1 Ivyo wandugu zangu niwakundisao, natamiwa muno kuwavuiiya nywie. Kwaajii yenu miye nina nyemi na kuwa nendanihokee funge ya uvoti, nywie niwakundisao ivyo muwe watintimavu kwa kumkauwiya Zumbe Yesu.

2 Nawaombeza muno Euodia na Sutike mwevane kwaviya mumzumiiya Zumbe. 3 Nawe mndima mwezwangu mzumiwa nakuomba uwaambize wakina mmaa awo, kwaviya wagosoa ndima ya kubiikia Mbui Yedi kwa kia idahikanado hamwe na miye na Kilementi na wagosozi wa ndima wezwangu watuhu wose, ambao mazina yao yaandikwa mwe kitabu cha ugima.

4 Naho kuwani na nyemi misi yose mwe Zumbe, vituhu nagombeka kuwani na nyemi.

5 Uhuhusi wenu na umanyike kwa wantu wose, kwaviya Zumbe yuhehi na kuuya. 6 Mwesekuwa na maatu uwanga ya kintu chochose, iya kwa kia mbui muombeezeni Muungu mwe miviko yenu ya uwanga ya vintu mkundavyo kia msi, kwa ntogoo. 7 Muungu endaawekhe uivanisa mkuu muno kusima mmanyavyo, na kuinda mioyo yenu na akii zenu kwaajii muwa hamwe na Klistu Yesu.

8 Kwakubindiiza wandugu zangu tozani mbui zekuwazo zedi na mkundigwazo kutogolwa, ambayo ni mbui za kwei na ntana na mbui za kutunywa na mbui zikundigwazo ni Muungu na mbui ambazo khio za mavigaviga na mbui za kutamiza na mbui zikundigwazo. 9 Mwendee kugosoa mbui zose mwekwehinyazo hambu kuzihokea hambu kuzitegeeza hambu na khigombeka na kuona khiyagosoa, nae Muungu wa uivanisa endaawe hamwe na nywie.

10 Naona nyemi khuu mwe kuungana na Zumbe, kwaviya isasa mwakumbuka kunimamaakhanya vituhu. Kwei nee mkanimamakhanya kisingi chose, iya mkakosa phasi ya kunegaiiya waambizi wenu kwangu. 11 Khigombeka ivyo isasa kwaviya nakunda uwambiizi kulawa kwa yoyose kwaviya chehinya kutosheka na vintu nekuwavyo navyo. 12 Namanya kwekaa kwesiho kintu na kuwa na vintu vingi, mwe mbui zose chehina kweguta na kuona saa iwe nina vintu vingi hambu kuhungukiwa. 13 Nadaha kugosoa mbui zose izo mwe Klistu kwaviya yee nee anekhae nguvu.

14 Akini nywie mgosoa vyedi kwa kuwa hamwe nami mwe masuumizo yangu. 15 Nywie Wafilipi mwamanya wenye kuwa mwe vokeo da kubiikia Mbui Yedi, nekuwaho nalawa Makedonia, nywie ikedu nee zumwezumwe da wantu wamzumiiyao Klistu mwekuniambizao, nywie du nee mwekuwa hamwe na miye mwe kuhokea na kuwaambiza watuhu. 16 Kwaviya nekuwaho nakunda uwambiza kuda Sesalonike mkanietea maa nyingi yada nekuyakundayo. 17 Khigombeka kwaajii nakunda kuhokea vintu kulawa kwenu, iya nikundacho ni kuona majaiwa kulwa kwa Muungu zagenyea kwenu kwa yada mgosoayo kwa ukundiso. 18 Miye khihokea vintu vyose mwekunekhavyo, naho kwemboka viya nekukundavyo mwe wekazi wangu. Nina kiya kintu kwaviya isasa Epafulodito kanietea kae wambiizi wenu. Wambiizi wenu uwo ni inga ntambiko yenye mzingo mtana, ntambiko izumiwayo na kumtamiza Muungu. 19 Muungu endaawekhe yose muyakundayo kuigana na utajii wakwe mwe ukuu, kwa sia ya Yesu Klistu. 20 Muungu ekuwae Tati yetu atogolwe, misi yose kwesiho kisiikizi. Pepa.

21 Nawaugusa wantu wose wa Muungu wekuwao wakwe Klistu Yesu. Wandugu wekuwao hamwe na miye aha wawaugusa nywie. 22 Wantu wose wa Muungu wa aha, na asa wada wantu wa Muungu wekuzumiiyao wekaao mwe nyumba ya seuta wa Lumi Kaisali, wawaugusa.

23 Tamuombeza Muungu Tate wa Zumbe Yesu Klistu awekhe wedi wakwe.