1 Nakunda mmanye kuwa nigosoavyo ndima kwa nguvu zose kwaajii yenu, na kwaajii ya wantu wa mzi wa Laodikia na kwaajii ya wose ambao khawazati kuniona. 2 Nagosoa ivi, ili wagewe moyo na kuunganishwa mwe ukundiso, ili wapate umanyi mwingi muno uwekhao uiganizi, ili waimanye sii ya Muungu, ambayo nee Klistu mwenye, 3 ambae umo mwake kufiswa matana yose ya umanyi na ya unyanyi.

4 Nawamba nywie mbui izi, ili mntu yoyose asekuwatiiya kwa mbui zionekanazo ni ntana, akini ni yakuwaza. 5 Nagombeka ivyo, etiho miye khiho hamwe na nywie, akini mamaakhanyi ziaho hamwe na nywie, na miye nawa na nyemi nionaho mwekaavyo hamwe na mwekuwavyo wantintimavu mwe kumzumiiya Klistu.

6 Kwaviya nywie mumzumiiya Klistu Yesu kuwa Zumbe, endeeni kumtongea yee. 7 Muendee kuwa watintimavu mwe kuzumiiya Mbui ya Klistu naho muendee kwehinya muno mwe kummanya yee, na muwe wantu ambao wamtogoa Muungu kia kisingi.

8 Kauwani, mntu asekweza kumyaza kwa mahinyo ya bue na ya utiizi. Mana yakwe asekweza akawaza kwa unyanyi wa kuwatiiya, ambayo yalawana na mazweeya ya wantu. Mahinyo ayo khio ya Klistu. 9 Kwaviya, mwe mwii wa Klistu mwenye Muungu ekaa umo mwakwe, 10 nanywi mwekhigwa ugima ambao uigania mwe kuungana naye. Yee ana udaho kusima udaho wa phepo zose na wakuu wose.

11 Mwekuunganaho na Klistu nemuwa inga mgwisa, khio kwa kugwisa na wantu, iya kwa ugwiso wa Klistu mwenye ambae kawalavya mwe asii ya mavigaviga. 12 Kwaviya, mwekubatizwaho nee muikwa hamwe mwe mbia na Klistu, na mwe ubatiizo nemyuyuswa hamwe naye, kwaajii mzumiiya mwe nguvu ya Muungu ambayo imyuyusa Klistu. 13 Aho kae nywie nee muwa inga muuya na nyuma kwaajii ya mavigaviga yenu, na kwaajii nee muwa wantu wa si ntuhu. Akini Muungu kawekha ugima hamwe na Klistu. Muungu katiekea mavigaviga yetu yose, 14 kaiyusa ida bauwa iyonyeshayo kuwa tina mavigaviga na akaiyusa kwa kugong'ondea he mhamba. 15 Uko he mhamba, Klistu nee kawahoka nguvu wagookezi mazaiko, kawagea soni hemeso ya wantu kwa kuwabuuta inga wafungwa ili wantu wa mwe inusi wawaone.

16 Ivyo, mntu yoyose asekuwaikia miagiiyo mwe mbui ya khande hambu vidomeo, hambu kwaajii ya sikukhuu, hambu mwandamo wa mweenge, hambu Msi wa Kuhumwiiza. 17 Ayo yose ni kizui cha mbui zezazo, akini mbui za ukwei zaoneka mwe Klistu mwenye. 18 Mwesekumtegeeza mntu yoyose evunae kuwa yedi kwa uhuhusi wa uongo na kuwavika wandima wa uko uwanga kwa Muungu, wakundisa kutamwiiya yada Muungu ekuwaonyeshayo na kugooka mwe mamakhanyi zao. Mntu inga uyo asekuwahoka funge denu mwekuikiwayo ya misi yose kwesiho kisiikizi, mntu uyo ni mhezi kwa mamakhanyi fyaimi za inusi, 19 Naho keika hae na Klistu ambae agookea wantu wakwe inga mtwi ugookeavyo mwii, kulawa kwakwe Klistu mwii wose wapata khande na nguvu, naho aunganisha mwii wose hamwe na vimamo na mishipa, ivyo nee Muungu akundavyo tiwe kintu kimwe.

20 Nywie nee muuya na nyuma hamwe na Klistu, mkakombolwa kulawa mwe nguvu za mazaiko wagookeao inusi inu, Kwa mbwai mwekaa inga wantu wa inusi inu? Kwa mbwahi mwazumiiya kubasa miagiiyo iyo, 21 inga viya, "Msekutoza iki na msekuonja kiya, naho msekudonta kiya!" 22 Aya yose kiisikizi chakwe ni kubanika yanapotumiwa, kwaajii vokeo dakwe ni mwe miagiiyo na mahinyo ya wantu. 23 Kwakwei wantu watongeao miagiiyo inga iyo kuoneka kuwa ni wenye umanyi muno, mwe miviko wakundayo wenye, na kugosoa yada yakundigwayo kwa uhokho na kuugookea mwii kwa ukai, akini miagiiyo iyo khaidaha kukindia khwiina fyaimi za mwii.