1 Isasa kwaviya mmuyuyuka hamwe na Klistu, ondezani mbui za uko uwanga kwa Muungu ambako Klistu kekaa mkono wa kuume wa Muungu. 2 Mamaakhanyani mbui zekuwazo uko uwanga kwa Muungu, iya khio zekuwazo mwe inusi. 3 Kwaviya untu wenu wa bosi uuya na nyuma, isasa mwekaa hamwe na Klistu hemeso ya Muungu, akini wekazi uwo hamwe na yee khauoneka. 4 Kisingi Klistu, ekuwaye ugima wenu, endahoauye, nee nywie mwendahomlawiiye hamwe nae mwe ukuu wakwe.

5 Ivyo, kuweni ahe muno mwe mbui izi, inga viya ukianga, na mbui za soni, na khwiina fyaimi, mamaakhanyi fyaimi, na khwiina ya kuwa na vintu vingi, ambayo nsawa na kuvika vizuu. 6 Kwaajii ya mbui izo, maya ya Muungu kuwezea wada wose wagosoao mavigaviga. 7 Aho kae, nywie nee muwa mwagosoa ayo mwekuwaho mwekaa kutongeana na ayo.

8 Akini isasa mwakundigwa kubadana na mbui izi zose, maya khai, na ufyaimi, na kudumua na ntamwiizi fyaimi kulawa mwe miomo yenu. 9 Msekugombekeana uhokho, kwaajii muubada untu wenu wa kae hamwe na ntendwa zakwe, 10 na nywie mkahokea untu mhya. Muungu kauika untu mhya umo mwenu na kuwagosoa muigane nae, ili mdahe kummanya vitana. 11 Hanu khahana mgiiki wala Myahudi, ambae na kagwiswa na khegugwiswa, na ambaye mmanyi na esae kuwa mmanyi, mtumwa na ekuekewae. Iya Klistu nee mwekugosoa ayo yose, na yuumo mwe wose.

12 Nywie ni wantu wakwe Muungu, yee awakundisae na kuwasagua. Kwa iyo, muwe na moyo wa mbazi, na muwe wedi, na muwe wanyenyekevu, na muwe wahuhusi na kuzizimiza. 13 Zizimizana na kuekeana. Mntu akawa na mbui yoyose kwa mweziwe mwakundigwa kuekeana inga viya Zumbe ekuwaekeavyo nywie. 14 Mbui khuu kusima ayo yose mkundisane kwaajii kukundisana kwawatenda muwe hamwe mwe uhamwe wa kwei. 15 Na uivanisi wa Klistu uwaongoee mioyoni mwenu, nywie muwa mwii umwe, ivyo mwetangwa kwekaa kwa uivanisi. Naho kuwani wantu wa kumtogoa Muungu. 16 Mbui ya Klistu na yekae kwa wingi umo mwenu, mkahinyana na kuhazana mwe umanyi wose, mkamtoeya wiya wa Zabuli Muungu, wiya na tenzi za kimuye, uku mkawa na ntogoo mwe mioyo yenu. 17 Na kiya mgosoado, ikawa kwa mbui hambu kwa ntendwa, gosoani yose kwa zina da Zumbe Yesu, mkamtogoa Muungu Tate kwembokea yee.

18 Nywie wavyee, wategeezani wagosi wenu, kwani nee ikundigwavyo kwa wantu wamzumiiyao Zumbe Yesu.

19 Na nywie wagosi, wakundiseni wavyee wenu, na msekuwa wakai kwao.

20 Na nywie wana, wategeezani wavyazi wenu mwe mbui zose, kwaviya ayo nee yamkundisavyo Zumbe.

21 Nywie nanywi wakina tate, msekuwasongeeza wana wenu, ili wasekweza kufa maya.

22 Ninywi watumwa, wategeezani mazumbe wenu wa hanu mwe inusi mwe mbui zose. Na khio du kisingi wawakauwaho iya gosoani ivyo ata wesaho kuwaaho, kwa moyo wose kwaviya mwamtunya Zumbe. 23 Dodose mgosoado, gosoani kwa moyo inga wantu wamgosoeao Zumbe, na khio kwaajii ya wantu. 24 Kumbukani kuwa Zumbe mumgosoeya ndima nee Klistu na yee endaawekhe funge ekuwaikiayo kiaga. 25 Yoyose agosoaye mafyaimi endaaihwe kwaajii ya mafyaimi yakwe, kwaviya Muungu khabahua mntu yoyose.