1 Nywie wakuu, wagosoeyani watumwa wenu yekuwayo yedi na yakundigwayo, mkamanya kuwa nywie nanywi mnaye Zumbe wa uko uwanga kwa Muungu.

2 Msekueka kumvikia Muungu. Mkekaa meso mwe ayo yose hamwe na kutogoa. 3 Mtivike na swie, ili Muungu atekhe phasi ya kubiikia mbui ya Klistu ambayo nee ifiswa aho kae, ambayo na miye kiikwa mwe kifungo kwaajii ya kubiikia mbui iyo. 4 Naho, nivikiani ili nidahe kubiikia Mbui Yedi hemeso ya wantu inga ikundigwavyo kubiikia na wantu wadahe kuva pwii.

5 Kisingi muaho na wantu wesaokumzumiiya Klistu, muonyeshe khachu zenu tana, naho mtumie kisingi icho kuwaambiiza. 6 Ntamwiizi zenu ziwe ntana misi zose, naho yadahe kuwaambiiza watuhu na viyaviya mmanye kumtambaisa vitana kiya mntu.

7 Ndugu yetu Tikiko, mndima yedi na mndima mwezwetu mwe ndima ya Zumbe Yesu, endaawekhe mbui zangu zose. 8 Nee mana kimuagiiya kwenu, ili awatende muwe na nyemi na kuwagombeka mbui zetu. 9 Eza hamwe na Onesimo, ndugu yetu timkundisae na yedi, ambae ni mwenyezi wa kwenu. Wendawawagombeke mbui zose zigosokazo hanu henu.

10 Alisitaliko, ekuwaye hamwe na miye mwe kifungo awaugusa, naye Maliko, nduguye da Balinaba. Mpata kae miagiiyo imhusuyo yee na akeza kwenu, mhokeeni. 11 Nae Yoshua etangwae Yusuto awaugusa. Wamwe wa Wayahudi wekuhokeao uzumizi, awa du ikedu, nee wagosoao ndima hamwe nami kwaajii ya useuta wa Muungu, nao wawa uwambiizi mkuu kwangu.

12 Epafula, ambae ni mwenyezi yenu na mndima wa Klistu Yesu, awaugusa. Yee misi zose awaombea muno kwaajii mgooke vitana mwe yada akundayo Muungu, mkawa wedi na wantintimavu. 13 Nadaha kugombeka kuwa agosoa ndima muno kwaajii yenu na kwaajii ya wantu wa mzi wa Laodikia na mzi wa Hielapoli. 14 Luka, mganga yetu timkundisae, na Dema, wawaugusa.

15 Wauguseni wandugu wose wa mzi wa Laodikia, hamwe na umbu dangu Nimfa, na zumwezumwe da wantu wamzumiiyao Klistu dikintanado mwe nyumba yakwe 16 Mkabinda kusoma bauwa inu, mkawekhe wantu wamzumiiao Klistu wa uko Laodikia, na nywie gosoani nteganyi mpate kusoma bauwa yekulawayo kwao. 17 Mgombekani Alikipo aibinde vitana ndima ekwekhigwayo na Zumbe.

18 Miye Paulo, naandika uugusi unu kwa mkono wangu mwenye. Kumbukani kuniombea niwaho aha mwe kifungo. Na nawaombea wedi wa Muungu uwe hamwe na nywie. Pepa.