1 Miye Paolo muagiiwa wa Klistu Yesu kwa ukundiso wa Muungu kiandika bauwa inu nikawa hamwe na Timoseo ndugu yetu.

2 Twawaandikia nywie wantu wa Muungu mwekaao mwe mzi wa Kolosai, ndugu zetu wazumiiwa mwe kuungana na Klistu.

Tawaombea wedi na uivanisi kulawa kwa Muungu Tati yetu.

3 Kiya tiwaombeaho na kumtogoa Muungu, Tate wa Zumbe yetu Yesu Klistu, 4 kwaviya titegeeza mumzumiiavyo Yesu Klistu na viya muwakundisavyo wantu wose wa Muungu. 5 Kuzumiiya kwenu na ukundiso wenu walawa mwe kauwiyo denu kuwa mwendamuhokee majaiwa ambayo Muungu kawaikia kulawa uko uwanga kwa Muungu, kauwiyo ambado mtegeeza mbui zakwe mwe mbui ya kwei, yani Mbui Yedi. 6 Mtegeeza iyo Mbui Yedi, inga viya yekutegeezwavyo na wantu wose mwe inusi, zawatenda wantu wahituke ili wamzumiiye Muungu inga yekuwavyo henu tangia msi mwekutegeezaho kuusu wedi wa Muungu na kuumanya ukwei wakwe. 7 Inga mwekuhimwavyo na Epafula, mndima mwezwetu timkundisae, naho ni mndima mzumiwa wa Klistu kwaajii yenu. 8 Yee katigombeka mbui za ukundiso wenu, ambao ulawana na Muye wa Muungu.

9 Kwaajii iyo tawaombea misi yose tangia tekutegeezaho mbui zenu. Tamuombeza Muungu awekhe kumanya muno kwa yada akundayo yee, awekhe umanyi wose na akii kulawa kwa Muye wa Muungu. 10 Aho mwendamdahe kwekaa inga akundavyo Zumbe, na kugosoa mbui zimtamizazo misi yose. Kwekaa kwenu wendauwe wenye ntendwa zedi, na mwendamtendese kummanya Muungu. 11 Tamuombeza Muungu awekhe nguvu kwa udaho wakwe wenye ukuu, ili mdahe kuzizimiza kia kintu kwesiho kusokea. 12 Naho mkamtogoa Muungu Tate kwa nyemi, ekuwaambiizae nywie muweaho mwe mbui ziya ekuwaikiazo wantu wakwe mwe useuta wa mng'ao. 13 Kwaviya katiohowa kulawa mwe nguvu ya kiza, na kutengiza mwe useuta wa Mwana wakwe amkundisae, 14 ambae katikomboa, yaani mavigaviga yetu yausigwa.

15 Klistu ni msimo wa Muungu esayekuoneka, ni mvyaigwa wa bosi wa vintu vyose vyekuumbwavyo. 16 Kwa sia yakwe, Muungu kaumba vintu vyose vyekuwavyo uko uwanga kwa Muungu na vyekuwavyo mwe inusi, na vintu vyose vionekanavyo na vyesavyo kuoneka. Naho kaumba maseuta, hambu wagookezi, hambu wakuu, hambu wenye nguvu. Muungu nee kaumba vyose kwa sia yakwe na kwaajii yakwe. 17 Yee nee kawaaho kisingi vintu khavizati kuumbwa, na kwembokea yee vintu vyose vyaendeeya kuwaaho. 18 Yee nee mtwi wa mwii, mana yakwe zumwezumwe da wantu wamzumiiyao Klistu, naye nee vokeo, naho ni wa bosi kuyuyuka kulawa kwa wekuuyao na nyuma, ili yee awe mkuu mwe vintu vyose. 19 Kwaviya Muungu nee kakundisa viya eivyo yee, Uungu wakwe uwe uumo mwa Klistu, 20 naho kwa sia ya Yesu, Muungu akaviivanisa vintu vyose na yee, vintu vyose vyekuwavyo mwe inusi na vyekuwavyo uko uwanga kwa Muungu, kwa kugosoa uivanisa kwa phome yakwe, yekwetikayo mwe mhamba.

21 Aho bosi nee muwa hae na Muungu, na nee muwa wamasa wakwe, kwaajii ya mamakhanyi zenu na ntendwa zenu fyaimi. 22 Akini isasa, kwa ufe wa Mwanae ekwekaaye hanu mwe inusi, Muungu kawaika hamwe naye, kwaajii awaike hemeso yakwe mkawa wantu wakwe, kwesiho masa wala kugombekwa ya ufyaimi. 23 Ikawa mwaendee kwekaa kwa kuzumiiya, mkawa wantintimavu na nguvu, kwesaho kubada kauwiyo ambado mwiikiwa kiaga mwe Mbui Yedi. Miye Paolo kiwa mbiikizi wa Mbui Yedi mwekuitegeezayo ambayo ibiikiwa kwa wantu wose mwe inusi.

24 Isasa nina nyemi na masumiizo niyapatayo kwaajii yenu. Kwaviya mwe masuumizo yangu mwe inusi, naambiza kuiganiza kia chekuhungukiwacho mwe masuumizo ya Klistu kwaajii ya mwii wa Klistu, yaani zumwezumwe da wantu wamzumiiyao Klistu. 25 Miye kiwa mndima wa zumwezumwe da wantu wamzumiiyao Klistu kutongeana na ndima ida Muungu ekunekhayo kwajii yenu. Ndima yenye ni kubiikia Mbui Yedi inga yeivyo. 26 Mbui ida nee ida sii yekufiswayo tangia aho kae na kwa vyekuvyaigwavyo vyose, akini isasa igubulwa kwa wantu wa Muungu. 27 Muungu kakunda kuwaonyesha wantu wakwe sii iyo ya viozo, ambayo nee kagosoa ata kwa wantu wesaokuwa Wayahudi. Sii iyo ni kuwa Klistu yuuko umo mwenu, naho yee nee awekhaye kauwiyo kuwa mwendamuwe hamwe na ukuu wa Muungu. 28 Kwaajii iyo tambiikia Klistu kwa wantu wose, tawahaza na kuwahinya wantu wose kwa umanyi wose, ili tidahe kumweta kiya yumwe hemeso ya Muungu, akawa katintimaa mwe kuungana na Klistu. 29 Kwaajii iyo, nagosoa kia nidahado kugosoa ndima kwa nguvu ambayo Klistu kanekha.