzumiiya Klistu. 10 Nikikundacho ni kummanya Klistu na kuiona nguvu ya kuyuyuka kwake, nakunda kuwa hamwe kusuumika inga ekusuumikavyo yee, naho nakunda kuuya na nyuma inga ekuuyavyo na nyuma yee. 11 Nikakauwiya kuwa miye viyaviya nendaniyuyuswe.

12 Khigombeka kuwa khiwa inga Klistu eivyo, iya naendeea kuwa mtintimavu ili nipate ayo yose ambayo Klistu Yesu kanetangia kuyapata. 13 Wandugu zangu shetaazia kuwa khibinda kae kupata ayo yose. Akini nagosoa mbui mwenga, nijae mbui zia zekwembokazo na nagosoa kia didahikanado kuyabwiiya yada yekuwayo hemeso. 14 Naho nagosoa kia didahikanado kubuiya ida lengo, ili nidahe kwekhigwa funge iyo ambayo ni wetango mkuu wa Muungu kwa wekaisi wa uwanga kwa Muungu kwa sia ya Yesu Klistu.

15 Swie wose ambao tidahaa kwa kuzumiiya takundigwa kumamaakhanya ivyo, ikawa mna mamakhanyi ambazo khaziigana na izo, Muungu endaawagubuiye. 16 Kwa vyovyose tiite hemeso mwe sia iyoiyo ambayo tiibasa adi ivi isasa.

17 Wandugu zangu, baseni msimo wangu. Tiwekha msimo mtana, na ivyo wategeezeni wada watongeao khachu kwetu. 18 Khibinda kae kuwamba mbui inu maa kwa maa, na isasa nauwiiya kuwagombeka vituhu kwa mesozi, wauko wantu wangi wanaoonyesha kwa sia ya khachu zao kwamba kuuya na nyuma kwa Klistu uwanga ya mhamba ni masa kwao. 19 Kisikiizi cha wantu awo ni kudagamizwa kwaani maifu yao nee muungu yao, na ukuu wao mbui zao za soni, wamamaakhanya du mbui za inusi inu. 20 Akini swie ni wenyezi wa uwanga kwa Muungu na tagoja kwa hovu khuu kweza kwa Mwohozi yetu Zumbe Yesu Klistu kulawa uwanga kwa Muungu. 21 Yee enda aihitue mii yetu yesayokuwa na nguvu iigane na mwii wakwe wa ukuu kwa nguvu ida imdahizayo kugookea vintu vyose.